ཨེ་ཤེ་ཡའི་མངའ་ཁོངས་ཀྱི་རྒྱལ་སྤྱིའི་སྤྱི་ཚོགས་གཞོན་ནུའི་ཚོགས་འདུར་མཉམ་ཞུགས།
བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ཨེ་ཤེ་ཡའི་རྒྱལ་སྤྱིའི་སྤྱི་ཚོགས་གཞོན་ནུའི་ཉིན་གཅིག་གི་དྲྭ་ཐོག་ཚོགས་ཆེན་ནང་མཉམ་ཞུགས་ཀྱིས་རྒྱ་ནད་ཏོག་དབྱིབས་རིམས་ནད་དང་འབྲེལ། རྒྱ་ནག་དམར་ཤོག་སྲིད་གཞུང་གིས་བོད་ནང་མཆོད་མཇལ་དང་། ཕྱག་མཆོད་འབུལ་ཐད་དམ་དྲག་བྱེད་ཕྱོགས། དམིགས་བསལ་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་གོ་བསྡུར་ཞུས་ཏེ། བོད་ཀྱི་ཁོར་ཡུག་གི་ཛ་དྲག་གནས་སྟངས་དང་། རྒྱ་ནག་ནང་འཚོགས་ལ་ཉེ་བའི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་སྐྱོན་བརྗོད་ཀྱིས་གྲོས་ཆོད་དོན་ཚན་གཉིས་ཀྱང་བཞག་ཐུབ་པ་བྱུང་ཡོད།
ཚོགས་ཆེན་ཐོག་གཏན་འབེབ་བྱུང་བའི་གྲོས་ཆོད་གཉིས།
༡༽ རྒྱ་ནག་དམར་ཤོག་སྲིད་གཞུང་ནས་བོད་ནང་ཧམ་འཛུལ་གྱིས་བཙན་བཟུང་བྱས་ནས་བཟུང་ད་བར་ཁོར་ཡུག་སྦག་བཙོག་དང་། གཏོར་བཅོམ་ཚད་ལས་འདས་པ་བཏང་བར་སྐྱོན་བརྗོད་ནན་པོ་ཞུ་རྒྱུ་མ་ཟད། ཚོགས་མི་སྒྲིག་འཛུགས་ཁག་ནས་ཀྱང་རྒྱལ་སྤྱིའི་སྡིངས་ཆ་འདྲ་མིན་ཐོག་རྒྱ་ནག་དམར་ཤོག་སྲིད་གཞུང་ལ་ངོ་རྒོལ་སྐྱོན་བརྗོད་ཞུ་རྒྱུ།
༢༽ རྒྱ་ནག་དམར་ཤོག་སྲིད་གཞུང་ནས་བོད་དང་། ཡུ་གུར་གཙོས་པའི་བཙན་བཟུང་བྱས་པའི་རྒྱལ་ཁབ་ཁག་ནང་གཞི་རྩིའི་འགྲོ་བ་མིའི་ཐོབ་ཐང་ལ་བརྩིས་མེད་རྡོག་རོལ་བཏང་དང་གཏོང་བཞིན་པར་ངོ་རྒོལ་སྐྱོན་བརྗོད་ཀྱིས་སླེབས་ལ་ཉེ་བའི་རྒྱ་ནག་གི་དགུན་དུས་ཨོ་རྩལ་འགྲན་ཚོགས་ལ་ཐ་གཅིག་ཏུ་ངོ་རྒོལ་སྐྱོན་བརྗོད་ཞུ་རྒྱུ་ཡིན།