རྒྱ་དམར་སྲིད་གཞུང་གི་ཕྱི་སྲིད་བློན་ཆེན་ནས་གཞུང་འབྲེལ་ཕྱོགས་སྐྱོད་སྐབས་ངོ་རྒོལ་ལས་འགུལ།
ཕྱི་ལོ་ ༢༠༢༢ ཟླ་ ༣ ཚེས་ ༢༥ ཉིན་བོད་ཀྱི་གཞོན་ནུ་ལྷན་ཚོགས་དང་རྒྱ་གར་བོད་རང་བཙན་གཉིས་ནས་རྒྱ་ནག་དམར་ཤོག་སྲིད་གཞུང་གི་ཕྱི་སྲིད་བློན་ཆེན་ཝང་ཡེ་རྒྱ་གར་དུ་གཞུང་འབྲེལ་ཕྱོགས་སྐྱོད་སྐབས་རྒྱ་གར་གྱི་རྒྱལ་ས་ལྡི་ལིར་ (Hyderabad House, Ashoka Road) ངོ་རྒོལ་སྐད་འབོད་ཀྱི་ལས་འགུལ་སྤེལ་བ་དང་།
སྐབས་དེར་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་ནས་བསྒྲགས་གཏམ་ཞིག་སྤེལ་ཏེ་བོད་གཙོས་པའི་ཐའེ་ཝན། ཡུ་གུར། ཧོང་ཀོང་སོགས་ཉམས་ཆུང་མི་རིགས་རྣམས་ལ་དགྲ་བོ་རྒྱ་དམར་བཙན་རྒྱལ་རིང་ལུགས་ཀྱིས་གཉའ་གནོན་གཤུ་གཞོག་འོག་མྱངས་དང་མྱོང་བཞིན་པའི་རྒྱལ་ཁབ་ཁག་གི་དངོས་ཡོད་གནས་ཚུལ་ལ་རྒྱལ་སྤྱིའི་སྤྱི་ཚོགས་ནས་རྒྱབ་སྐྱོར་གྱིས་རྒྱ་དམར་སྲིད་གཞུང་ལ་དངོས་ཤུགས་རྒྱུད་གསུམ་དུ་གནོན་ཤུགས་སྤྲོད་གནང་ཡོང་བའི་རེ་སྐུལ་ཞུས་ཡོད་པ་མ་ཟད། རྒྱ་གར་གྱི་ས་མཚམས་ཁག་ནས་དགྲ་བོ་རྒྱ་དམར་བཙན་རྒྱལ་རིང་ལུགས་ཀྱིས་དུས་ནམ་ཡིན་ལ་སུན་རྩེར་བཟོ་བཞིན་པའི་དཀའ་ངལ་དེ་བཞིན་བོད་ཀྱི་གནད་དོན་མ་སེལ་བར་གནས་རྒྱུ་ཡིན་པར་སོང་།
རྒྱ་གར་གཞུང་ནས་ཀྱང་རྒྱ་དམར་སྲིད་གཞུང་དང་འབྲེལ་འདྲིས་གནང་སྐབས་བོད་ཀྱི་གནད་དོན་གླེང་སློང་ཡོང་བའི་རེ་སྐུལ་ཡང་ཞུས་ཡོད། ད་དུང་རྒྱ་དམར་སྲིད་གཞུང་གི་བཙོན་ཁང་ནང་དམྱལ་བ་མི་ཡུལ་དུ་མྱང་བ་ལྟ་བུའི་བཟོད་ཐབས་བྲལ་བའི་དཀའ་ངལ་མྱང་དང་མྱོང་བཞིན་པའི་ཆབ་སྲིད་བརྩོན་པ་རྣམས་ཆ་རྐྱེན་གང་ཡང་མེད་པར་མགྱོགས་ནས་མྱུར་དུ་གློད་བཀྲོལ་དགོས་པའི་དགོས་འདུན་ཡང་བཏོན་ཡོད། ཉིན་དེའི་དགོང་མོར་བསམ་ཡས་གླིང་ས་གནས་གཞོན་ལྷན་གྱི་གོ་སྒྲིག་འོག་ལས་འགུལ་བ་རྣམས་ལ་ཐུགས་རྗེ་ཆེ་ཞུའི་ལས་རིམ་ཞིག་གོ་སྒྲིག་ཞུས་ཏེ་གཞོན་ལྷན་སྒྲིག་འགན་དང་། ཕྱི་འབྲེལ་འགན་འཛིན་གཅིག་ལྕོགས་སྤེན་པ་ཚེ་རིང་ལགས་ནས་བོད་ནང་གི་ཛ་དྲག་གནས་སྟངས་དང་འབྲེལ་བའི་གཏམ་བཤད་ཡང་སྤེལ་གནང་ཏེ་ལས་འགུལ་གང་ལེགས་བྱུང་ཡོད།