ཞྭ་མོ་ནག་པོའི་གོམ་བགྲོད་ལས་འགུལ་ཉིན་བརྒྱད་པ།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བརྒྱད་པའི་ཞོགས་པ་ཆུ་ཚོད་ ༥ པར་རྒྱུན་ཏན་ལྟར་ཞོགས་པའི་ཞལ་འདོན་སྨོན་ལམ་ཚུགས། དེ་རྗེས་གོ་སྒྲིག་ཚོགས་ཆུང་གིས་ཉིན་དེའི་བྱེད་སྒོ་ཁག་གི་སྐོར་ལ་ངོ་སྤྲོད་གསལ་བཤད་ཞུས་རྗེས་གོམ་བགྲོད་ལས་འགུལ་དེ་བཞིན་སུན་དྷར་ནཱ་གྷ་ནས་དངོས་སུ་འགོ་འཛུགས་ཀྱིས་ཆོད་སེམས་བརྟན་པོས་ཆུ་ཚོད་ ༡༡ ཙམ་རིང་སྤྱི་ལེ་ཁྱོན་ ༤༠ ལྷག་ཙམ་གོམ་བགྲོད་གནང་མཐར་ལས་འགུལ་བ་རྣམས་འགལ་རྐྱེན་སོགས་གང་ཡང་མེད་པར་ཕྱི་དྲོའི་ཆུ་ཚོད་ ༤ ཙམ་ལ་བྷི་ལ་སི་པུར་ལ་བདེ་འབྱོར་བྱུང་ཡོད་པ་དང་། དེ་སྐབས་ས་གནས་རྒྱ་གར་གྱི་གཞོན་སྐྱེས་མི་མང་ཚོས་དགའ་བསུ་ཆེན་པོ་གནང་བ་མ་ཟད། རོ་བཅུད་ལྡན་པའི་གསོལ་ཇ་ཞིག་ཀྱང་འདེགས་འབུལ་གནང་བྱུང་བ་དང་། དེ་རྗེས་གོམ་བགྲོད་ལས་འགུལ་བ་རྣམས་ནས་དགྲ་བོ་རྒྱ་དམར་སྲིད་གཞུང་གི་སྡུག་རྩུབ་དང་གཡོ་སྒྱུ་ཅན་གྱི་བཅའ་ཁྲིམས་དེར་ངོ་རྒོལ་སྐྱོན་བརྗོད་སླད་བྷི་ལ་སི་པུར་ཁྲོམ་རྭའི་ནང་ངོ་རྒོལ་སྐད་འབོད་ཀྱི་ལས་འགུལ་ཞིག་ཀྱང་སྤེལ་ཐུབ་པ་བྱུང་ཡོད། དེ་སྐབས་ས་གནས་རྒྱ་གར་མི་མང་ཚོས་ང་ཚོར་མཐུན་སྒྲིལ་དང་རྒྱབ་སྐྱོར་མཚོན་ཆེད་ཚོར་ཤུགས་ཆེན་པོས་མཉམ་ཞུགས་ཀྱིས་རྒྱ་ནག་གི་ “མི་རིགས་མཐུན་སྒྲིལ་ཁྲིམས་ལུགས་ནི་མི་རིགས་སྡེབ་གསོད་བཅའ་ཁྲིམས་རེད།” ཅེས་དང་། “རྒྱ་གར་དང་བོད་ཀྱི་མཛའ་གྲོགས་རྟག་ཏུ་བརྟན་གྱུར་ཅིག” ཅེས་ངོ་རྒོལ་སྐད་འབོད་ཀྱིས་ཁྲོམ་སྐོར་བྱས་ཏེ་གོམ་བགྲོད་པ་ཚང་མར་སྟོབས་ཤུགས་སྤར་བ་དང་། ང་ཚོའི་མཉམ་འབྲེལ་གྱི་སྙིང་སྟོབས་ཇེ་བརྟན་དུ་བཏང་།
དེ་བཞིན་ས་གནས་རྒྱ་གར་སྲིད་གཞུང་གི་ཁང་པར་གསར་འགོད་ལྷན་ཚོགས་ཤིག་ཀྱང་བསྐོངས་ཏེ། རྒྱ་དམར་སྲིད་གཞུང་གིས་བོད་ནང་དྲང་བདེན་དང་འགྲོ་བ་མིའི་ཐོབ་ཐང་གི་གནས་བབ་གང་ཡང་མེད་ཚུལ་སོགས་ཞུས་ཡོད། ང་ཚོས་བྷི་ལ་སི་པུར་གྱི་རཱཥྚ་རཱི་ཡ་ས་ཝམ་སེབ་ཀ་སང་གི་གཞོན་སྐྱེས་ཚོགས་མི་ (Rashtriya Swayamsevak Sangh youth members) དང་། ཤིབ་ཀུ་མར་ལགས། ར་ཀེ་ཤི་ལགས། རུ་པེན་དྲ་པི་ཡུ་ཤི་ལགས། པྲ་དྱུ་མན་ལགས། ར་ཧུལ་ལགས། ཀར་ཐིག་ལགས། སུ་རྱ་ལགས། མུ་ནི་ཤི་ལགས། རམ་པ་ལི་ལགས་དང་། བྷི་ལ་སི་པུར་རྒྱ་གར་མི་མང་ཡོངས་ལ་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་གནང་བར་སྙིང་ཐག་པ་ནས་ཐུགས་རྗེ་ཆེ་ཞེས་ཞུས།
ཉིན་མོ་དེར་ས་གནས་རྒྱ་གར་གྱི་གཞུང་ཁང་  (MCD Hall) ནང་ཞག་སྡོད་ངལ་གསོ་བྱས་ཏེ་གོམ་བགྲོད་ལས་འགུལ་ལེགས་གྲུབ་ཀྱིས་མཇུག་སྒྲིལ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བདུན་པ།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བདུན་པ་དེ་བཞིན་ཞོགས་པ་ཆུ་ཚོད་ ༥:༠༠ ཐོག་ནས་དབུ་འཛུགས་ཀྱིས་༧སྐུའོ་གཅུང་པོ་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་མཆོག་དགོངས་པ་རྫོགས་ནས་ཞག་ཞེ་དགུ་འཁེལ་ཡོད་སྟབས། ལས་འགུལ་བ་རྣམས་ནས་དམ་པ་དེ་ཉིད་ཀྱི་ཆེད་དུ་མ་ཎི་དང་སྨོན་ལམ་གསུང་འདོན་ཞུས་ཡོད་པ་དང་། དེ་གྲུབ་རྗེས་གོ་སྒྲིག་ཚོགས་ཆུང་གིས་དེ་ཉིན་གྱི་གོམ་བགྲོད་ལས་རིམ་ངོ་སྤྲོད་ཞུས་རྗེས་རིམ་བཞིན་གོམ་བགྲོད་ཀྱིས་སུན་ཌར་ནཱ་གྷའི་ཕྱོགས་སུ་གོམ་བགྲོད་ཞུས། དེ་རིང་གནམ་གཤིས་ཅུང་ཚ་དྲོད་སྙོམ་པས་ལས་འགུལ་བ་རྣམས་ལ་དཀའ་ཁག་ཆེ་བ་ཅང་མ་བྱུང་། དེ་ལྟར་ཕྱི་དྲོའི་ཆུ་ཚོད་ ༡༢:༣༠ ཙམ་ལ་ང་ཚོ་སུན་ཌར་ནཱ་གྷར་འབྱོར་སྐབས་དེ་གའི་གླ་གཏོང་རླངས་འཁོར་མཐུན་ཚོགས་ཀྱི་ཚོགས་མི་དང་། རླངས་འཁོར་ཆུང་ངུ་གཏོང་མཁན་གྱི་ཚོགས་མི། ས་གནས་ཀྱི་ཚོང་པ་དང་མི་མང་བཅས་ནས་གོམ་བགྲོད་ལས་འགུལ་བ་རྣམས་ལ་མེ་ཏོག་གི་ཕྲེང་བ་དང་། མེ་ཏོག་གི་འདབ་མ་གཏོར་ནས་བསུ་བ་ཟབ་རྒྱས་གནང་བྱུང་བ་དང་། དེ་བཞིན་ཀྲྀ་ཤི་ནཱ་ཆན་ཌ་དང་། ཌུར་གཱ་ཌུཏ་ (པཱ་ལུ་ཤར་མཱ་) ཊཱ་རཱ་ཆན་ཌ། བཱ་ལཱ་ཀ་རཱམ་ (ཊེཀ་ཆན་ཌ་) བཅས་ཀྱི་འགོ་ཁྲིད་འོག་ས་གནས་ཀྱི་མི་མང་ཚོས་བོད་ཀྱི་གཞོན་ནུ་ལྷན་ཚོགས་ཀྱི་ཞྭ་མོ་ནག་པོའི་གོམ་བགྲོད་ལས་འགུལ་དང་བོད་དོན་འཐབ་རྩོད་ལ་རྒྱབ་སྐྱོར་ཤུགས་ཆེའི་རྣམ་པའི་ཐོག་ནས་མཉམ་འཛོམས་གནང་བ་མ་ཟད། གོམ་བགྲོད་པ་ཚོའི་ལྷག་བསམ་དང་སྙིང་སྟོབས་ལ་བསྔགས་བརྗོད་ཀྱང་ཆེན་པོ་གནང་བྱུང་།
དེ་ནས་རིམ་སྐྱོད་ཀྱིས་ཆུ་ཚོད་གཅིག་ཙམ་གྱི་རྗེས་སུ་ང་ཚོ་ཞག་སྡོད་བྱེད་སའི་སྡོད་གནས་སུ་བདེ་འབྱོར་བྱུང་བ་དང་། དེ་རིང་ལམ་བར་དུ་དཀའ་ཚེགས་ཆེ་བ་ཅང་མ་བྱུང་སྟབས་ཞག་སྡོད་ས་ཚིགས་སུ་མགྱོགས་པོ་འབྱོར་སོང་། དགྲ་བོ་རྒྱ་དམར་སྲིད་གཞུང་གིས་བོད་དང་བོད་མིའི་སྤྱི་ཚོགས་ལ་སྡུག་རྩུབ་གཉའ་གནོན་ཇི་ལྟར་བྱས་པ་དེ་ཚོད་ཀྱིས་ལས་འགུལ་བ་རྣམས་ནི་གོམ་པ་རེ་རེ་བཞིན་སྙིང་སྟོབས་ཇེ་ཆེར་འགྲོ་བཞིན་འདུག
