དེ་རིང་ནི་ཆར་པ་ཤུགས་ཆེ་བབས་པའི་རྐྱེན་གྱིས་གོམ་བགྲོད་པ་རྣམས་སྔར་རྒྱུན་བཞིན་ཞོགས་པ་སྔ་པོར་ཐོན་མ་ཐུབ་པར་ལས་འགུལ་འགོ་འཛུགས་ཅུང་ཙམ་ཕྱི་པོ་ཆགས་སོང་། འོན་ཀྱང་སྔར་རྒྱུན་བཞིན་ཞོགས་པའི་སྨོན་ལམ་གསུང་འདོན་ཞུས། དེ་རྗེས་གོ་སྒྲིག་ཚོགས་ཆུང་གིས་དེ་ཉིན་ལས་འགུལ་གྱི་འཆར་གཞི་སྐོར་ལ་གསལ་བཤད་བྱས།

ཆར་པ་ཅུང་ཆད་མཚམས་གོམ་བགྲོད་ལས་འགུལ་བ་རྣམས་བིལ་སི་པུར་ནས་ཕྱོགས་ཐོན་གྱིས་སྤྱི་ལེ་ ༣༨ ཙམ་གྱི་རིང་གོམ་བགྲོད་ཀྱིས་ཀི་ར་ཏི་པུར་ས་ཧིབ་བར་མུ་མཐུད་དེ་འགྲོ་མགོ་བཙུགས། ཞྭ་མོ་ནག་པོའི་གོམ་བགྲོད་ཀྱི་ཉིན་དགུ་པའི་སྐབས་སུ་གོམ་བགྲོད་པ་ཚོའི་ཆོད་སེམས་དང་སེམས་ཤུགས་ཆེན་པོས་གནམ་གཤིས་ཇི་ལྟར་ཡོད་མིན་ལ་མ་ལྟོས་པར་མུ་མཐུད་མདུན་སྐྱོད་གནང་མཐར་ཕྱི་དྲོའི་ཆུ་ཚོད་ ༢:༣༠ ཙམ་ལ་ཀི་ར་ཏི་པུར་ས་ཧིབ་ཀྱི་ཤིབ་དང་རམ་མཎྜིར་དུ་འབྱོར་ཞིང་། རས་སི་ཡི་ཨ་ཤྲི་ཇོ་ཤི་ཇི་དང་ཀུ་མར་ཇི་སོགས་ཀྱི་སྣེ་ཁྲིད་འོག དྲོ་སྐྱིད་དང་ལྡན་པའི་ངང་ཕེབས་བསུ་གང་ལེགས་གནང་བྱུང་། དེ་སྐབས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ནས་གསར་འགོད་པ་དང་བརྒྱུད་ལམ་ཁག་ལ་ཞྭ་མོ་ནག་པོའི་གོམ་བགྲོད་ལས་འགུལ་གྱི་དམིགས་ཡུལ་དང་སྙིང་སྟོབས་སྐོར་ལ་གསུང་བཤད་གནང་།

ང་ཚོས་བོད་རང་བཙན་ཐོབ་པའི་ཉིན་མོ་ཞིག་འོང་བར་ཡིད་ཆེས་བརྟན་པོ་དང་བཅས་རྒྱ་དམར་སྲིད་གཞུང་ལ་ངོ་རྒོལ་སྐད་འབོད་ཤུགས་ཆེན་བྱས་ཤིང་། ལས་འགུལ་བ་རྣམས་དོ་ནུབ་ཤིབ་མཎྜིར་དུ་ངལ་གསོ་རྒྱག་རྒྱུ་ཡིན་ལ། རྒྱ་གར་གྱི་ལྷ་དབང་ཕྱུག་གི་བྱིན་རླབས་གནང་བར་བཀའ་དྲིན་ཆེ་ཞུ་རྒྱུ་མ་ཟད། དེ་རིང་རེས་གཟའ་ལྷག་པ་ཡིན་སྟབས་དགོང་མོའི་ཞལ་དེ་བཞིན་དཀར་ཟས་སྟབས་བདེ་ཞིག་དང་བཅས་དེ་རིང་གི་གོམ་བགྲོད་ལས་འགུལ་ལེགས་གྲུབ་ཀྱིས་མཇུག་བསྒྲིལ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བརྒྱད་པའི་ཞོགས་པ་ཆུ་ཚོད་ ༥ པར་རྒྱུན་ཏན་ལྟར་ཞོགས་པའི་ཞལ་འདོན་སྨོན་ལམ་ཚུགས། དེ་རྗེས་གོ་སྒྲིག་ཚོགས་ཆུང་གིས་ཉིན་དེའི་བྱེད་སྒོ་ཁག་གི་སྐོར་ལ་ངོ་སྤྲོད་གསལ་བཤད་ཞུས་རྗེས་གོམ་བགྲོད་ལས་འགུལ་དེ་བཞིན་སུན་དྷར་ནཱ་གྷ་ནས་དངོས་སུ་འགོ་འཛུགས་ཀྱིས་ཆོད་སེམས་བརྟན་པོས་ཆུ་ཚོད་ ༡༡ ཙམ་རིང་སྤྱི་ལེ་ཁྱོན་ ༤༠ ལྷག་ཙམ་གོམ་བགྲོད་གནང་མཐར་ལས་འགུལ་བ་རྣམས་འགལ་རྐྱེན་སོགས་གང་ཡང་མེད་པར་ཕྱི་དྲོའི་ཆུ་ཚོད་ ༤ ཙམ་ལ་བྷི་ལ་སི་པུར་ལ་བདེ་འབྱོར་བྱུང་ཡོད་པ་དང་། དེ་སྐབས་ས་གནས་རྒྱ་གར་གྱི་གཞོན་སྐྱེས་མི་མང་ཚོས་དགའ་བསུ་ཆེན་པོ་གནང་བ་མ་ཟད། རོ་བཅུད་ལྡན་པའི་གསོལ་ཇ་ཞིག་ཀྱང་འདེགས་འབུལ་གནང་བྱུང་བ་དང་། དེ་རྗེས་གོམ་བགྲོད་ལས་འགུལ་བ་རྣམས་ནས་དགྲ་བོ་རྒྱ་དམར་སྲིད་གཞུང་གི་སྡུག་རྩུབ་དང་གཡོ་སྒྱུ་ཅན་གྱི་བཅའ་ཁྲིམས་དེར་ངོ་རྒོལ་སྐྱོན་བརྗོད་སླད་བྷི་ལ་སི་པུར་ཁྲོམ་རྭའི་ནང་ངོ་རྒོལ་སྐད་འབོད་ཀྱི་ལས་འགུལ་ཞིག་ཀྱང་སྤེལ་ཐུབ་པ་བྱུང་ཡོད། དེ་སྐབས་ས་གནས་རྒྱ་གར་མི་མང་ཚོས་ང་ཚོར་མཐུན་སྒྲིལ་དང་རྒྱབ་སྐྱོར་མཚོན་ཆེད་ཚོར་ཤུགས་ཆེན་པོས་མཉམ་ཞུགས་ཀྱིས་རྒྱ་ནག་གི་ “མི་རིགས་མཐུན་སྒྲིལ་ཁྲིམས་ལུགས་ནི་མི་རིགས་སྡེབ་གསོད་བཅའ་ཁྲིམས་རེད།” ཅེས་དང་། “རྒྱ་གར་དང་བོད་ཀྱི་མཛའ་གྲོགས་རྟག་ཏུ་བརྟན་གྱུར་ཅིག” ཅེས་ངོ་རྒོལ་སྐད་འབོད་ཀྱིས་ཁྲོམ་སྐོར་བྱས་ཏེ་གོམ་བགྲོད་པ་ཚང་མར་སྟོབས་ཤུགས་སྤར་བ་དང་། ང་ཚོའི་མཉམ་འབྲེལ་གྱི་སྙིང་སྟོབས་ཇེ་བརྟན་དུ་བཏང་།

