བོད་དོན་རྒྱབ་སྐྱོར་བ་ཨིནསེ་ཁན་ཊར་ (Enes Kanter) མཆོག་ལ་ཐུགས་རྗེ་ཆེ་ཞུའི་སིལ་སྤོལ་རྩེད་འགྲན།
ཕྱི་ལོ་ ༢༠༢༡ ཟླ་ ༡༠ ཚེས་ ༣༠ ཉིན་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་དང་། རྡ་ས་ས་གནས་གཞོན་ནུ་གཉིས་ཟུང་སྦྲེལ་གྱིས། ཨ་རིའི་སིལ་སྤོལ་རྩེད་འགྲན་པ་གྲགས་ཅན་ཨིནསེ་ཁན་ཊར་མཆོག་ནས་བོད་དང་བོད་མིའི་བདེན་པའི་འཐབ་རྩོད་ཆེད་གདུང་སེམས་མཉམ་བསྐྱེད་ཀྱིས་རྒྱབ་སྐྱོར་དང་། རྒྱ་ནག་དམར་ཤོག་སྲིད་གཞུང་གི་གདུག་རྩུབ་ཅན་གྱི་སྲིད་བྱུས་རྣམས་ཐེར་འདོན་དང་། སྐྱོན་བརྗོད་ནན་པོ་བྱས་པར་ཐུགས་རྗེ་ཆེ་ཞུའི་སིལ་སྤོལ་རྩེད་འགྲན་ཞིག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་གོ་སྒྲིག་ཞུས་ཏེ། རྡ་ས་ས་གནས་གཞོན་ནུའི་རུ་ཁག་དང་། ས་རཱ་མཐོ་རིམ་སློབ་གཉེར་ཁང་གི་རུ་ཁག་གཉིས་བར་རྩེད་འགྲན་ལེགས་གྲུབ་ཀྱིས་འཕྲེད་དར་དང་སྦྱར་ཡིག་སོགས་ཀྱི་ལམ་ནས་ཨིནསེ་ཁན་ཊར་མཆོག་ལ་ཐུགས་རྗེ་ཆེ་ཞུའི་རྣམ་འགྱུར་སྟོན་ཐུབ་པ་བྱུང་ཡོད།
རྩེད་འགྲན་སྐབས་དམིགས་བསལ་སྐུ་མགྲོན་དུ་གཞོན་ལྷན་སྤྱི་ཁྱབ་ཚོགས་གཙོ་དང་། ས་རཱ་མཐོ་སློབ་ཀྱི་སློབ་སྤྱི་རྒན་པ་སངས་ལགས་བཅས་ཆེད་ཕེབས་དང་། རྩེད་འགྲན་གྱི་བར་སེང་སྐབས་གཞོན་ལྷན་ཚོགས་གཙོ་མཆོག་ནས་སྐུ་ཞབས་ཁོང་ལ་ཐུགས་རྗེ་ཆེ་ཞུའི་གསུང་བཤད་གནང་དོན་དུ། ཕྱི་རྒྱལ་མི་རིགས་ཞིག་ནས་སོ་སོའི་མཚན་སྙན་གྱི་གནས་བབ་གློད་སྟོང་གིས་རྒྱ་ནག་དམར་ཤོག་སྲིད་གཞུང་གི་བྱས་ཉེས་རྣམས་ཐེར་འདོན་དང་། རྒྱ་དམར་སྲིད་གཞུང་གིས་བརྩན་གནོན་གདུག་རྩུབ་འོག་མྱང་དང་། མྱོང་བཞིན་པའི་རྒྱལ་ཁབ་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། རང་རིགས་དམིགས་བསལ་ས་རཱ་སློབ་གཉེར་བ་རྣམས་ནས་རང་གི་རིག་གཞུང་དང་སྐད་ཡིག་སོགས་ཀྱི་ཐད་མི་ཉམས་རྒྱུན་འཛིན་གནང་མུས་ཡིན་པར་ཡི་རངས་བསྔགས་བརྗོད་ཞུས་ཡོད་ན་ཡང་། དམིགས་བསལ་བཙན་བྱོལ་སྐྱབས་བཅོལ་བ་ཞིག་ཡིན་པའི་ཆ་ནས་འཐབ་རྩོད་ཐད་ནུས་པ་མཉམ་སྤུངས་གནང་སྐྱོང་ཡོང་བའི་འབོད་སྐུལ་ཡང་ཞུས་གནང་ཡོད། མཐར་ས་རཱ་མཐོ་སློབ་གཞོན་ནུ་རུ་ཁག་ནས་མཐུན་འགྱུར་རོགས་རམ་གང་ལེགས་གནང་བར་ཐུགས་རྗེ་ཆེ་ཞུ་དང་བཅས་ལས་འགུལ་དེ་བཞིན་ལམ་ལྷོང་ལེགས་གྲུབ་བྱུང་ཡོད་པ་མ་ཟད། ཕྱིས་སུ་ལས་འགུལ་དེ་དག་གི་བརྙན་པར་ཕྱོགས་སྒྲིག་ཞུས་པ་དག་ཁོང་རང་ཉིད་ཀྱི་སྤྱི་ཚོགས་དྲྭ་ལམ་དུ་རྒྱུད་སྤེལ་ཡང་གནང་ཡོད།