བྱང་ཨ་རིའི་ཁུལ་གྱི་ས་གནས་གཞོན་ལྷན་ཁག་ནས་ ༥༠ དུས་དྲན་སྲུང་བརྩི་ཞུས་པ།
བྱང་ཨ་རིའི་ཁུལ་དུ་གཞོན་ལྷན་གྱི་ ༥༠ དུས་དྲན་དེ་བཞིན་ཕྱི་ལོ་ ༢༠༢༡ ཟླ་ ༡༢ ཚེས་ ༢༥ ཉིན་ཝ་ཤིང་ཀྲོན་ཌེ་སི་(Washington D.C)ཁུལ་དུ་ཡོད་པའི་བོད་ཀྱི་ཆབ་སྲིད་བཙོན་པ་གྲགས་ཅན་སྟག་སྣ་འཇིགས་མེད་བཟང་པོའི་ཚོགས་ཁང་ནང་དུས་དྲན་སྲུང་བརྩི་ཞུས་ཡོད་པ་དང་། སྐབས་དེར་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་དང་། ཟུང་དྲུང་ཚེ་དབང་རབ་རྒྱས་ལགས། སྒྲིག་འཛུགས་འགན་འཛིན་སྤེན་པ་ཚེ་རིང་ལགས། རིག་གཞུང་འགན་འཛིན་ཡེ་ཤེས་ཆོས་འཕེལ་ལགས་བཅས་དབུས་རྒྱུན་བཞི་ཆེད་བཅར་ཞུས་ཡོད་པ་དང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་ཀྱི་གཞོན་ནུ་ལྷན་ཐོག་མར་གསར་འཛུགས་གནང་མཁན་གྱི་གྲས་དང་། དཔལ་ལྡན་བོད་མི་མང་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་། དེ་བཞིན་དམིགས་བསལ་སྐུ་མགྲོན་དུ་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་དང་། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་སྐུ་ངོ་འབུམ་རམས་པ་བློ་བཟང་སེང་གེ་མཆོག བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་མཆོག དེ་བཞིན་བྱང་ཨ་རིའི་དོན་གཅོད་ཟུར་པ་སྐུ་ངོ་དངོས་གྲུབ་ཚེ་རིང་མཆོག བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་དང་། བྱང་ཨ་རིའི་སྤྱི་འཐུས་ལས་ཐོག་བསྟན་འཛིན་འཇིགས་མེད་ལགས་བཅས་ཕེབས་ཡོད་པ་དང་། གཞན་ཡང་བྱང་ཨ་རིའི་ཁུལ་དུ་གནས་བཞུགས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་རྣམ་པ་དང་ས་གནས་གཞོན་ལྷན་ཁག་གི་རྒྱུན་ལས་ཚོགས་མི་དང་བཅས་ཕེབས་ཡོད། གཞོན་ལྷན་སྤྱི་ཁྱབ་སྒྲིག་འཛུགས་འགན་འཛིན་སྤེན་པ་ཚེ་རིང་ལགས་ནས་མཛད་སྒོའི་གཙོ་སྐྱོང་དང་། སྤྱི་ཁྱབ་ཚོགས་གཙོ་མཆོག་ནས་གཞོན་ལྷན་གྱི་ ༥༠ དུས་དྲན་སྲུང་བརྩི་ཞུ་བའི་གལ་ཆེའི་རང་བཞིན། གཞོན་ལྷན་ཐོག་མར་གསར་འཛུགས་གནང་བའི་རྒྱུད་རིམ་སོགས་གཞོན་ལྷན་གྱི་ལས་དོན་གནང་ཕྱོགས་སོགས་གསུང་བཤད་གནང་ཡོད།