དེ་བཞིན་ས་གནས་རྒྱ་གར་སྲིད་གཞུང་གི་ཁང་པར་གསར་འགོད་ལྷན་ཚོགས་ཤིག་ཀྱང་བསྐོངས་ཏེ། རྒྱ་དམར་སྲིད་གཞུང་གིས་བོད་ནང་དྲང་བདེན་དང་འགྲོ་བ་མིའི་ཐོབ་ཐང་གི་གནས་བབ་གང་ཡང་མེད་ཚུལ་སོགས་ཞུས་ཡོད། ང་ཚོས་བྷི་ལ་སི་པུར་གྱི་རཱཥྚ་རཱི་ཡ་ས་ཝམ་སེབ་ཀ་སང་གི་གཞོན་སྐྱེས་ཚོགས་མི་ (Rashtriya Swayamsevak Sangh youth members) དང་། ཤིབ་ཀུ་མར་ལགས། ར་ཀེ་ཤི་ལགས། རུ་པེན་དྲ་པི་ཡུ་ཤི་ལགས། པྲ་དྱུ་མན་ལགས། ར་ཧུལ་ལགས། ཀར་ཐིག་ལགས། སུ་རྱ་ལགས། མུ་ནི་ཤི་ལགས། རམ་པ་ལི་ལགས་དང་། བྷི་ལ་སི་པུར་རྒྱ་གར་མི་མང་ཡོངས་ལ་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་གནང་བར་སྙིང་ཐག་པ་ནས་ཐུགས་རྗེ་ཆེ་ཞེས་ཞུས།

