ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་དང་མཇའ་འཕྲད།
ཕྱི་ལོ་ ༢༠༢༢ ཟླ་ ༣ ཚེས་ ༩ ཉིན་རྒྱབ་ཕྱག་ཚོད་ ༢ པ་ནས་ ༤ བར་གཞོན་ལྷན་ཡིག་ཚང་ནང་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཇི་རི་ཨོ་བྷི་ལེ་རྫར་ (Jiri Oberfalzer, Vice President of the Czech Senate) མཆོག་དང་། སྐུ་ཞབས་ཁོང་གི་སློབ་སྟོན་པ། ཅེག་གཞུང་ཚབ་ཁང་གི་དྲུང་ཆེ། དེ་བཞིན་སྣེ་ལེན་པ་དང་། སྐད་སྒྱུར་ལས་བྱེད་བཅས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཡིག་ཚང་དུ་ཆེད་ཕེབས་ཀྱིས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ལྔའི་འཐུས་མི་དང་ལྷན་དུ་བོད་ནང་གི་ཛ་དྲག་གནས་སྟངས་ཐད་བཀའ་བསྡུར་ཞིབ་ཕྲ་བྱུང་ཡོད་པ་མ་ཟད།
གཞོན་ལྷན་ཟུང་དྲུང་ཚེ་དབང་རབ་རྒྱས་ལགས་ནས་ཅེག་སྤྱི་མཐུན་རྒྱལ་ཁབ་དང་གྲོས་ཚོགས་འཐུས་མི་རྣམ་པའི་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུའི་གོ་སྐབས་ཡང་བྱུང་ཡོད།