དེ་བཞིན་གཞོན་ལྷན་གྱི་དབུས་རྒྱུན་ཟུར་པ་དང་། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་སྐུ་ངོ་འབུམ་རམས་པ་བློ་བཟང་སེང་གེ་མཆོག་ནས་གཞོན་ལྷན་ཐོག་མར་གསར་འཛུགས་གནང་མཁན་གྱི་གྲས་སྐུ་ངོ་བཀྲས་མཐོང་བསྟན་འཛིན་རྣམ་རྒྱལ་མཆོག་ལ་གཞོན་ལྷན་ ༥༠ དུས་དྲན་གྱི་ཕྱག་རྟགས་ཕུལ་གྲུབ་རྗེས་སྐུ་མགྲོན་གཙོ་བོ་སྐུ་ངོ་བཀྲས་མཐོང་བསྟན་འཛིན་རྣམ་རྒྱལ་མཆོག་ནས་ཐོག་མར་འཚམས་འདྲི་དང་བཅས་གཞོན་ལྷན་གནས་སྟངས་གང་འདྲ་ཞིག་གི་འོག་ནས་གསར་འཛུགས་གནང་ཡོད་སྐོར་དང་། སྐབས་དེར་གྲ་སྒྲིག་དང་གོ་སྒྲིག་གནང་མཁན་གྱི་གྲས་སུ་མི་སྣ་མང་པོ་ཡོད་པས་ཚང་མ་བཀའ་དྲིན་ཆེན་པོ་ཡིན་པར་ངོས་འཛིན་དགོས་གལ། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་བཞིན་བོད་དོན་འཐབ་རྩོད་ཐད་སྒྲིག་འཛུགས་སྔ་ཤོས་དང་གལ་ཆེན་ཡིན་སྐོར་སོགས་གལ་ཆེའི་བཀའ་སློབ་གསུང་བཤད་གནང་གྲུབ་མཚམས་སུ་སྐུ་ངོ་བཀྲས་མཐོང་བསྟན་འཛིན་རྣམ་རྒྱལ་མཆོག་ནས་གཞོན་ལྷན་གྱི་དབུས་རྒྱུན་ཟུར་པ་དང་། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་སྐུ་ངོ་འབུམ་རམས་པ་བློ་བཟང་སེང་གེ་མཆོག་དང་། གཞོན་ལྷན་གྱི་ཚོགས་གཙོ་ཟུར་པ་དང་བྱང་ཨ་རིའི་དཔལ་ལྡན་བོད་མི་མང་སྤྱི་འཐུས་ལས་ཐོག་བསྟན་འཛིན་འཇིགས་མེད་ལགས་སུ་གཞོན་ལྷན་ ༥༠ དུས་དྲན་གྱི་ཕྱག་རྟགས་རིམ་པར་ཕུལ།
དེ་རྗེས་དམིགས་བསལ་སྐུ་མགྲོན་སྐུ་ངོ་སྲིད་སྐྱོང་ཟུར་པ་འབུམ་རམས་པ་བློ་བཟང་སེང་གེ་མཆོག་ནས་འཚམས་འདྲི་དང་བཅས་ད་ལྟའི་ཆར་བོད་དོན་ཐད་རྒྱལ་སྤྱིའི་སྡིངས་ཆའི་ཐོག་གོ་སྐབས་མང་པོ་ཞིག་ཡོད་སྐོར་དང་འབྲེལ་རྒྱ་ནག་གཙོ་བྱས་པའི་རྒྱལ་སྤྱིའི་ཆབ་སྲིད་ཀྱི་གནས་སྟངས། དེ་བཞིན་རྒྱལ་སྤྱིའི་ཆབ་སྲིད་སྡིངས་ཆའི་ཐོག་གོ་སྐབས་དམ་འཛིན་གྱིས་བོད་པའི་གཞོན་སྐྱེས་རྣམས་ཀྱིས་འགན་འཁུར་ཐོག་བོད་ཀྱི་དངོས་ཡོད་གནས་སྟངས་སྐོར་རྒྱལ་སྤྱིའི་གསར་ཤོག་དང་དུས་དེབ་ཁག་ནང་སྤེལ་དགོས་རྒྱུར་འབད་བརྩོན་གནང་དགོས་གལ་སོགས་གསུང་བཤད་གནང་ཡོད།