ལས་འགུལ་བ་རྣམས་ཉིན་གང་གོམ་བགྲོད་བྱས་ནས་ས་ཚིགས་སུ་འབྱོར་མཚམས་མ་ཇན་ཚོགས་ཆུང་ནས་དགོང་དྲོའི་ཞལ་ལག་ཐེན་ཐུག་ཞིམ་པོ་ཞིག་བཟོས་འདུག་པ་དང་། དེ་ནི་བོད་པའི་སྲོལ་རྒྱུན་གྱི་ཟས་རིགས་ཤིག་ཡིན་པས་སེམས་ངལ་གསོ་བ་དང་ལྷན་ང་ཚོའི་མེས་པོ་ཚོ་ཡང་དྲན་དུ་བཅུགས་པ་བཅས་དེ་རིང་གི་གོམ་བགྲོད་ལས་འགུལ་ལེགས་གྲུབ་ཀྱིས་མཇུག་སྒྲིལ་ཞུས་ཡོད།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་དྲུག་པ།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་དྲུག་པར་སྔ་དྲོའི་ཆུ་ཚོད་ ༥:༠༠ ཐོག་ཞལ་འདོན་དང་། དེ་སྐབས་གོ་སྒྲིག་ཚོགས་ཆུང་གིས་ལས་ཉིན་དྲུག་པའི་ལས་རིམ་སྐོར་གྱི་གསལ་བཤད་ཞུས་རྗེས། གོམ་བགྲོད་དབུ་འཛུགས་ཀྱིས་མཎྜི་ལ་མ་སླེབས་ཙམ་གྱི་ལམ་བར་ནས་གུརྡུ་ཝ་ར་དང་སིག་ཆོས་ལུགས་ཀྱི་མི་མང་གིས་ཉིན་གུང་གསོལ་ཚིགས་ལ་མགྲོན་འབོད་གནང་ནས་གོམ་བགྲོད་པ་ཚང་མར་ཟས་རིགས་དྲོན་མོ་བཟོས་ཏེ་སྣེ་ལེན་གཟབ་རྒྱས་གནང་།
དེ་རྗེས་མུ་མཐུད་གོམ་བགྲོད་ཀྱིས་ཉིན་རྒྱབ་ཆུ་ཚོད་ ༢:༠༠ ཙམ་ལ་ལས་འགུལ་བ་རྣམས་མཎྜི་ལ་འབྱོར་བ་དང་། ས་གནས་བོད་མི་དང་དཔོན་རིགས་མི་སྣ་ཁག་བཅས་ནས་སྣེ་ལེན་གང་ལེགས་གནང་། དེ་སྐབས་མཎྜི་བོད་མིའི་གཞིས་ཆགས་ལས་ཁུངས་ཀྱི་ལས་དྲུང་ལྷ་མོ་ཆོས་སྒྲོན་ལགས་དང་། མཎྜི་ས་གནས་འགོ་འཛིན་ཟུར་པ་ངག་དབང་དོན་གྲུབ་ལགས། མཎྜི་ས་གནས་འཐུས་ཚོགས་ཀྱི་ཡེ་ཤེས་རྡོ་རྗེ་ལགས་དང་བཀྲ་ཤིས་ཚེ་དབང་ལགས། བཀྲ་ཤིས་ཕུན་ཚོགས་ལགས་བཅས་མཎྜི་ས་གནས་བོད་པའི་མི་མང་ཕེབས་ཡོད་པ་དང་། མཎྜི་ཧིན་བོད་མཛའ་འབྲེལ་ཚོགས་པའི་སྐུ་ཞབས་ཌ་ནེ་ཤི་ཀུ་མར་ལགས་ཀྱིས་ཞྭ་མོ་ནག་པོའི་གོམ་བགྲོད་ལས་འགུལ་གྱི་སྐོར་ལ་གསར་འགོད་ལྷན་ཚོགས་ཤིག་ཀྱང་གོ་སྒྲིག་གནང་འདུག་པ་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མཆོག་ནས་མཎྜི་བོད་པའི་མི་མང་ལ་མི་རེ་ངོ་རེ་ནས་བོད་དོན་འཐབ་རྩོད་གནང་ཕྱོགས་དང་འབྲེལ་གཏམ་བཤད་གནང་བ་དང་། དེ་བཞིན་མཎྜི་ནང་གི་གུ་རུ་གོ་བིནྡ་སིང་གུརྡུ་ཝ་རའི་ནང་བཞུགས་གནས་གཏན་འཁེལ་གྱིས་གོམ་བགྲོད་ལས་འགུལ་གྱི་ལས་ཉིན་དྲུག་པ་ལེགས་གྲུབ་ཀྱིས་དེ་གར་མཇུག་བསྒྲིལ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་ལྔ་པ།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་ལྔ་པའི་སྔ་དྲོའི་ཆུ་ཚོད་ལྔ་པར་ཞལ་འདོན་གྲུབ་རྗེས་གོ་སྒྲིག་ཚོགས་ཆུང་གིས་ཉིན་དེའི་གོམ་བགྲོད་ལས་འགུལ་གྱི་བྱེད་སྒོའི་སྐོར་ངོ་སྤྲོད་གསལ་བཤད་ཞུས། དེ་རིང་གི་གོམ་བགྲོད་ལམ་བར་དུ་བོད་མིའི་གཞིས་ཆགས་གང་ཡང་མེད་ཀྱང་། ང་ཚོས་སྦིར་བོད་མིའི་གཞིས་ཆགས་ནས་པདྷར་བར་བོད་མིའི་རྒྱབ་སྐྱོར་ཡོད་མེད་ལ་མ་ལྟོས་པར་ཚོར་ཤུགས་དྲག་པོས་མདུན་སྐྱོད་བྱས། སྦིར་ནས་གོམ་བགྲོད་མུ་མཐུད་བྱས་རྗེས་པདྷར་ལ་མ་འབྱོར་ཙམ་དུ་གསར་འགོད་པ་ཁག་ཅིག་དང་ཐུག་འཕྲད་བྱེད་པའི་གོ་སྐབས་བྱུང་ཡོད། འདི་ནི་བོད་མི་མང་སྤྱི་འཐུས་ཚོགས་གཞོན་ཟུར་པ་ཨ་ཅརྱ་ཡེ་ཤེས་ཕུན་ཚོགས་ལགས་དང་། ཧིན་བོད་མཛའ་གྲོགས་ཚོགས་པའི་ཚོགས་མི་སྐུ་ཞབས་རཱཇ་ཐཱ་ཀུར་ལགས། ཅོན་ཏ་ར་ས་གནས་གཞོན་ནུ་ཚོགས་གཙོ་བསོད་ནམས་གཡུ་རྒྱལ་ལགས་བཅས་ཀྱི་རྒྱབ་སྐྱོར་ལ་བརྟེན་ནས་བྱུང་བ་ཞིག་རེད།
དེ་སྐབས་གོམ་བགྲོད་ལས་འགུལ་ནང་གི་གཞོན་སྐྱེས་གོམ་བགྲོད་པ་ཞིག་གིས་བཤད་དོན། ངས་ཅིའི་ཕྱིར་ཞྭ་མོ་ནག་པོའི་གོམ་བགྲོད་ལ་ཞུགས་པ་ཡིན་ཞེ་ན། གལ་ཏེ་ང་ཚོས་ང་ཚོའི་དོན་དག་ཆེད་འཐབ་རྩོད་མུ་མཐུད་དུ་མ་བྱས་ན། མི་རབས་གསར་པ་ཚོས་ང་ཚོའི་རྒྱལ་ཁབ་ཀྱི་དོན་དག་བརྗེད་ངེས་རེད། དེའི་ཕྱིར་ངས་ལས་འགུལ་འདིའི་ནང་ཞུགས་པ་ཡིན་པ་དང་། ངའི་ཕྲུ་གུ་ཚོ་མ་འོངས་པར་འདིའི་ནང་ཞུགས་ངེས་རེད། འདི་ཁོ་ཚོའི་མིག་དཔེར་གྱུར་པ་དང་། ང་ཚོས་སྤོབས་པ་བྱེད་དགོས་པ་ཞིག་ཆགས་ཡོད་ཅེས་གོམ་བགྲོད་པ་ཚོར་སེམས་འགུལ་ཐེབས་པའི་བཀའ་མོལ་ཞིག་གིས་ང་ཚོ་ལ་ཤུགས་རྐྱེན་ཆེན་པོ་ཐེབས་སོང་།
དེ་ལྟར་ལམ་བར་དུ་དྲག་ཆར་རླུང་ཚུབ་ཇི་ལྟར་ཆེ་ནའང་གོམ་བགྲོད་ལས་འགུལ་བ་རྣམས་གོམ་བགྲོད་མཚམས་མ་བཞག་པར་སེམས་ཤུགས་དང་སྙིང་སྟོབས་ཆེན་པོས་མུ་མཐུད་གོམ་བགྲོད་ཀྱིས་པདྷར་ཞེས་པར་བདེ་འབྱོར་གྱིས་ལས་ཉིན་ལྔ་པའི་གོམ་བགྲོད་ལས་འགུལ་ལེགས་གྲུབ་བྱུང་ནས་དེ་གར་ཞག་སྡོད་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བཞི་པ། 