ཉིན་མོ་དེར་ས་གནས་རྒྱ་གར་གྱི་གཞུང་ཁང་  (MCD Hall) ནང་ཞག་སྡོད་ངལ་གསོ་བྱས་ཏེ་གོམ་བགྲོད་ལས་འགུལ་ལེགས་གྲུབ་ཀྱིས་མཇུག་སྒྲིལ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་བདུན་པ་དེ་བཞིན་ཞོགས་པ་ཆུ་ཚོད་ ༥:༠༠ ཐོག་ནས་དབུ་འཛུགས་ཀྱིས་༧སྐུའོ་གཅུང་པོ་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་མཆོག་དགོངས་པ་རྫོགས་ནས་ཞག་ཞེ་དགུ་འཁེལ་ཡོད་སྟབས། ལས་འགུལ་བ་རྣམས་ནས་དམ་པ་དེ་ཉིད་ཀྱི་ཆེད་དུ་མ་ཎི་དང་སྨོན་ལམ་གསུང་འདོན་ཞུས་ཡོད་པ་དང་། དེ་གྲུབ་རྗེས་གོ་སྒྲིག་ཚོགས་ཆུང་གིས་དེ་ཉིན་གྱི་གོམ་བགྲོད་ལས་རིམ་ངོ་སྤྲོད་ཞུས་རྗེས་རིམ་བཞིན་གོམ་བགྲོད་ཀྱིས་སུན་ཌར་ནཱ་གྷའི་ཕྱོགས་སུ་གོམ་བགྲོད་ཞུས། དེ་རིང་གནམ་གཤིས་ཅུང་ཚ་དྲོད་སྙོམ་པས་ལས་འགུལ་བ་རྣམས་ལ་དཀའ་ཁག་ཆེ་བ་ཅང་མ་བྱུང་། དེ་ལྟར་ཕྱི་དྲོའི་ཆུ་ཚོད་ ༡༢:༣༠ ཙམ་ལ་ང་ཚོ་སུན་ཌར་ནཱ་གྷར་འབྱོར་སྐབས་དེ་གའི་གླ་གཏོང་རླངས་འཁོར་མཐུན་ཚོགས་ཀྱི་ཚོགས་མི་དང་། རླངས་འཁོར་ཆུང་ངུ་གཏོང་མཁན་གྱི་ཚོགས་མི། ས་གནས་ཀྱི་ཚོང་པ་དང་མི་མང་བཅས་ནས་གོམ་བགྲོད་ལས་འགུལ་བ་རྣམས་ལ་མེ་ཏོག་གི་ཕྲེང་བ་དང་། མེ་ཏོག་གི་འདབ་མ་གཏོར་ནས་བསུ་བ་ཟབ་རྒྱས་གནང་བྱུང་བ་དང་། དེ་བཞིན་ཀྲྀ་ཤི་ནཱ་ཆན་ཌ་དང་། ཌུར་གཱ་ཌུཏ་ (པཱ་ལུ་ཤར་མཱ་) ཊཱ་རཱ་ཆན་ཌ། བཱ་ལཱ་ཀ་རཱམ་ (ཊེཀ་ཆན་ཌ་) བཅས་ཀྱི་འགོ་ཁྲིད་འོག་ས་གནས་ཀྱི་མི་མང་ཚོས་བོད་ཀྱི་གཞོན་ནུ་ལྷན་ཚོགས་ཀྱི་ཞྭ་མོ་ནག་པོའི་གོམ་བགྲོད་ལས་འགུལ་དང་བོད་དོན་འཐབ་རྩོད་ལ་རྒྱབ་སྐྱོར་ཤུགས་ཆེའི་རྣམ་པའི་ཐོག་ནས་མཉམ་འཛོམས་གནང་བ་མ་ཟད། གོམ་བགྲོད་པ་ཚོའི་ལྷག་བསམ་དང་སྙིང་སྟོབས་ལ་བསྔགས་བརྗོད་ཀྱང་ཆེན་པོ་གནང་བྱུང་།

དེ་ནས་རིམ་སྐྱོད་ཀྱིས་ཆུ་ཚོད་གཅིག་ཙམ་གྱི་རྗེས་སུ་ང་ཚོ་ཞག་སྡོད་བྱེད་སའི་སྡོད་གནས་སུ་བདེ་འབྱོར་བྱུང་བ་དང་། དེ་རིང་ལམ་བར་དུ་དཀའ་ཚེགས་ཆེ་བ་ཅང་མ་བྱུང་སྟབས་ཞག་སྡོད་ས་ཚིགས་སུ་མགྱོགས་པོ་འབྱོར་སོང་། དགྲ་བོ་རྒྱ་དམར་སྲིད་གཞུང་གིས་བོད་དང་བོད་མིའི་སྤྱི་ཚོགས་ལ་སྡུག་རྩུབ་གཉའ་གནོན་ཇི་ལྟར་བྱས་པ་དེ་ཚོད་ཀྱིས་ལས་འགུལ་བ་རྣམས་ནི་གོམ་པ་རེ་རེ་བཞིན་སྙིང་སྟོབས་ཇེ་ཆེར་འགྲོ་བཞིན་འདུག

ལས་འགུལ་བ་རྣམས་ཉིན་གང་གོམ་བགྲོད་བྱས་ནས་ས་ཚིགས་སུ་འབྱོར་མཚམས་མ་ཇན་ཚོགས་ཆུང་ནས་དགོང་དྲོའི་ཞལ་ལག་ཐེན་ཐུག་ཞིམ་པོ་ཞིག་བཟོས་འདུག་པ་དང་། དེ་ནི་བོད་པའི་སྲོལ་རྒྱུན་གྱི་ཟས་རིགས་ཤིག་ཡིན་པས་སེམས་ངལ་གསོ་བ་དང་ལྷན་ང་ཚོའི་མེས་པོ་ཚོ་ཡང་དྲན་དུ་བཅུགས་པ་བཅས་དེ་རིང་གི་གོམ་བགྲོད་ལས་འགུལ་ལེགས་གྲུབ་ཀྱིས་མཇུག་སྒྲིལ་ཞུས་ཡོད།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་དྲུག་པར་སྔ་དྲོའི་ཆུ་ཚོད་ ༥:༠༠ ཐོག་ཞལ་འདོན་དང་། དེ་སྐབས་གོ་སྒྲིག་ཚོགས་ཆུང་གིས་ལས་ཉིན་དྲུག་པའི་ལས་རིམ་སྐོར་གྱི་གསལ་བཤད་ཞུས་རྗེས། གོམ་བགྲོད་དབུ་འཛུགས་ཀྱིས་མཎྜི་ལ་མ་སླེབས་ཙམ་གྱི་ལམ་བར་ནས་གུརྡུ་ཝ་ར་དང་སིག་ཆོས་ལུགས་ཀྱི་མི་མང་གིས་ཉིན་གུང་གསོལ་ཚིགས་ལ་མགྲོན་འབོད་གནང་ནས་གོམ་བགྲོད་པ་ཚང་མར་ཟས་རིགས་དྲོན་མོ་བཟོས་ཏེ་སྣེ་ལེན་གཟབ་རྒྱས་གནང་།

