བོད་རྒྱལ་ལོ་ ༢༡༤༨ ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོར་སྦེལ་ཞི་བདེའི་གཟེངས་སྟགས་འབུལ་བཞེས་མཛད་ཉིན་དང་།
རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་སྟབས་བསྟུན་གྱིས་བོད་ཀྱི་གཞོན་ནུ་ལྷན་ཚོགས་ཀྱི་ས་གནས་གཞོན་ལྷན་བསམ་ཡས་གླིང་ཀྱིས་གོ་སྒྲིག་འོག རྒྱ་གར་ལྷོ་ཕྱོགས་བྷེང་ལོར་ནས་འགོ་འཛུགས་ཀྱིས་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ཅིག་གོ་སྒྲིག་ཞུས་ཏེ་རྒྱ་ནག་ནང་ཚོགས་རྒྱུ་ཡིན་པའི་རྒྱལ་སྤྱིའི་དགུན་དུས་ཨོ་རྩལ་འགྲན་ཚོགས་ཚུགས་རྒྱུའི་འོས་བབས་མེད་པའི་ངོ་རྒོལ་སྐྱོན་བརྗོད་ཀྱི་གཞི་རྒྱ་ཆེ་བའི་ལས་འགུལ་སྤེལ་ཏེ་ཉིན་ ༣༠ རྗེས་སུ་བཞུགས་སྒར་རྡ་སར་བདེ་ལེགས་ངང་ཕེབས་འབྱོར་བྱུང་བར་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་དང་། རྡ་ས་ས་གནས་གཞོན་ལྷན་གཉིས་ཟུང་སྦྲེལ་གྱིས་ཕེབས་བསུའི་སྣེ་ལེན། བཞུགས་གནས་དང་ཞལ་ལག་བཀོད་སྒྲིག་སོགས་ཀྱི་མཐུན་རྐྱེན་གང་ལེགས་སྦྱར་ཏེ་བཞུགས་སྒར་རྡ་ས་ནས་ཀང་ར་བར་ཕེབས་སྐྱེལ་གྱིས་ལས་རིམ་ལེགས་གྲུབ་བྱུང་ཡོད།