ཞྭ་མོ་ནག་པོའི་ལས་འགུལ་ཉིན་བཞི་པའི་སྔ་དྲོ་ཆུ་ཚོད་ ༥:༠༠ པའི་ཐོག་གཞལ་འདོན་འགོ་བཙུགས་གྲུབ་རྗེས་གོ་སྒྲིག་ཚོགས་ཆུང་གིས་ཉིན་མོའི་དེའི་ལས་དོན་བྱེད་སྒོའི་སྐོར་ངོ་སྤྲོད་གསལ་བཤད་ཞུས།
ཆུ་ཚོད་ ༩:༣༠ ཙམ་ལ་དབུས་རྒྱུན་ཟུར་པ་དང་བིར་ས་གནས་འཐུས་ཚོགས་ཀྱི་ཚོགས་གཙོ་ཚེ་དབང་རབ་རྒྱས་ལགས་དང་། བིར་ས་གནས་མགོ་འཛིན་མཆོག ཅིན་ཏ་ར་ས་གནས་མགོ་འཛིན་མཆོག བིར་ས་གནས་གཞོན་ནུ། ཅོན་ཏ་ར་ས་གནས་གཞོན་ནུ། ཅོན་ཏ་ཟབ་གསང་ཆོས་འཁོར་གླིང་དགོན་པ་བཅས་ཀྱིས་གྷ་ཊ་མན་ཏྲི་འི་ས་མཚམས་སུ་དགའ་བསུའི་སྣེ་ལེན་གཟབ་རྒྱས་ཞུས། ལྷག་པར་དུ་ཅོན་ཏ་ར་ས་གནས་གཞོན་ནུའི་ཚོགས་གཙོ་གཡུ་རྒྱལ་ལགས་ཀྱིས་ཞྭ་མོ་ནག་པོ་གོམ་བགྲོད་ལས་འགུལ་ཆེད་གསར་འགོད་པ་བཀོད་སྒྲིག་གནང་བར་ཐུགས་རྗེ་ཆེ་ཞུ།
བིར་ལ་འགྲོ་བའི་ལམ་བར་དུ་ནམ་ལངས་མགྲོན་ཁང་གིས་གོམ་བགྲོད་པ་ཡོངས་ལ་ཇ་མངར་མོ་དང་ཁ་ཟས་གཟབ་རྒྱས་ཕུལ། ལམ་བར་དུ་བིར་ཁྲོམ་རའི་སྡེ་དགེ་ཚོགས་པ་ནས་སྣེ་ལེན་དགའ་བསུ་ཞུས།
ཆུ་ཚོད་ ༡:༣༠ ཙམ་ལ་བིར་བོད་མིའི་གཞིས་ཆགས་སུ་འབྱོར་སྐབས་མི་མང་ནས་ཕེབས་སུ་ཟབ་རྒྱས་གནང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མཆོག་ནས་བིར་མི་མང་ལ་གསུང་བཤད་གནང་དོན་ལྟར། ང་ཚོས་རྒྱ་ནག་དམར་ཤོག་ཚོགས་པར་བརྡ་ལན་དུ་ང་ཚོས་བོད་རང་དབང་རང་བཙན་སླར་གསོ་བྱ་རྒྱུའི་འཐབ་རྩོད་མུ་མཐུད་བྱ་རྒྱུ་ཡིན་ཞེས་ལན་འདེབས་བྱེད་ཀྱི་ཡོད། དེ་ནི་མི་རབས་ནས་མི་རབས་འགོར་ནའང་བོད་དོན་འཐབ་རྩོད་མུ་མཐུད་བྱེད་རྒྱུ་མཁས་ལེན་དམ་བཅའ་གཙང་མ་ཡིན་བཅས་གསུངས།
དེ་རིང་ནི་གོམ་བགྲོད་པ་རྣམས་ཞག་བསྡོད་ས་ཚིགས་སུ་སྔོན་གྱི་ཉིན་མ་གསུམ་ལས་མགྱོགས་པ་འབྱོར་སོང་། རྒྱུ་མཚན་ཅི་ཡིན་ཞེ་ན་ང་ཚོའི་འཐབ་རྩོད་ཀྱི་བསམ་བློས་ང་ཚོ་མགྱོགས་སུ་སྐྱོད་བཅུགས། ང་ཚོའི་སེམས་པར་བོད་རང་དབང་རང་བཙན་གྱི་དམིགས་ཡུལ་གཅིག་ལ་བཅངས། དེ་རིང་གི་ལས་འགུལ་མཇུག་བསྒྲིལ། བོད་རང་བཙན་ནི་ཐག་རིང་པོ་མིན་པའི་རེ་བ་དང་ཆོད་སེམས་ཀྱིས་ལས་འགུལ་བ་རྣམས་སྙིང་སྟོབས་ཆེན་པོས་མདུན་སྐྱོད་གནང་རྒྱུར་ཇེ་མགྱོགས་ནས་ཇེ་མགྱོགས་སུ་གྱུར་བར་སྣང་བ་བཅས་ལས་ཉིན་བཞི་པ་ལེགས་གྲུབ་བྱུང་ཡོད།
བིར་ས་གནས་མགོ་འཛིན་ལས་འཁུང་དང་ཅོན་ཏ་ར་ས་གནས་མགོ་འཛིན། བིར་ས་གནས་གཞོན་ནུ་དང་ཅོན་ཏ་ར་ས་གནས་གཉིས་བཅས་ཀྱིས་གནས་ཚང་དང་དགོང་ཟས་གནང་བར་ཐུགས་རྗེ་ཆེ་ཞུ་རྒྱུ་ཡིན། ལྷག་པར་དུ་བིར་ས་གནས་འཕྲོད་བསྟེན་སྨན་ཁང་ནས་སྨན་བཅོས་སྒམ་ཆས་རང་འགྲིག་དང་། སུ་ཇ་བོད་ཁྱིམ་སློབ་ཕྲུག་རྣམས། ནམ་ལང་རི་སོར་དང་བིར་མི་མང་རྣམས་ཀྱིས་ཞལ་འདེབས་གནང་བར་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན།

བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༧ པ་སྲུང་བརྩིའི་ལས་འགུལ།

༄༅། །བོད་རྒྱལ་ལོ་ ༢༡༥༣ ཕྱི་ལོ་ ༢༠༢༦ ཟླ་བ ༣ ཚེས་ ༡༠ ཉིན་སྟེ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༧ པ་དེ་བཞིན་འདི་ག་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་གྱི་མཛད་སྒོ་ལེགས་པར་གྲུབ་རྗེས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་ལྔའི་གོ་སྒྲིག་འོག་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཀ་ཅཱ་རི་བར་མི་མང་ལས་འགུལ་བ་རྣམས་སྣེ་ཁྲིད་ཀྱིས་གསུམ་བཅུའི་དུས་དྲན་གྱི་ངོ་རྒོལ་ལས་འགུལ་སྤེལ་ཡོད་པ་དང་། དེ་བཞིན་གཞོན་ལྷན་དབུས་ས་ཟུང་འབྲེལ་གྱིས་རྒྱ་གར་རྒྱལ་ས་ལྡི་ལི་ཇར་ཏར་མན་ཏར་ངོ་རྒོལ་ལས་འགུལ་སྤེལ་ཡོད་པ་དང་སྐབས་དེར་ཧིན་བོད་མཛའ་འབྲེལ་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་མེ་ནོཇེ་ཀུ་མར་ (Dr. Manoj Kumar ji) མཆོག་ཀྱང་མཉམ་ཞུགས་ཀྱིས་དམིགས་བསལ་གསུང་བཤད་ཀྱང་གནང་ཡོད་པ་དང་། དེ་བཞིན་ལྡི་ལི་གྲོང་ཁྱེར་སྲིད་གྲོས་ཀྱི་དབུ་ཁྲིད་ཟུར་པ་ (Former MCD Member, Rakesh Kumar ji) མཆོག དགེ་རྒན་ཆེན་མོ་ལྦི་ནེ་ཀུ་མར་མཆོག Prof. Vinay Kumar BTSM. དྲ་རྒྱའི་དྲུང་ཆེ་ཇག་ཊུམ་བ་ Jagtumba Singh BTSM Media Secretary
བཅས་མཉམ་ཞུགས་གནང་ཡོད། དེ་སྐབས་བོད་ཀྱི་གཞོན་ནུ་ལྷན་ཚོགས་དང་རོ་ཧི་ནི་ས་གནས་གཞོན་ལྷན་དབུས་ས་གཉིས་ཟུང་འབྲེལ་གྱིས་དགྲ་བོ་རྒྱ་དམར་གཞུང་ཚབ་མདུན་དུ་རྒོལ་མཆོང་གི་ལས་འགུལ་སྤེལ་ནས་ལས་འགུལ་བ་རྣམས་རྒྱ་གར་ཉེན་རྟོག་པས་འཛིན་བཟུང་གིས་ཕྱི་དྲོ་བར་བཀག་ཉར་ཁང་དུ་བཅུགས། དེ་ལྟར་རྒྱ་གར་དང་ཕྱི་རྒྱལ་ཡུལ་གྲུ་ཁག་ནང་ས་གནས་གཞོན་ལྷན་ཁག་ནས་ལས་འགུལ་གོ་སྒྲིག་དང་མི་མང་སྣེ་ཁྲིད་ཀྱིས་ཕྱོགས་ཡོངས་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༧ པའི་ལས་འགུལ་དེ་བཞིན་ཤུགས་ཆེར་སྤེལ་ཐུབ་པ་བྱུང་བ་དང་། གསར་འགྱུར་རྒྱུད་ལམ་ཁག་བརྒྱུད་རྒྱལ་སྤྱིའི་སྤྱི་ཚོགས་དྲྭ་ལམ་ཁག་ཏུ་བོད་དོན་འཐབ་རྩོད་ཀྱི་ལས་འགུལ་ཁྱབ་བསྒྲགས་ཤུགས་ཆེ་འགྲོ་ཐུབ་པ་བྱུང་ཡོད།

བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་ཞུས་པའི་བོད་རང་དབང་གི་རྐང་འཁོར་སྐོར་སྐྱོད་ཅེས་པའི་ལས་འགུལ་ནང་མཉམ་ཞུགས།