དེ་རྗེས་མུ་མཐུད་གོམ་བགྲོད་ཀྱིས་ཉིན་རྒྱབ་ཆུ་ཚོད་ ༢:༠༠ ཙམ་ལ་ལས་འགུལ་བ་རྣམས་མཎྜི་ལ་འབྱོར་བ་དང་། ས་གནས་བོད་མི་དང་དཔོན་རིགས་མི་སྣ་ཁག་བཅས་ནས་སྣེ་ལེན་གང་ལེགས་གནང་། དེ་སྐབས་མཎྜི་བོད་མིའི་གཞིས་ཆགས་ལས་ཁུངས་ཀྱི་ལས་དྲུང་ལྷ་མོ་ཆོས་སྒྲོན་ལགས་དང་། མཎྜི་ས་གནས་འགོ་འཛིན་ཟུར་པ་ངག་དབང་དོན་གྲུབ་ལགས། མཎྜི་ས་གནས་འཐུས་ཚོགས་ཀྱི་ཡེ་ཤེས་རྡོ་རྗེ་ལགས་དང་བཀྲ་ཤིས་ཚེ་དབང་ལགས། བཀྲ་ཤིས་ཕུན་ཚོགས་ལགས་བཅས་མཎྜི་ས་གནས་བོད་པའི་མི་མང་ཕེབས་ཡོད་པ་དང་། མཎྜི་ཧིན་བོད་མཛའ་འབྲེལ་ཚོགས་པའི་སྐུ་ཞབས་ཌ་ནེ་ཤི་ཀུ་མར་ལགས་ཀྱིས་ཞྭ་མོ་ནག་པོའི་གོམ་བགྲོད་ལས་འགུལ་གྱི་སྐོར་ལ་གསར་འགོད་ལྷན་ཚོགས་ཤིག་ཀྱང་གོ་སྒྲིག་གནང་འདུག་པ་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མཆོག་ནས་མཎྜི་བོད་པའི་མི་མང་ལ་མི་རེ་ངོ་རེ་ནས་བོད་དོན་འཐབ་རྩོད་གནང་ཕྱོགས་དང་འབྲེལ་གཏམ་བཤད་གནང་བ་དང་། དེ་བཞིན་མཎྜི་ནང་གི་གུ་རུ་གོ་བིནྡ་སིང་གུརྡུ་ཝ་རའི་ནང་བཞུགས་གནས་གཏན་འཁེལ་གྱིས་གོམ་བགྲོད་ལས་འགུལ་གྱི་ལས་ཉིན་དྲུག་པ་ལེགས་གྲུབ་ཀྱིས་དེ་གར་མཇུག་བསྒྲིལ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་ཉིན་ལྔ་པའི་སྔ་དྲོའི་ཆུ་ཚོད་ལྔ་པར་ཞལ་འདོན་གྲུབ་རྗེས་གོ་སྒྲིག་ཚོགས་ཆུང་གིས་ཉིན་དེའི་གོམ་བགྲོད་ལས་འགུལ་གྱི་བྱེད་སྒོའི་སྐོར་ངོ་སྤྲོད་གསལ་བཤད་ཞུས། དེ་རིང་གི་གོམ་བགྲོད་ལམ་བར་དུ་བོད་མིའི་གཞིས་ཆགས་གང་ཡང་མེད་ཀྱང་། ང་ཚོས་སྦིར་བོད་མིའི་གཞིས་ཆགས་ནས་པདྷར་བར་བོད་མིའི་རྒྱབ་སྐྱོར་ཡོད་མེད་ལ་མ་ལྟོས་པར་ཚོར་ཤུགས་དྲག་པོས་མདུན་སྐྱོད་བྱས། སྦིར་ནས་གོམ་བགྲོད་མུ་མཐུད་བྱས་རྗེས་པདྷར་ལ་མ་འབྱོར་ཙམ་དུ་གསར་འགོད་པ་ཁག་ཅིག་དང་ཐུག་འཕྲད་བྱེད་པའི་གོ་སྐབས་བྱུང་ཡོད། འདི་ནི་བོད་མི་མང་སྤྱི་འཐུས་ཚོགས་གཞོན་ཟུར་པ་ཨ་ཅརྱ་ཡེ་ཤེས་ཕུན་ཚོགས་ལགས་དང་། ཧིན་བོད་མཛའ་གྲོགས་ཚོགས་པའི་ཚོགས་མི་སྐུ་ཞབས་རཱཇ་ཐཱ་ཀུར་ལགས། ཅོན་ཏ་ར་ས་གནས་གཞོན་ནུ་ཚོགས་གཙོ་བསོད་ནམས་གཡུ་རྒྱལ་ལགས་བཅས་ཀྱི་རྒྱབ་སྐྱོར་ལ་བརྟེན་ནས་བྱུང་བ་ཞིག་རེད།