གཞན་ཡང་གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་ནས་དམིགས་བསལ་སྐུ་མགྲོན་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་མཆོག་ལ་གཞོན་ལྷན་ ༥༠ དུས་དྲན་གྱི་ཕྱག་རྟགས་ཕུལ་མཚམས་དམིགས་བསལ་སྐུ་མགྲོན་སྐུ་ཚབ་དོན་གཅོད་མཆོག་ནས་འཚམས་འདྲི་དང་བཅས་བོད་ཀྱི་གཞོན་ནུ་ལྷན་ཚོགས་ནས་འདས་པའི་ལོ་ངོ་ལྔ་བཅུའི་རིང་བོད་དོན་འཐབ་རྩོད་སླད་རླབས་ཆེན་གྱི་བྱས་རྗེས་བཞག་ཡོད་པས་ཡི་རང་བསྔགས་བརྗོད་གནང་ཡོད་པ་དང་། དམིགས་བསལ་བོད་ཀྱི་གནས་སྟངས་ཐོག་ཨ་རིའི་སྲིད་གཞུང་གི་ལངས་ཕྱོགས་ཁ་གསལ་ཆགས་ཡོད་སྐོར། དེ་ཡང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལས་བྱུང་བ་ཞིག་ཡིན་པ། དེ་བཞིན་བོད་ནང་གི་དངོས་ཡོད་གནས་སྟངས་ལ་བཟང་ཕྱོགས་འགྱུར་བ་གང་ཡང་མེད་ནའང་བོད་མི་ ༡༥༧ ལྷག་གིས་རང་ལུས་མེར་སྲེག་གནང་བ་ལས་བྱུང་བའི་ཤུགས་རྐྱེན་ཡིན་པ་ངོས་འཛིན་གནང་གལ་དང་། ཨ་རིའི་སྲིད་གཞུང་ནས་བོད་ཀྱི་གནས་སྟངས་ཐད་སྲིད་བྱུས་འཛིན་སྟངས་ལ་སྔར་དང་མི་འདྲ་བར་འགྱུར་བ་ཤུགས་ཆེན་འགྲོ་བཞིན་ཡོད་སྐོར། དམིགས་བསལ་སྐུ་ཚབ་དོན་གཅོད་ཀྱི་ངོས་ནས་ཀྱང་འབད་བརྩོན་སྔར་ལྷག་གནང་འཆར་སོགས་གལ་ཆེའི་གསུང་བཤད་གནང་ཡོད།
དམིགས་བསལ་སྐུ་མགྲོན་གཞོན་ལྷན་ཚོགས་ཟུར་དང་བྱང་ཨ་རིའི་བོད་མི་མང་སྤྱི་འཐུས་ལས་ཐོག་བསྟན་འཛིན་འཇིགས་མེད་ལགས་ནས་འཚམས་འདྲི་དང་བཅས་ད་ལེན་གྱི་གཞོན་ལྷན་ ༥༠ དུས་དྲན་དེ་ཡང་འདི་ག་རྒྱལ་གཅེས་དཔའ་བོ་སྟག་སྣ་འཇིགས་བཟང་པོའི་ཚོགས་ཁང་ནང་ཚོགས་རྒྱུ་བྱུང་བ་ནི་དོན་དང་ལྡན་པ་ཡིན་སྐོར་དང་། སྟག་སྣ་འཇིགས་མེད་བཟང་པོ་མཆོག་ནི་དམིགས་བསལ་གྱིས་བོད་ཀྱི་གཞོན་ནུ་ལྷན་ཚོགས་དང་འབྲེལ་བ་གཏིང་ཟབ་ཆགས་ཡོད་པ། ལྷག་པར་བོད་ཀྱི་གཞོན་ནུ་ལྷན་ཚོགས་ཀྱི་རང་བཙན་གཟེངས་རྟགས་ཐོག་མ་དེ་ཕྱི་ལོ་ ༡༩༩༥ ལོར་རྒྱལ་གཅེས་དམ་པ་ཁོང་ལ་ཕུལ་ཡོད་པ། རང་ཉིད་ཀྱང་ཐོག་མར་བྱང་ཨ་རིའི་ཁུལ་གྱི་ས་གནས་གཞོན་ལྷན་དང་འབྲེལ་བ་བྱུང་ཚུལ། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་དེ་གལ་ཆེན་ཡིན་པ། རྒྱ་གཞུང་གིས་རྒྱུན་དུ་གཏོར་བཤིག་གཏོང་གང་ཐུབ་བྱས་དང་བྱེད་མུས་ཡིན་པས་ནམ་ཡང་ཡིད་གཟབ་དགོས་གལ། དེང་སྐབས་བྱང་ཨ་རིའི་ཁུལ་གྱི་གཞོན་སྐྱེས་རྣམས་འགོ་ཁྲིད་ནུས་པ་གསོ་སྐྱོང་ཇི་ལྟར་གནང་ཕྱོགས་སོགས་གསུང་བཤད་གནང་ཡོད།
དེ་རྗེས་སྐུ་མགྲོན་གཙོ་བོ་གཞོན་ལྷན་ཐོག་མར་གསར་འཛུགས་གནང་མཁན་གྱི་གྲས་དང་། བཀའ་བློན་ཁྲི་ཟུར་སྐུ་ངོ་བཀྲས་མཐོང་བསྟན་འཛིན་རྣམ་རྒྱལ་མཆོག་དང་། དམིགས་བསལ་སྐུ་མགྲོན་གཞོན་ལྷན་དབུས་རྒྱུན་ཟུར་པ་དང་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་སྐུ་ངོ་འབུམ་རམས་པ་བློ་བཟང་སེང་གེ་རྣམ་གཉིས་ནས་གཞོན་ལྷན་དབུས་རྒྱུན་ཟུར་པ་རྣམ་པར་གཞོན་ལྷན་ ༥༠ དུས་དྲན་གྱི་ཕྱག་རྟགས་གནང་བ་སོགས་གཞོན་ལྷན་ ༥༠ དུས་དྲན་གྱི་མཛད་སྒོའི་བྱེད་སྒོ་ལས་རིམ་ཁག་ལེགས་པར་གྲུབ་མཚམས་ཉིན་གུང་གསོལ་ཚིག་རྒྱས་པ་འདེགས་འབུལ་ཞུས། དེ་ལྟར་ཉིན་རྒྱབ་ནས་ཕྱི་ཉིན་བར་ཚོགས་བཅར་བ་ས་གནས་གཞོན་ལྷན་ཁག་ལྔའི་སྐུ་ཚབ་ཚོགས་བཅར་བ་དང་། གཞོན་ལྷན་དབུས་རྒྱུན་ཟུར་པ་རྣམས་ཝ་ཤིང་ཀྲོན་ཌེ་སི་གྱི་བོད་མིའི་སྤྱི་ཁང་ནང་བོད་དོན་འཐབ་རྩོད་དང་གཞོན་ལྷན་སྒྲིག་འཛུགས་ཚགས་ཚུད་རྒྱུན་གནས་ཐུབ་སླད་བགྲོ་གླེང་གོ་བསྡུར་སྦྱང་བཤད་གང་ལེགས་བྱུང་ཡོད། དེ་ལྟར་བྱང་ཨ་རིའི་ཁུལ་དུ་གཞོན་ལྷན་ ༥༠ དུས་དྲན་དེ་བཞིན་ཚགས་ཚུད་ལེགས་གྲུབ་བྱུང་བ་ནི། ས་གནས་གཞོན་ལྷན་དང་གནས་བསྡོད་བོད་མི་རྣམས་ནས་ཚོགས་ཡུལ་དང་ཞལ་ལག་སོགས་རིན་མེད་ཐོག་མཐུན་འགྱུར་རོགས་རམ་ཤུགས་ཆེ་གནང་བ་ལ་བརྟེན་ནས་བྱུང་བ་ཞིག་ཡིན་འབྲེལ་ཡོད་ཚང་མར་ཐུགས་རྗེ་ཆེ་ཞེས་ཞུས།