བྱང་ཨ་རིའི་ཁུལ་གྱི་ས་གནས་ཁག་ནང་འཚམས་གཟིགས་སྐོར་སྐྱོད།
བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་ནས་བྱང་ཨ་རིའི་ཁུལ་གྱི་བོད་མི་གནས་སྡོད་ཁག་ཏུ་གཞོན་ལྷན་གྱི་ལས་འགུལ་སྤེལ་ཕྱོགས་དང་། བོད་དོན་གཏམ་བཤད་སྐོར་སྐྱོད་ཀྱི་ལས་འགུལ་སྤེལ་སླད་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་དང་། སྒྲིག་འཛུགས་འགན་འཛིན་སྤེན་པ་ཚེ་རིང་ལགས་རྣམ་གཉིས་ཕྱི་ལོ་ ༢༠༢༡ ཟླ་ ༡༡ ཚེས་ ༢༤ ཉིན་རྒྱ་གར་རྒྱལ་ས་ལྡི་ལི་ནས་ཕེབས་ཐོན་གྱིས་ཕྱི་ལོ་ ༢༠༢༡ ཟླ་ ༡༢ ཚེས་ ༩ ཉིན་ཆི་ཁ་གོ་(Chicago )ས་གནས་བོད་མི་རྣམས་ལ་མཇལ་འཕྲད་ཀྱིས་གཞོན་ལྷན་གྱི་ལས་འགུལ་སྤེལ་ཕྱོགས་དང་། བོད་ནང་གི་ཛ་དྲག་གནས་སྟངས། བོད་དོན་ལས་འགུལ་ནང་མཉམ་བཞུགས་ཀྱིས་ནུས་པ་མཉམ་སྤུངས་བྱ་རྒྱུའི་གལ་གནད་སོགས་ཀྱི་ཐད་གཏམ་བཤད་གནང་ཡོད། ཕྱི་ཚེས་ ༡༠ ཉིན་ས་གནས་གཞོན་ལྷན་དང་། ཝི་སི་ཀོན་སིན་བོད་རིགས་སྤྱི་མཐུན་ཚོགས་པའི་གོ་སྒྲིག་མཐུན་འགྱུར་འོག་བྱང་ཨ་རིའི་ཝི་སི་ཀོན་སིན་བོད་རིགས་གནས་སྡོད་ཁུལ་དུ་གཏམ་བཤད་སྐོར་སྐྱོད་ཀྱི་ལས་འགུལ་ལེགས་གྲུབ་བྱུང་ནས་ས་གནས་གཞོན་ལྷན་དང་བོད་རིགས་སྤྱི་མཐུན་ཚོགས་པར་ཐུགས་རྗེ་ཆེ་ཞུས།
དེ་བཞིན་སྤྱི་ལོ་ ༢༠༢༡ ཟླ་ ༡༢ ཚེས་ ༡༡ ཉིན་མི་ནི་སོ་ཊ་ས་གནས་གཞོན་ལྷན་ནས་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་ངོ་རྒོལ་སྐད་འབོད་ཀྱི་ལས་འགུལ་ཞིག་གོ་སྒྲིག་ཞུས་ཡོད་པར་མཉམ་ཞུགས་ཞུས། ཕྱི་ཚེས་ ༡༣ ཉིན་ས་གནས་མི་ནི་སོ་ཊའི་རྒྱུད་སྟོད་དགོན་པ་རུ་བོད་ནང་གི་ཛ་དྲག་གནས་སྟངས་དང་། བོད་དོན་གྱི་ལས་འགུལ་ཐོག་ནུས་པ་མཉམ་སྤུངས་བྱ་རྒྱུའི་ཐད་གཏམ་བཤད་ལས་རིམ་ཐད་གཏོང།