དེ་སྐབས་གོམ་བགྲོད་ལས་འགུལ་ནང་གི་གཞོན་སྐྱེས་གོམ་བགྲོད་པ་ཞིག་གིས་བཤད་དོན། ངས་ཅིའི་ཕྱིར་ཞྭ་མོ་ནག་པོའི་གོམ་བགྲོད་ལ་ཞུགས་པ་ཡིན་ཞེ་ན། གལ་ཏེ་ང་ཚོས་ང་ཚོའི་དོན་དག་ཆེད་འཐབ་རྩོད་མུ་མཐུད་དུ་མ་བྱས་ན། མི་རབས་གསར་པ་ཚོས་ང་ཚོའི་རྒྱལ་ཁབ་ཀྱི་དོན་དག་བརྗེད་ངེས་རེད། དེའི་ཕྱིར་ངས་ལས་འགུལ་འདིའི་ནང་ཞུགས་པ་ཡིན་པ་དང་། ངའི་ཕྲུ་གུ་ཚོ་མ་འོངས་པར་འདིའི་ནང་ཞུགས་ངེས་རེད། འདི་ཁོ་ཚོའི་མིག་དཔེར་གྱུར་པ་དང་། ང་ཚོས་སྤོབས་པ་བྱེད་དགོས་པ་ཞིག་ཆགས་ཡོད་ཅེས་གོམ་བགྲོད་པ་ཚོར་སེམས་འགུལ་ཐེབས་པའི་བཀའ་མོལ་ཞིག་གིས་ང་ཚོ་ལ་ཤུགས་རྐྱེན་ཆེན་པོ་ཐེབས་སོང་།

དེ་ལྟར་ལམ་བར་དུ་དྲག་ཆར་རླུང་ཚུབ་ཇི་ལྟར་ཆེ་ནའང་གོམ་བགྲོད་ལས་འགུལ་བ་རྣམས་གོམ་བགྲོད་མཚམས་མ་བཞག་པར་སེམས་ཤུགས་དང་སྙིང་སྟོབས་ཆེན་པོས་མུ་མཐུད་གོམ་བགྲོད་ཀྱིས་པདྷར་ཞེས་པར་བདེ་འབྱོར་གྱིས་ལས་ཉིན་ལྔ་པའི་གོམ་བགྲོད་ལས་འགུལ་ལེགས་གྲུབ་བྱུང་ནས་དེ་གར་ཞག་སྡོད་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་གྱི་ཉིན་གསུམ་པའི་ཞོགས་པ་ཆུ་ཚོད་ལྔ་པའི་ཐོག་ཞོགས་པའི་གཞལ་འདོན་དང་གོ་སྒྲིག་ཚོགས་ཆུང་ནས་དེ་ཉིན་གྱི་ལས་རིམ་ངོ་སྤྲོད་ཞུས་རྗེས་ཆུ་ཚོད་ ༩ པའི་ཐོག་གཞོན་ལྷན་གྱི་གོམ་བགྲོད་པ་རྣམས་རྒྱ་གར་གྱི་སྲོལ་རྒྱུན་ལྟར་སེམས་གསོའི་ཁ་བཏགས་དང་བཅས་པ་ལམ་པུར་དུ་འབྱོར་མཚམས་དེ་སྔའི་རྒྱ་གར་གྲོས་ཚོགས་འཐུས་མི་སྐུ་ཞབས་པར་ཝིན་ཀུ་མར་དང་ཁོང་གི་ལས་རོགས་བཅས་ཀྱིས་དགའ་བསུ་ཞུས་ཤིང་། བོད་དོན་ལས་འགུལ་ལ་རྒྱབ་སྐྱོར་ཤུགས་ཆེན་གནང་།

ཆུ་ཚོད་ ༡༡ ཙམ་ལ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་། ཚོགས་གཞོན། ལས་འགུལ་བ་ཚོགས་མི་བཅས་དང་། དེ་བཞིན་པུ་རུ་ཝ་ལའི་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་དང་གོམ་བགྲོད་པ་ཁ་ཤས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གྲོགས་པོ་དང་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ཤཱན་ཏ་ཀུ་མར་མཆོག་དང་མཇལ་འཕྲད་གནང་། ཁོང་ད་ལྟ་དགུང་ལོ་ ༩༡ ལ་ཕེབས་ཡོད་ཀྱང་བོད་དོན་ལས་འགུལ་ལ་རྒྱབ་སྐྱོར་གནང་རྒྱུར་བློ་ཐག་རྦད་བཅད་གནང་ཡོད། ང་ཚོས་ཁོང་ལ་ཞྭ་མོ་ནག་པོའི་གོམ་བགྲོད་ཀྱི་དམིགས་ཡུལ་ངོ་སྤྲོད་ཞུས་པ་མ་ཟད། བོད་མི་མང་དང་ང་ཚོའི་འཐབ་རྩོད་ལ་ཁོང་གིས་ཡུན་རིང་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཡང་ཞུས་ཡོད།

ཕྱི་དྲོའི་ཆུ་ཚོད་ ༤:༣༠ པར་ང་ཚོ་བཀྲ་ཤིས་ལྗོངས་བོད་མིའི་ས་ཁུལ་དུ་འབྱོར་བ་དང་བཀྲ་ཤིས་ལྗོངས་དགོན་པས་དགའ་བསུ་གནང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོས་བོད་རིགས་རྣམས་ལ་གསུང་བཤད་གནང་བོད་མི་ཚོས་སྔར་ལས་ལྷག་པའི་ལས་འགུལ་གྱི་ནུས་པ་འདོན་དགོས་པ་དང་། བོད་མི་ཚོ་སྔར་ལས་མང་བས་མཉམ་ཞུགས་དང་གཅིག་སྒྲིལ་བྱེད་དགོས་པའི་སྐུལ་མ་གནང་། ཉིན་དེའི་མཇུག་ཏུ་བཀྲ་ཤིས་ལྗོངས་བོད་མིའི་གཞིས་ཆགས་ནས་གསོལ་ཚིགས་ཞིམ་པོ་ཞིག་གོ་སྒྲིག་གནང་བས་ལས་འགུལ་བ་རྣམས་ཧ་ཅང་ཐང་ཆད་པའི་སྐབས་དེར་ཕན་རླབས་ཆེན་པོ་བྱུང་བས་ཐུགས་རྗེ་ཆེ་ཞུ་རྒྱུ་མ་ཟད། སྐུ་ཞབས་ཤཱན་ཏ་ཀུ་མར་མཆོག་དང་བཀྲ་ཤིས་ལྗོངས་བོད་མིའི་གཞིས་ཆགས་དང་བཀྲ་ཤིས་ལྗོངས་མགོན་པའི་མཐུན་འགྱུར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས།