ཕྱི་ལོ་ ༢༠༢༦ ཟླ་ ༢ ཚེས་ ༡༡ ཉིན། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་དང་ཚོགས་གཞོན་བཀྲ་ཤིས་རྟགས་རྒྱས་ལགས་རྣམ་གཉིས་ཀྱིས་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་གོ་སྒྲིག་བྱས་པའི་བོད་རང་དབང་ཀྱི་རྐང་འཁོར་སྐོར་སྐྱོད་ནང་མཉམ་ཞུགས་གནང་ཡོད།
རྐང་འཁོར་སྐོར་སྐྱོད་སྐབས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མཆོག་གིས་བོད་ནང་གི་འགྲོ་བ་མིའི་ཐོབ་ཐང་གནས་བབ་ཀྱི་དཀའ་ངལ་དང་། ལྷག་པར་དུ་རྒྱ་ནག་གིས་རྒྱལ་སྤྱིར་གཉའ་གནོན་གྱི་གནད་དོན་ཐད་བློ་ཚབས་ཡོད་པ་གསལ་འདོན་གནང་། དཔེར་ན་ཧོང་ཀོང་གི་དཔེ་སྐྲུན་པ་ཇི་མི་ལེ་ཡེ་ཡི་གནད་དོན་བརྗོད་པ་དང་། བོད་ནང་དུ་བཙན་འགེལ་བྱས་པའི་རྒྱ་བསྒྱུར་གྱི་སྲིད་བྱུས་ཀྱིས་བོད་ཀྱི་ཆོས་དང་རིག་གཞུང་། ངོ་བོ་དང་བཅས་པར་ཉེན་ཁ་བཟོ་བཞིན་པ་ནན་བཤད་གནང་ཡོད། དེ་བཞིན་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ནི་ཆོས་ཕྱོགས་ཀྱི་གནད་དོན་ཞིག་ཡིན་པ་དང་། ཆབ་སྲིད་ཅན་དུ་བསྒྱུར་མི་རུང་བ་གསུངས་ཡོད། ༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་དང་འབྲེལ་བའི་གནད་དོན་ཐོག་ཕྱི་ལོ་ ༢༠༢༥ ལོའི་ཟླ་ ༧ ཚེས་ ༢ ཉིན་གསལ་བསྒྲགས་གནང་ཡོད་པ་དེར་ཐའེ་ཝན་གཞུང་ཕྱོགས་ནས་རྒྱབ་སྐྱོར་གནང་རོགས་ཞེས་དང་། མཇུག་བསྡོམས་སུ་བོད་དང་ཧོང་ཀོང་། ཤར་ཏུར་ཀིསི་ཐན། ལྷོ་སོག་བཅས་རྒྱ་ནག་དམར་ཤོག་ཚོགས་པའི་དབང་སྒྱུར་འོག་ནས་ཉིན་ཞིག་རང་དབང་རང་བཙན་ཐོབ་རྒྱུའི་རེ་བ་ཡོད་པའང་གསུངས་ཡོད།
གསུང་བཤད་འདི་ཉིད་ཀོན་ཝེ་ནན་སྲུང་སྐྱོབ་ཀྱི་འགན་འཛིན་སྐུ་ཞབས་ཧོང་ཡི་བེ་ཡིས་བོད་སྐད་དུ་བསྒྱུར་ཡོད།
སྐོར་སྐྱོད་འདིའི་ནང་ད་དུང་གསུང་བཤད་གནང་མཁན་གཞན་དག་ནི།
• ལིན་ཤིན་ཡི། འཆི་བའི་ཉེས་ཆད་མེད་པ་བཟོ་བའི་ཐའེ་ཝན་མནའ་འབྲེལ་གྱི་འགན་འཛིན།
• བཀྲ་ཤིས་ཚེ་རིང་། བོད་དང་ཐའེ་ཝན་ཀྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གསར་འཛུགས་གནང་མཁན།
• སི་ཀི་ཧོང་། ཧོང་ཀོང་ཕྱི་རྒྱལ་བའི་དྲུང་ཆེ།
• ཏོང་ཧྥུ། ཐའེ་ཝན་ནང་གི་ཧོང་ཀོང་བཙན་བྱོལ་བ་ཞིག
• ཀའོ་ཆེང་ཡུང་། དཔལ་འབྱོར་དམངས་གཙོའི་མནའ་འབྲེལ་གྱི་ཉམས་ཞིབ་པ་བཅས་ཡོད།
གསུང་བཤད་པ་ཚང་མས་བོད་དང་ཧོང་ཀོང་། ཤར་ཏུར་ཀིསི་ཐན། ལྷོ་སོག་ཡུལ་བཅས་ལ་རྒྱབ་སྐྱོར་གྱི་རྣམ་པ་ཤུགས་ཆེ་བསྟན་པ་དང་། ཐའེ་ཝན་རང་དབང་ཡོང་བར་དམ་བཅའ་བསྐྱར་ནན་གནང་ཡོད། བོད་ཀྱི་རང་དབང་རྐང་འཁོར་སྐོར་སྐྱོད་འདི་མཐུན་སྒྲིལ་དང་། གཞོགས་འདེགས། རང་དབང་དང་འགྲོ་བ་མིའི་ཐོབ་ཐང་གི་འབོད་སྒྲ་མཉམ་སྒྲོག་དང་བཅས་མཇུག་བསྒྲིལ་གང་ལེགས་བྱུང་ཡོད།

རྒྱ་དམར་སྲིད་གཞུང་གིས་ངོས་འཛིན་བྱས་པའི་རྒྱལ་མཚན་ནོར་བུར་ལན་འདེབས་བསྒྲགས་གཏམ།

 

ཕྱི་ལོ་ ༢༠༢༥ ཟླ་ ༡༢ ཚེས་ ༡༢ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་དུ་ཉེ་ཆར་གཞིས་ཀ་རྩེ་ལ་རྒྱ་ནག་གཞུང་གིས་བསྐོ་བཞག་བྱས་པའི་རྒྱལ་མཚན་ནོར་བུ་ཡིས་མ་འོངས་པར་༧གོང་ས་མཆོག་གི་ཡང་སྲིད་ངོས་འཛིན་དེ་རྒྱ་ནག་གཞུང་གི་ཁྲིམས་ལུགས་གཞིར་བཟུང་བྱེད་དགོས་ཚུལ་བརྗོད་པ་དེར་ངོ་རྒོལ་གྱི་བསྒྲགས་གཏམ་ཞིག་སྤེལ་ཡོད།

Rebuttal statement (Tib)      Rebuttal statement (Eng) 

 

 

 

 

བོད་ཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ།

བོདཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ།

 

རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མ་ོདང་། བོད་མིའི་་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ མཆོག་ལ་ནོ་བལ་ཞི་བདེའི་གཟེངས་རྟགས་འབུལ་བཞེས་མཛད་པའི་ཉིན་མོའ་དུས་དྲན་སྲུང་བརྩི་འི་བསྒྲགས་གཏམ།

དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཐེངས་ ༧༧ པ་སྲུང་བརྩི་ཞུ་བའི་ཉིན་མོ་ཡིན་པ་དང༌། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་དྲན་ཉིན་མོ་ཐེངས་ ༣༦ པ་སྲུང་བརྩི་ཞུ་བའི་ལོ་རྒྱུས་རང་བཞིན་ཅན་གྱི་གལ་ཆེའི་ཉིན་མོ་ཞིག་ཡིན། འཛམ་གླིང་དམག་ཆེན་དང་པོ་དང་གཉིས་པ་བརྒྱུད་རྒྱལ་ཁབ་དང་མིའི་རིགས་ལ་དཀའ་སྡུག་ཚད་ལས་བརྒལ་བ་ཞིག་བྱུང་བར་བརྟེན་ཕྱི་ལོ་ ༡༩༤༨ ཟླ་ ༡༢ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ནས་འགྲོ་བ་མིའི་གཞི་རྩའི་ཐོབ་ཐང་སྲུང་སྐྱོབས་ཐད་རྩ་དོན་འཛིན་པའི་རྒྱལ་སྤྱིའི་རང་བཞིན་གྱི་དོན་ཚན་ ༣༠ ཅན་གྱི་ཡིག་ཆ་ཞིག་བཞག་ཡོད་པ་དེ་ནས་བཟུང་དུས་ཚིགས་དེར་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་གཏན་འབེབས་བྱུང་ཡོད། དེ་བཞིན་རྒྱ་དམར་སྲིད་གཞུང་གིས་བོད་དུ་དྲག་པོས་བཙན་བཟུང་བྱས་ནས་བོད་དང་བོད་མིར་དཀའ་སྡུག་ཚད་ལས་བརྒལ་བ་སྤྲད་པར་བརྟེན། བོད་དང་བོད་མིའི་བདེ་སྡུག་སེལ་སླད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འཚེ་མེད་ཞི་བའི་ལྟ་གྲུབ་ཀྱི་ཐོག་ནས་བོད་དོན་བདེན་པའི་འཐབ་རྩོད་གནང་བ་དང༌། ལྷག་པར་འཛམ་གླིང་ཞི་བདེ་ཡོང་སླད་རིས་མེད་སྐྱེ་འགྲོ་ཐམས་ཅད་ལ་བྱམས་པ་དང་བརྩེ་བས་ཕན་བདེའི་མཛད་པ་རླབས་ཆེན་བསྐྱངས་དང་སྐྱོང་བཞིན་པར་བརྟེན། ཕྱི་ལོ་ ༡༩༨༩ ཟླ་ ༡༢ ཚེས་ ༡༠ ཉིན་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ད་བར་ལོ་ ༣༦ ཧྲིལ་པོ་འཁོར་བཞིན་ཡོད་སྟབས་དུས་ཚིགས་འདི་གཉིས་ཀྱི་རྒྱབ་ལྗོངས་ན་ཧ་ཅང་ཡ་ང་ཞིང་ཡིད་སྐྱོ་དགོས་པའི་ལོ་རྒྱུས་ཡུན་རིང་ལྡན་པའི་གལ་ཆེའི་ཉིན་མོ་ཞིག་ཡིན་པ་རྗེས་སུ་དྲན་པའི་སྒོ་ནས་དེ་རིང་གི་གལ་ཆེའི་དུས་དྲན་ཉིན་མོ་འདི་སྲུང་བརྩི་ཞུ་རྒྱུ་ཡིན།

རྒྱ་དམར་སྲིད་གཞུང་གིས་བོད་དུ་དྲག་པོའི་བཙན་འཛུལ་བྱས་པ་ནས་བཟུང་བོད་མི་ས་ཡ་གཅིག་ལྷག་དམར་གསོད་བཏང་ཟིན་པ་དང༌། བོད་པའི་ཆོས་དང་རིག་གཞུང་སློབ་གཉེར་བྱེད་སའི་བསྟི་གནས་བོད་མདོ་དབུས་ཁམས་གསུམ་གྱི་དགོན་སྡེ་གྲྭ་ཚང་ཆེ་ཁག་རྩ་གཏོར་དང་གཏོར་བཤིག་ཚབས་ཆེན་བཏང་ཡོད་པ་མ་ཟད། བོད་ཀྱི་ཆོས་དང་རིག་གཞུང༌། ཡུལ་སྲོལ་གོམས་གཤིས་དང་བཅས་པ་རྩ་མེད་བཟོ་ཆེད་བོད་ཕྲུག་རྣམས་རང་གི་ཕ་མ་དང་ཁ་བྲལ་དུ་བཏང་ནས་བཅའ་སྡོད་སློབ་གྲྭ་ཁག་ལ་བཙན་འཇུགས་ཀྱིས་དམར་ཤོག་གི་ལྟ་བ་དང་སློབ་གསོ་བཙན་ཁྲིད་བྱས་མི་རིགས་ཀྱི་ངོ་བ་སྒྱུར་བའི་སྲིད་བྱུས་སྤེལ་ནས་སྡུག་སྦྱོང་མནར་གཅོད་བཏང་དང་གཏོང་བཞིན་ཡོད། དེ་བཞིན་བོད་ནང་གི་འགྲོ་བ་མིའི་ཐོབ་ཐང་གནས་བབ་ལ་རྩིས་མེད་རྡོག་རོལ་གྱིས་ཉེས་མེད་འཛིན་བཟུང་བཙོན་འཇུག་བྱས་པའི་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གི་གཙོས་བོད་ནང་གི་ཆབ་སྲིད་བཙོན་པ་རྣམས་ལ་སྡུག་སྦྱོང་མནར་གཅོད་དང༌བོད་མིའི་རིགས་རྫས་བསྡུ་ལེན། ཆོས་དད་རང་དབང༌སྨྲ་བརྗོད་རང་དབང༌། བོད་སྐད་ཡིག་སྦྱོང་སྤྱོད་སྤེལ་གསུམ་གྱི་རང་དབང༌། འགྲོ་འདུག་གི་རང་དབང་སོགས་མེད་པར་ཉིན་མཚན་དུས་དྲུག་ཏུ་དམ་དྲག་སྲིད་བྱུས་འོག་བོད་མི་རྣམས་དཀའ་སྡུག་ཚད་མེད་མྱངས་དང་མྱོང་བཞིན་ཡོད། དེར་བརྟེན་བོད་ཕྱི་ནང་གཉིས་ནས་ད་བར་བོད་མི་རྒྱལ་གཅེས་དཔའ་བོ་དཔའ་མོ་གྲངས་ ༢༠༠ མ་ཟིན་ཙམ་གྱིས་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་ཡོངས་སུ་བློས་གཏོང་གིས་རང་ལུས་མེར་སྲེག་ཀྱང་བཏང་ཡོད། འདི་ནི་འཛམ་གླིང་རྒྱལ་སྤྱིའི་ཐོག་རང་དབང་རང་བཙན་དང་དྲང་བདེན་གྱི་ཆེད་རང་ལུས་མེར་སྲེག་གནང་མཁན་གྲངས་འབོར་མང་ཤོས་ཀྱི་མི་རིགས་ཤིག་ཡིན།