ཕྱི་ཚེས་ ༡༤ ཉིན་མི་ནི་སོ་ཊ་ས་གནས་གཞོན་ལྷན་གྱི་གོ་སྒྲིག་འོག་ས་གནས་བོད་མི་རྣམས་ལ་མཇལ་འཕྲད་ཀྱིས་གཞོན་ལྷན་གྱི་ལས་འགུལ་སྤེལ་ཕྱོགས་དང་། བོད་ནང་གི་ཛ་དྲག་གནས་སྟངས། བོད་དོན་ལས་འགུལ་ནང་མཉམ་བཞུགས་ཀྱིས་ནུས་པ་མཉམ་སྤུངས་བྱ་རྒྱུའི་གལ་གནད་སོགས་ཀྱི་ཐད་གཏམ་བཤད་གནང་ཡོད། ཕྱི་ཚེས་ ༡༥ ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་བཀུར་འོས་བོད་མི་མང་སྤྱི་འཐུས་བསྟན་འཛིན་འཇིགས་མེད་ལགས་ཀྱི་གོ་སྒྲིག་འོག་ཨ་རིའི་གྲོས་ཚོགས་འཐུས་མི་(Senator Tina Smith ) ལགས་ཀྱི་ལས་བྱེད་གཉིས་དང་ལྷན་དྲྭ་ཐོག་ནས་མཇལ་འཕྲད་ཀྱིས་གཞོན་ལྷན་སྒྲིག་འཛུགས་ངོ་སྤྲོད་དང་། བོད་ནང་གི་ཛ་དྲག་གནས་སྟངས་སོགས་སྙན་གསེང་ཞུས་ཡོད་པ་མ་ཟད། བྷ་ཌེན་སྲིད་གཞུང་ནས་རྒྱ་ནག་ནང་འཚོགས་རྒྱུའི་དགུན་དུས་ཨོ་རྩལ་འགྲན་ཚོགས་ལ་གཞུང་འབྲེལ་མི་སྣ་ཆེད་གཏོང་གནང་རྒྱུ་མིན་པའི་ཐག་གཅོད་གནང་བར་ཐུགས་རྗེ་ཆེ་ཡང་ཞུས།
ཕྱི་ཚེས་ ༡༧ ཉིན་སི་ཡ་ཀྲལ་(Seattle )ས་གནས་གཞོན་ནུའི་གོ་སྒྲིག་འོག་སི་ཡ་ཀྲལ་ས་གནས་བོད་མི་རྣམས་ལ་མཇལ་འཕྲད་ཀྱིས་གཞོན་ལྷན་གྱི་ལས་འགུལ་སྤེལ་ཕྱོགས་དང་། བོད་ནང་གི་ཛ་དྲག་གནས་སྟངས། བོད་དོན་ལས་འགུལ་ནང་མཉམ་བཞུགས་ཀྱིས་ནུས་པ་མཉམ་སྤུངས་བྱ་རྒྱུའི་གལ་གནད་སོགས་ཀྱི་ཐད་གཏམ་བཤད་སྤེལ་ཡོད། སྐབས་དེར་བོད་ཀྱི་གཞོན་ནུ་ལྷན་ཚོགས་ལ་ཡུན་རིང་དཔལ་འབྱོར་རྒྱབ་སྐྱོར་གནང་མཁན་ངག་དབང་ཆོས་སྒྲོན་ལགས་དང་ས་གནས་གཞོན་ནུའི་སློབ་སྟོན་པ་དཀོན་མཆོག་མགོན་པོ་ལགས་གཉིས་སུ་ཐུགས་རྗེ་ལེགས་གསོལ་གྱི་བྱ་དགའ་ཡང་ཕུལ་ཡོད། ཕྱི་ཚེས་ ༢༠ ཉིན་པོཌེ་ལེན་ཌེ་(Portland)ས་གནས་གཞོན་ནུས་གོ་སྒྲིག་འོག་ས་གནས་བོད་མི་རྣམས་ལ་མཇལ་འཕྲད་ཀྱིས་གཞོན་ལྷན་གྱི་ལས་འགུལ་སྤེལ་ཕྱོགས་དང་། བོད་ནང་གི་ཛ་དྲག་གནས་སྟངས། བོད་དོན་ལས་འགུལ་ནང་མཉམ་བཞུགས་ཀྱིས་ནུས་པ་མཉམ་སྤུངས་བྱ་རྒྱུའི་གལ་གནད་སོགས་ཀྱི་ཐད་གཏམ་བཤད་སྐོར་སྐྱོད་གནང་ཡོད།