ཞྭ་མོ་ནག་པོའི་གོམ་བགྲོད་ལས་འགུལ་གྱི་ཉིན་གཉིས་པར་ཞོགས་པ་ཆུ་ཚོད་ལྔ་པའི་ཐོག་ཞོགས་པའི་གཞལ་འདོན་དང་གོ་སྒྲིག་ཚོགས་ཆུང་ནས་དེ་རིང་གི་ལས་རིམ་སྙན་སེང་ཞུས། དེ་མ་ཐག་གོམ་བགྲོད་ལས་འགུལ་དེ་བཞིན་ས་རཱ་བོད་ཀྱི་མཐོ་རིམ་སློབ་གཉེར་ཁང་ནས་འགོ་བཙུགས་ཀྱིས་ཌ་ཌི་བརྒྱུད་གོ་པལ་པུར་བོད་ཁྱིམ་སློབ་གྲྭའི་ཕྱོགས་སུ་བསྐྱོད། ཌ་ཌི་རུ་བོད་པའི་ཆ་མུཎ་ཌའི་ཚོགས་མི་རྣམས་དང་། ཧི་མ་ལ་ཡ་པཱ་རི་ཝར་རྒྱལ་ཡོངས་དྲུང་ཆེ་སྐུ་ཞབས་རི་ཤི་ཀུ་མཱར་ཇི་དང་། ཌོལ་ཕིན་མགྲོན་ཁང་གི་སྦྱིན་བདག་བཅས་ཀྱིས་བོད་ཀྱི་གཞོན་ནུ་ལྷན་ཚོགས་ཀྱི་ཞྭ་མོ་ནག་པོའི་གོམ་བགྲོད་པ་རྣམས་ལ་དགའ་བསུ་ཞུས་ཏེ་རྒྱབ་སྐྱོར་ཤུགས་ཆེན་བྱས། ཕྱི་དྲོ་ཆུ་ཚོད་ལྔ་པའི་མཚམས་སུ་ལས་འགུལ་བ་རྣམས་གོ་པལ་པུར་བོད་ཁྱིམ་སློབ་གྲྭར་བདེ་འབྱོར་སྐབས་སློབ་ཕྲུག་རྣམས་ཀྱིས་གོམ་བགྲོད་པ་རྣམས་ལ་དགའ་བསུས་སྣེ་ལེན་གནང་བ་མ་ཟད། སློབ་གྲྭའི་འཛིན་སྐྱོང་གིས་དགོང་མོའི་གནས་ཚང་དང་གསོལ་ཇ་གོ་སྒྲིག་གནང་།

ཕྱི་དྲོ་ཆུ་ཚོད་དྲུག་པའི་ཐོག་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་ཚོགས་གཞོན་གཉིས་ནས་སློབ་གྲྭའི་དགེ་ལས་སློབ་ཕྲུག་ཡོངས་ལ་གཏམ་བཤད་དང་དྲི་བ་དྲིས་ལན། དེ་བཞིན་སློབ་ཕྲུག་རྣམས་ཀྱིས་སློབ་སྦྱོང་ལ་དོ་སྣང་ཆེན་པོ་བྱས་ཏེ་མ་འོངས་པར་བོད་དོན་འཐབ་རྩོད་སླད་འགན་འཁུར་ཞུ་ཕྱོགས་ཐད་འབོད་སྐུལ་ཞུས་པ་བཅས་ལས་འགུལ་ཉིན་གཉིས་པ་ལེགས་གྲུབ་ཀྱིས་མཇུག་བསྡུ་ཞུས།

བོད་རྒྱལ་ལོ་ ༢༡༥༣ ཕྱི་ལོ་ ༢༠༢༦ ཟླ་ ༣ ཚེས་ ༣༡ ཉིན་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་ཞུས་པའི་ “ཞྭ་མོ་ནག་པོའི་གོམ་བགྲོད།” (Black Hat March) ཞེས་པའི་ལས་འགུལ་དེ་བཞིན་བཞུགས་སྒར་རྡ་ས་ལྷ་རྒྱལ་རི་ནས་དབུ་འཛུགས་ཞུས་ཡོད། དེ་རིང་གི་ཉིན་མོ་འདི་ནི་ཉེ་རབས་བོད་ཀྱི་ལོ་རྒྱུས་ནང་ཧ་ཅང་གལ་འགངས་ཅན་ཞིག་ཆགས་ཡོད། དགྲ་བོ་རྒྱ་དམར་སྲིད་གཞུང་གིས་ཕྱི་ལོ་ ༡༩༥༩ ལོར་བོད་ས་ཡོངས་རྫོགས་ཁྲིམས་འགལ་བཙན་བཟུང་བྱས་རྗེས་བོད་མིའི་བླ་ན་མེད་པའི་དབུ་ཁྲིད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གཙོས་སྐུ་འཁོར་ལྟོས་བཅས་དང་། བོད་གཞུང་བཀའ་ཤག་དང་བཅས་བོད་མི་སྟོང་ཕྲག་མང་པོ་རྒྱ་གར་རང་དབང་ལུང་པའི་ནང་བཙན་བྱོལ་དུ་ཆིབས་སྒྱུར་གནང་བའི་ཉིན་དང་པོ་དེ་ཡིན་ཞིང་། གོམ་བགྲོད་ལས་འགུལ་གྱི་དབུ་འབྱེད་མཛད་སྒོ་ནི་བཞུགས་སྒར་༧རྒྱལ་བའི་ཕོ་བྲང་གི་རྒྱབ་ངོས་དང་། བོད་རྒྱལ་ཁབ་དང་མི་རིགས་རིག་གཞུང་དང་བཅས་པའི་ཆེད་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གིས་རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྐུ་པར་དང་། རྡོ་རིང་བཞུགས་གནས་ལྷ་རྒྱལ་རིར་ཚོགས་ཡོད་པ་དང་།

