ཞྭ་མོ་ནག་པོའི་གོམ་བགྲོད་ལས་འགུལ་ཉིན་བཅུ་པ་དེ་ཡིན་ཞིང་སྔ་དྲོའི་ཆུ་ཚོད་ལྔ་པར་སྨོན་ལམ་གསུང་འདོན་དང་། གོ་སྒྲིག་ཚོགས་ཆུང་ནས་ཉིན་དེའི་ལས་རིམ་སྐོར་ངོ་སྤྲོད་གསལ་བཤད་གནང་།
དེ་རྗེས་གོམ་བགྲོད་ལས་འགུལ་བ་རྣམས་སྙིང་སྟོབས་ཆེན་པོས་ཉིན་གང་གོམ་བགྲོད་ཀྱིས་དགོང་དྲོའི་ཆུ་ཚོད་ ༤:༣༠ ཙམ་ལ་རོ་པར་རྫོང་ཁུལ་དུ་འབྱོར་སོང་བ་དང་། དེར་རྒྱ་གར་གྱི་དྲང་ཉུང་མི་རིགས་ཀྱི་དབུས་རྒྱུན་ལྷན་ཚོགས་ཀྱི་ཚོགས་གཙོ་ཟུར་པ་སྐུ་ཞབས་ཨིག་བལ་སིང་ལལ་པུ་ར་ལགས་དང་། སྐུ་ཞབས་ཨ་མི་ཀུ་མར་ལགས་ཀྱིས་སྣེ་ཁྲིད་པའི་ཨར་ཨེས་ཨེས་རོ་པར་ཚོགས་ཆུང་ནས་དགའ་བསུའི་སྣེ་ལེན་གཟབ་རྒྱས་གནང་།
དེ་བཞིན་རོ་པར་དུ་གསར་འགོད་པ་ཚོར་སྣེ་ལེན་དང་བཅས་གཞོན་ལྷན་གྱི་ཞྭ་མོ་ནག་པོའི་གོམ་བགྲོད་ཀྱི་དགོས་དམིགས་ངོ་སྤྲོད་དང་། བོད་དོན་འཐབ་རྩོད་སྐོར་གོ་རྟོགས་སྤེལ།
རོ་པར་ཁྲོམ་གཞུང་དུ་ལས་འགུལ་བ་རྣམས་ཀྱིས་ཞི་བའི་ངོ་རྒོལ་སྐད་འབོད་བྱས་ཏེ། རྒྱ་དམར་སྲིད་གཞུང་གི་མི་རིགས་མཉམ་འདུས་ཀྱི་ཁྲིམས་ཡིག་གིས་མི་རིགས་སྡེབ་གསོད་བྱེད་ཀྱི་ཡོད་ཚུལ་སོགས་དྲིལ་བསྒྲགས་བྱས་ཏེ་ས་གནས་རྒྱ་གར་མང་ཚོགས་ཀྱི་དོ་སྣང་ཤུགས་ཆེ་ཡོང་ཐབས་བྱས། དགོང་དྲོའི་ཞལ་ལག་དེ་བཞིན་བོད་ཟས་ཐན་ཐུག་བཟོས་ནས་ཨར་ཨེས་ཨེས་ཚོགས་མི་ཚོ་དང་མཉམ་དུ་བཤམས་ཏེ་བོད་དོན་འཐབ་རྩོད་ཀྱི་ལོ་རྒྱུས་བཤད་པ་དང་། ཁོ་ཚོས་ང་ཚོ་ལ་གདུང་སེམས་མཉམ་སྐྱེད་གནང་བ་བཅས་བས་ནས་དགོང་མོ་འདི་དོན་སྙིང་ལྡན་པ་ཞིག་བྱུང་ཡོད། བྱ་ལན་དྷར་ས་གནས་གཞོན་ནུ་ས་གནས་རྒྱུན་ལས་སློབ་མ་གིས་རོ་པར་ལ་བསྐྱོད་དེ་རྒྱལ་ཁབ་ཀྱི་དོན་དུ་བློ་གཅིག་སེམས་གཅིག་གིས་ལས་འགུལ་ནང་མཉམ་ཞུགས་བྱེད་མཁན་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང།
ལས་འགུལ་བ་རྣམས་མཚན་མོ་རོ་པར་ཚོགས་མི་ཚོས་བང་ལམ་མུ་ཁི་ལྷ་ཁང་ནང་སྡོད་གནས་གོ་སྒྲིག་གནང་འདུག་པས་ཐུགས་རྗེ་ཆེ་ཞུ་རྒྱུ་བཅས་ལས་ཉིན་བཅུ་པའི་གོམ་བགྲོད་ལེགས་གྲུབ་ཀྱིས་མཇུག་སྒྲིལ་ཞུས།