ཡང་སྒོས་བོད་མདོ་དབུས་ཁམས་གསུམ་གྱི་ས་ཁུལ་འདྲ་མིན་ནང་གཏེར་ཁ་སྔོག་འདོན་དང་། ཤིང་ནག་གཅོད་བྲེགས། ཆུ་མཛོད་གསར་རྒྱག་གཙང་ཆུ་ཁ་སྒྱུར། གློག་ཁང་འཛུགས་སྐྲུན། རྡུལ་ཕྲན་ཚོན་ཆའི་བཟོ་གྲྭ་སོགས་འཛུགས་སྐྲུན་ཚོད་མེད་བྱས་ཏེ་བོད་ཀྱི་རྩ་ཆེའི་ལོ་རྒྱུས་རང་བཞིན་ཅན་གྱི་གནས་རི་དང་ཡུལ་ལུང་ཁག་ལ་གཏོར་བཤིག་དང༌། རྡབ་གསིགས་ཚབས་ཆེན་བཏང་བ་སོགས་ལ་བརྟེན་བོད་མཐོ་སྒང་གི་སྐྱེ་ཁམས་ཁོར་ཡུག་ལ་འགྱུར་བ་ཆེན་པོ་ཕྱིན་ཏེ་ད་ཆ་བོད་ཀྱི་ཁྱིམ་མཚེས་རྒྱལ་ཁབ་ཁག་དང་ཧི་མ་ལ་ཡའི་རི་རྒྱུད་དུའང་འབྱུང་བཞིའི་གོད་ཆགས་ཚབས་ཆེ་བྱུང་ནས་ཨེ་ཤེ་ཡའི་མི་མང་ས་ཡ་མང་པོའི་འཚོ་གནས་ལ་དཀའ་ངལ་སྤྲད་དང་སྤྲོད་མུས་ཡིན་པ་དེ་རེད། རྒྱ་དམར་སྲིད་གཞུང་གིས་མཉམ་འབྲེལ་རྒྱལ་ཚོགས་གཙོ་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚན་པ་ཁག་ལ་རྩིས་མེད་རྡོག་རོལ་དང་རྒྱལ་སྤྱིའི་ཁྲིམས་དང་འགལ་བའི་ཐོག་བོད་མི་གཙོ་བྱས་པའི་ཡུ་གུར་དང༌། ཧོང་ཀོང༌། ལྷོ་སོག་མི་རིགས་ལ་རྒྱལ་མཚམས་ལས་བརྒལ་བའི་དྲག་མནོན་སྲིད་བྱུས་འོག་དངོས་ཤུགས་བརྒྱུད་གསུམ་ནས་རྒྱལ་སྤྱིའི་སྤྱི་ཚོགས་ནང་མིའི་གསང་ཉུལ་བཏང་ནས་ལྐོག་གསོད་དང་དཀྲུག་རྐྱེན་བཟོ་བ། དྲྭ་ཐོག་ནས་གསང་འཛུལ་གྱིས་རྒྱལ་ཁབ་དང་ཚོགས་སྒེར་ཁག་གི་གསང་བ་དང་ཡིག་ཆ་རྐུ་འཁྱེར་བྱས་དང་བྱེད་མུས་ཀྱིས་བཙན་བྱོལ་བོད་མིའི་སྤྱི་ཚོགས་ཙམ་མ་ཟད། རྒྱལ་སྤྱིའི་སྤྱི་ཚོགས་ཀྱི་ཞི་བདེ་དང་དྲྭ་རྒྱའི་བདེ་འཇགས་སོགས་ལ་ཉེན་ཁ་ཚབས་ཆེན་བཟོ་མུས་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་སྐུ་འཁོར་བཀའ་ཤག་དང་བཅས་བོད་མི་རྣམས་བཙན་བྱོལ་དུ་ཕེབས་མ་ཐག་པ་ནས་བཟུང་། བོད་དང་བོད་མིའི་ཛ་དྲག་གི་གནས་བབ་རྒྱལ་སྤྱིའི་མཉམ་འབྲེལ་རྒྱལ་ཚོགས་དང༌འགྲོ་བ་མིའི་ཐོབ་ཐང་ཚན་པ་ཁག་དེ་བཞིན་སྲིད་གཞུང་དང་གྲོས་ཚོགས་ཁག་བཅས་པར་ཞུ་གཏུགས་ལས་འགུལ་རིམ་པར་སྤེལ་ཏེ་ད་བར་ལོ་ངོ་ ༦༦ ལྷག་འགྲོ་བཞིན་ཡོད་མོད། དེང་སྐབས་རྒྱལ་སྤྱིའི་སྤྱི་ཚོགས་ནང་འགྲོ་བ་མིའི་ཐོབ་ཐང་དང་། རང་དབང་དང་ཞི་བདེ་འཆམ་མཐུན་བཅས་གཙིགས་ཆེར་འཛིན་པའི་སྐབས་དེར་རྒྱ་དམར་སྲིད་གཞུང་གི་སྡུག་རྩུབ་ཅན་གྱི་སྲིད་བྱུས་འོག་བོད་ནང་གི་བོད་མི་རྣམས་ཀྱི་གནས་བབ་དང༌། རིག་གཞུང་དང་ཆབ་སྲིད་ཀྱི་གནས་བབ། འགྲོ་བ་མིའི་ཐོབ་ཐང་གི་གནས་བབ། བོད་ཀྱི་ཁོར་ཡུག་གི་གནས་བབ་སོགས་ལོ་རེ་ནས་ལོ་རེར་ཇེ་སྡུག་ཇེ་ཞན་དང་། ཧ་ཅང་ཛ་དྲག་ཏུ་འགྲོ་བཞིན་ཡོད་སྟབས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཇི་སྲིད་བོད་རང་དབང་རང་བཙན་མ་ཐོབ་ཀྱི་བར་དེ་སྲིད་དུ་དགྲ་རྒྱ་དམར་སྲིད་གཞུང་ལ་ཁ་གཏད་གདོང་ལེན་མཐའ་གཅིག་ཏུ་བྱས་ཏེ་གཞི་རྒྱ་ཆེ་བའི་ལས་འགུལ་སྔར་ལྷག་ནུས་ཤུགས་ལྡན་པ་སྤེལ་རྒྱུ་ཡིན་ཞེས་ནན་བརྗོད་བྱེད་རྒྱུ་ཡིན།

དམིགས་བསལ་བོད་ནང་གི་ཛ་དྲག་གནས་བབ་ཡིད་ལ་བཟུང་ཐོག་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་སྤྱི་སྒེར་ཡོངས་ནས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན གོ་སྐབས་དམ་འཛིན་གྱིས་ཆབ་སྲིད་ཀྱི་ལྟ་བ་ལངས་ཕྱོགས་ཇི་ལྟར་ཡིན་མིན་ལ་མ་ལྟོས་པར་རང་རེའི་བཙན་བྱོལ་བོད་མི་རྣམས་རྡོག་རྩ་གཅིག་སྒྲིལ་གྱིས་བོད་དོན་འཐབ་རྩོད་ཀྱི་ལས་འགུལ་སྔར་ལྷག་སྤེལ་ཤུགས་ཇེ་ཆེར་གཏོང་དགོས་པ་དང༌། ལྷག་པར་སྤྱི་ཚོགས་ནང་ཆབ་སྲིད་ཀྱི་འཁྲུག་ཆ་ཆེ་བའི་དུས་སྐབས་སུ་བོད་མི་སྤྱི་སྒེར་ཚང་མས་རང་འགན་རང་འཁུར་གྱིས་ཕྱི་ནང་དང་དགྲ་གཉེན་ངོ་ཤེས་པའི་ཐོག་ཇི་སྲིད་བོད་དོན་བདེན་མཐའ་མ་སེལ་བར་དེ་སྲིད་རང་མི་རིགས་ཀྱི་རྩ་ཆེའི་རིག་གཞུང་དེ་དག་མི་ཉམས་རྒྱུན་འཛིན་དང༌། བོད་དོན་འཐབ་རྩོད་ཀྱི་ནུས་པ་རྒྱུན་གནས་ཐུབ་རྒྱུར་འབད་བརྩོན་སྔར་ལྷག་གནང་དགོས་རྒྱུ་མ་ཟད་དེང་འདིར་གཞིས་བྱེས་བོད་མི་ཡོངས་རྫོགས་སྡུག་ན་མཉམ་སྡུག་དང༌། སྐྱིད་ན་མཉམ་སྐྱིད་ཡིན་པའི་འདུ་ཤེས་གཏིང་ཟབ་འཛིན་པའི་ཐོག་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་སྤྱི་སྒེར་ཚང་མས་འགན་འཁུར་དགོངས་བཞེས་ཀྱིས་རྡོག་རྩ་གཅིག་སྒྲིལ་དགོས་རྒྱུར་དྲན་སྐུལ་ཞུ་རྒྱུ་ཡིན། ལྷག་པར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པ་གཙོ་བྱས་པའི་རྒྱལ་སྤྱིའི་སྲིད་གཞུང་དང་གྲོས་ཚོགས་འཐུས་མི་རྣམ་པ། འགྲོ་བ་མིའི་ཐོབ་ཐང་ཚན་པ་ཁག། དེ་བཞིན་བོད་དོན་རྒྱབ་སྐྱོར་བ་ཚོགས་སྒེར་ཁག། མང་གཙོ་དང་རང་དབང་དོན་གཉེར་བ་ཁག་བཅས་ནས་འཛམ་གླིང་གི་ཁོར་ཡུག་དང༌། འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་སླད་འགན་འཁུར་དགོངས་བཞེས་ཀྱིས་སྔར་ལྷག་རྒྱ་དམར་སྲིད་གཞུང་ལ་གནོན་ཤུགས་དང་བོད་དོན་བདེན་པའི་འཐབ་རྩོད་ཐད་རྒྱབ་སྐྱོར་མུ་མཐུད་གནང་སྐྱོང་ཡོང་བའི་འབོད་སྐུལ་ཤུགས་དྲག་ཞུ་རྒྱུ་ཡིན།

མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང༌། གཞིས་བྱེས་བོད་མི་མཉམ་འཛོམས་ཀྱིས་རང་དབང་རང་བཙན་གྱི་ཉི་མ་མགྱོགས་ནས་མྱུར་དུ་འཆར་བའི་བཀྲ་ཤིས་སྨོན་འདུན་གྲངས་མེད་དང་བཅས། །

བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས།

བོད་རྒྱལ་ལོ་ ༢༡༥༢ ཕྱི་ལོ་ ༢༠༢༥ ཟླ་ ༡༢ ཚེས་ ༡༠ ཉིན།

བོད་ཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ། 10 December Press ststement (English) तिब्बती युवा कांग्रेस की वक्तव्य । 稿子12.10

༸རྒྱལ་བའི་བཀའ་དྲིན་རྗེས་དྲན་གྱི་བསྒྲགས་གཏམ།

༸རྒྱལ་བའི་བཀའ་དྲིན་རྗེས་དྲན་གྱི་བསྒྲགས་གཏམ།

 དེ་རིང་ནི་བོད་ཀྱི་ལོ་རྒྱུས་ནང་ཧ་ཅང་བརྗེད་དུ་མེད་པའི་གལ་ཆེའི་ཉིན་མོ་ཞིག་ཡིན། ལྕགས་སྟག་ཕྱི་ལོ་ ༡༩༥༠ ལོར་བོད་ཤར་ཕྱོགས་ཆབ་མདོ་ཁུལ་དུ་དགྲ་བོ་རྒྱ་དམར་སྲིད་གཞུང་གི་དྲག་པོའི་དམག་གིས་གནམ་ས་གཉིས་ནས་ཁྲིམས་འགལ་གྱིས་བཙན་འཛུལ་བྱས་ཏེ་བོད་ཀྱི་ཆབ་སྲིད་གནས་བབ་ཧ་ཅང་ཛ་དྲག་འོག་གནས་དགོས་བྱུང་ཡོད་པ་དང་། དེ་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བཅུ་དྲུག་ལས་མ་ཕེབས་ཀྱང་བོད་ལྗོངས་ལྷ་མི་ཡོངས་ཀྱི་རེ་འདུན་ལྟར་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་ལུགས་གཉིས་ཆབ་སྲིད་ཀྱི་ཐུགས་འགན་བསྐྱེད་བཞེས་མཛད་དེ་ལོ་ངོ་ ༧༥ ཧྲིལ་པོ་འཁོར་བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་སའི་རྒྱུན་ལས་ཚོགས་མི་ཡོངས་ནས་དགའ་དད་སྤྲོ་གསུམ་གྱིས་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་སྦྲགས། ༸མགོན་པོ་གང་ཉིད་མཆོག་ནས་བོད་མི་རིགས་དང་རྒྱལ་ཁབ། ཆོས་དང་རིག་གཞུང་སོགས་བསྲུང་སྐྱོབ་ཀྱི་ཆེད་དབུ་ཁྲིད་ཀྱི་མཛད་འགན་རླབས་པོ་ཆེ་བཞེས་གནང་མཛད་པར་ཐུགས་རྗེ་བཀའ་དྲིན་བླ་མེད་དུ་ཆེ། ཆེ། ཆེ་ཞེས་ཞུ་རྒྱུ་དང་།

ཉིན་མོ་འདི་ནས་བཟུང་༸མགོན་པོ་གང་ཉིད་མཆོག་ནས་ཐུགས་དམ་བླ་ན་མེད་པ་བསྐྱེད་བཞེས་ཀྱིས་སྤྱིར་སྐྱེ་འགྲོ་ཡོངས་དང་། ཡང་སྒོས་བོད་བསྟན་སྲིད་མི་རིགས་རིག་གཞུང་དང་བཅས་པ་སྣུམ་ཟད་ཀྱི་མར་མེ་ལྟར་གྱུར་བའི་ཧ་ཅང་ཡ་ང་ཞིང་ཡིད་སྐྱོ་དགོས་པའི་ཛ་དྲག་གི་གནས་བབ་ལས་སྐྱོབ་གནང་མཛད་པ་ནི་བོད་མི་རིགས་ཀྱི་ལོ་རྒྱུས་ནང་སྔར་བྱུང་མྱོང་མེད་པའི་ལོ་རྒྱུས་རང་བཞིན་གྱི་གལ་ཆེའི་ཉིན་མོ་ཞིག་ཡིན་པ་དང་། བོད་མི་ཡོངས་ཀྱིས་ནམ་ཡང་བརྗེད་ཐབས་མེད་པའི་ཉིན་མོ་ཞིག་ཡིན་པ་མ་ཟད་ཁོང་གི་ཐུགས་རྗེ་བཀའ་དྲིན་རྗེས་སུ་དྲན་དགོས་པའི་ཉིན་མོ་ཞིག་ཀྱང་ཡིན།

མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གསང་གསུམ་མཛད་འཕྲིན་མཐའ་ཡས་པའི་བཀའ་དྲིན་རྗེས་སུ་དྲན་པའི་སྒོ་ནས་༸མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་དགོངས་ཡོངས་སུ་རྫོགས་ནས་གཞིས་བྱེས་བོད་མི་ཡོངས་རྫོགས་མཉམ་འཛོམས་ཀྱི་ཉིན་མ་མགྱོགས་ནས་མྱུར་དུ་འཆར་བའི་བཀྲ་ཤིས་སྨོན་འདུན་གྲངས་མེད་དང་བཅས། །

བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་ནས།

བོད་རྒྱལ་ལོ་ ༢༡༥༢ ཕྱི་ལོ་ ༢༠༢༥ ཟླ་ ༡༡ ཚེས་ ༡༧ ཉིན།

 

 

Back To Top