མཛད་སྒོའི་ཐོག་སྐུ་མགྲོན་གཙོ་བོ་དཔལ་ལྡན་རང་གཞུང་དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་སྐུ་ངོ་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་དུ་སྡ་བདེ་བྷི་ཇེ་པི་གཞོན་ནུ་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་ཤ་ཤྭཊ་ཀ་པུར་ (Mr. Shashwat Kapoor) མཆོག ཧིན་བོད་མཐུན་ཚོགས་ཀྱི་ཚོགས་གཙོ་སྐུ་ཞབས་ Ajit Nehria མཆོག བོད་མི་མང་སྤྱི་འཐུས་དང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་བསྟན་འཛིན་འཇིགས་མེད་ལགས། བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། བཞུགས་སྒར་རྡ་ས་ས་གནས་འགོ་འཛིན་དཀོན་མཆོག་མི་དམར་ལགས། བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་སྐུ་ངོ་སྟོབས་རྒྱལ་ལགས་དང་སྤེན་པ་ཚེ་རིང་ལགས། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམ་པ། གསར་འགྱུར་ཚན་པ་ཁག་གི་གསར་འགོད་པ་བཅས་ཕེབས་ཡོད། ལས་འགུལ་བ་རྣམ་པ། རྡ་སའི་ཁུལ་གྱི་མི་མང་ཁག་ཅིག་བཅས་ཕེབས་ཡོད། ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་གྱེར་འདོན་གནང་རྗེས་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མྱ་ངན་ངག་བཅད་སྐར་མ་གཅིག་ཞུས། དེ་རྗེས་གཞོན་ལྷན་སྤྱི་ཁྱབ་དྲུང་ཆེ་བསྟན་འཛིན་བློ་བཟང་ལགས་ནས་ཞྭ་མོ་ནག་པོའི་གོམ་བགྲོད་ལས་འགུལ་གྱི་བོད་ཡིག་བསྒྲགས་གཏམ་སྒྲོག་སྦྱང་དང་། སྤྱི་ཁྱབ་ཟུང་དྲུང་ངག་དབང་དཔལ་འབྱོར་ལགས་ནས་ཧིན་དྷིའི་ཐོག་བསྒྲགས་གཏམ་སྒྲོག་སྦྱང་ཞུས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་མཆོག་ནས་མཛད་སྒོའི་ཐོག་ཚོགས་བཅར་བ་ཡོངས་ལ་ཞྭ་མོ་ནག་པོའི་གོམ་བགྲོད་ལས་འགུལ་གྱི་དམིགས་ཡུལ་དང་དགོས་འདུན་ཁག་ངོ་སྤྲོད་གནང་ཡོད།

དེ་རྗེས་སྐུ་མགྲོན་གཙོ་བོ་རང་གཞུང་བདེ་སྲུང་ལས་ཁུངས་ཀྱི་སྐུ་ངོ་བཀའ་བློན་རྒྱ་རི་སྒྲོལ་མ་མཆོག་ནས་གལ་ཆེའི་གསུང་བཤད་དང་། དམིགས་བསལ་སྐུ་མགྲོན་སྡ་བདེ་བྷི་ཇེ་པི་གཞོན་ནུ་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་ཤ་ཤྭཊ་ཀ་པུར་ (Mr. Shashwat Kapoor) མཆོག་གི་གསུང་བཤད། ཧིན་བོད་མཐུན་ཚོགས་ཀྱི་ཚོགས་གཙོ་སྐུ་ཞབས་ Ajit Nehria མཆོག་གི་གསུང་བཤད་བཅས་མཛད་སྒོའི་ལས་རིམ་ཁག་ལེགས་པར་གྲུབ་རྗེས། ལས་འགུལ་བ་རྣམས་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་ལགས་དང་འཇལ་དཔལ་ཡེ་ཤེས་ལགས་རྣམ་གཉིས་ཀྱི་རྡོ་རིང་མདུན་ནས་རུ་སྒྲིག་ཐོག་བོད་མི་མང་སྤྱི་འཐུས་དང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་བསྟན་འཛིན་འཇིགས་མེད་ལགས་ནས་ཐུན་མོང་ཐོག་ལྷ་རྒྱལ་རི་ནས་གོམ་བགྲོད་དབུ་འཛུགས་ཀྱི་རྒྱལ་དར་སྒྲེང་གནང་ཡོད།

ཆུ་ཚོད་བཅུ་གཉིས་ཙམ་ལ་ལས་འགུལ་བ་རྣམས་གངས་ཅན་སྐྱིད་གཤོངས་སུ་འབྱོར་མ་ཐག་དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྐུ་ངོ་སྤེན་པ་ཚེ་རིང་མཆོག་ཆེད་ཕེབས་ཀྱིས་ལས་འགུལ་བ་རྣམས་ལ་སྨོན་འདུན་བཟང་པོ་གནང་བ་མ་ཟད། གངས་ཅན་སྐྱིད་གཤོངས་ཀྱི་སྒོ་ཆེན་ནས་གོམ་བགྲོད་དངོས་སུ་དབུ་འཛུགས་ཀྱི་རྒྱལ་དར་སྒྲེང་གནང་རྗེས་ལས་འགུལ་བ་རྣམས་རིམ་བགྲོད་ཀྱིས་དགོང་དྲོ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བདེ་འབྱོར་ཐོག་བཞག་བསྡོད་དང་པོ་དེ་གནང་ཡོད། དེ་སྐབས་སློབ་སྤྱི་པ་སངས་ཚེ་རིང་ལགས་གཙོ་བྱས་པའི་ས་རཱ་ས་གནས་གཞོན་ནུ་རུ་ཁག དེ་བཞིན་དགེ་ལས་སློབ་ཕྲུག་རྣམས་ཀྱིས་སྣེ་ལེན་གཟབ་རྒྱས་ཞུས་གནང་ཡོད།

མཐའ་མར་བོད་ཀྱི་གཞོན་ནུ་ལྷན་ཚོགས་གཙོ་མཆོག་ནས་གཞོན་སྐྱེས་སློབ་ཕྲུག་རྣམས་ལ་བོད་དོན་འཐབ་རྩོད་ཐོག་འགན་འཁུར་གང་མང་ལན་དགོས་པའི་སྐོར་དང་། དེ་རྗེས་དྲི་བ་དྲིས་ལན་བཅས་ལས་ཉིན་དང་པོ་ལེགས་གྲུབ་ཀྱིས་མཇུག་སྒྲིལ་ཞུས་ཡོད།

༄༅། །བོད་རྒྱལ་ལོ་ ༢༡༥༣ ཕྱི་ལོ་ ༢༠༢༦ ཟླ་བ ༣ ཚེས་ ༡༠ ཉིན་སྟེ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༧ པ་དེ་བཞིན་འདི་ག་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་གྱི་མཛད་སྒོ་ལེགས་པར་གྲུབ་རྗེས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་ལྔའི་གོ་སྒྲིག་འོག་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཀ་ཅཱ་རི་བར་མི་མང་ལས་འགུལ་བ་རྣམས་སྣེ་ཁྲིད་ཀྱིས་གསུམ་བཅུའི་དུས་དྲན་གྱི་ངོ་རྒོལ་ལས་འགུལ་སྤེལ་ཡོད་པ་དང་། དེ་བཞིན་གཞོན་ལྷན་དབུས་ས་ཟུང་འབྲེལ་གྱིས་རྒྱ་གར་རྒྱལ་ས་ལྡི་ལི་ཇར་ཏར་མན་ཏར་ངོ་རྒོལ་ལས་འགུལ་སྤེལ་ཡོད་པ་དང་སྐབས་དེར་ཧིན་བོད་མཛའ་འབྲེལ་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་མེ་ནོཇེ་ཀུ་མར་ (Dr. Manoj Kumar ji) མཆོག་ཀྱང་མཉམ་ཞུགས་ཀྱིས་དམིགས་བསལ་གསུང་བཤད་ཀྱང་གནང་ཡོད་པ་དང་། དེ་བཞིན་ལྡི་ལི་གྲོང་ཁྱེར་སྲིད་གྲོས་ཀྱི་དབུ་ཁྲིད་ཟུར་པ་ (Former MCD Member, Rakesh Kumar ji) མཆོག དགེ་རྒན་ཆེན་མོ་ལྦི་ནེ་ཀུ་མར་མཆོག Prof. Vinay Kumar BTSM. དྲ་རྒྱའི་དྲུང་ཆེ་ཇག་ཊུམ་བ་ Jagtumba Singh BTSM Media Secretary

བཅས་མཉམ་ཞུགས་གནང་ཡོད། དེ་སྐབས་བོད་ཀྱི་གཞོན་ནུ་ལྷན་ཚོགས་དང་རོ་ཧི་ནི་ས་གནས་གཞོན་ལྷན་དབུས་ས་གཉིས་ཟུང་འབྲེལ་གྱིས་དགྲ་བོ་རྒྱ་དམར་གཞུང་ཚབ་མདུན་དུ་རྒོལ་མཆོང་གི་ལས་འགུལ་སྤེལ་ནས་ལས་འགུལ་བ་རྣམས་རྒྱ་གར་ཉེན་རྟོག་པས་འཛིན་བཟུང་གིས་ཕྱི་དྲོ་བར་བཀག་ཉར་ཁང་དུ་བཅུགས། དེ་ལྟར་རྒྱ་གར་དང་ཕྱི་རྒྱལ་ཡུལ་གྲུ་ཁག་ནང་ས་གནས་གཞོན་ལྷན་ཁག་ནས་ལས་འགུལ་གོ་སྒྲིག་དང་མི་མང་སྣེ་ཁྲིད་ཀྱིས་ཕྱོགས་ཡོངས་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༧ པའི་ལས་འགུལ་དེ་བཞིན་ཤུགས་ཆེར་སྤེལ་ཐུབ་པ་བྱུང་བ་དང་། གསར་འགྱུར་རྒྱུད་ལམ་ཁག་བརྒྱུད་རྒྱལ་སྤྱིའི་སྤྱི་ཚོགས་དྲྭ་ལམ་ཁག་ཏུ་བོད་དོན་འཐབ་རྩོད་ཀྱི་ལས་འགུལ་ཁྱབ་བསྒྲགས་ཤུགས་ཆེ་འགྲོ་ཐུབ་པ་བྱུང་ཡོད།

10th March statement (Tib)     10th March statement (Eng)         10th March statement (Hindi)