དེ་རིང་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་རྣམས་དམིགས་བསལ་ཚོགས་འདུ་ཞིག་འཚོགས་ནས་ཚོགས་ཆེན་དང་འགན་འཛིན་ལྷན་ཚོགས་སྐབས་གཏན་འབེབས་བྱས་པའི་གྲོས་གཞི་དང་གྲོས་ཆོད་ཁག་ལ་བསྐྱར་ཞིབ་བྱས་ཡོད། ང་ཚོ་གཞོན་ལྷན་ཁྱིམ་ཚང་གཅིག་ཡིན་པའི་ཆ་ནས་བོད་དོན་འཐབ་རྩོད་ཀྱི་ལས་འགུལ་ལ་དམིགས་པའི་གྲོས་ཆོད་མང་པོ་མཉམ་དུ་བཞག་སྟེ་དེ་དག་ལག་བསྟར་བྱེད་པའི་འགན་འཁྲི་ང་ཚོར་སྤྲད་ཡོད། དབུས་རྒྱུན་ལས་ཁང་ནས་གྲོས་ཆོད་རེ་རེའི་དགོངས་དོན་རྣམས་དོན་འཁྱོལ་ལག་བསྟར་བྱེད་རྒྱུའི་སྤྱི་མོས་ཁས་ལེན་ཆ་ཚང་བྱས་ཡོད།
རྒྱ་དམར་སྲིད་གཞུང་གིས་ཉེ་ཆར་ཁམས་རྫ་ཆུ་ཁར་གསེར་གྱི་གཏེར་ཁ་སྔོག་འདོན་སྐབས་བོད་མི་གྲངས་ ༨༠ འཛིན་བཟུང་གི་ཛ་དྲག་གནས་བབ་ལ་བོད་ཀྱི་གཞོན་ནུ་ལྷན་ཚོགས་དང་གཞུང་འབྲེལ་མ་ཡིན་པའི་ཚོགས་པ་ཁག་བཞིའི་ཉིན་སྐྱོང་ཅིག་ངོ་རྒོལ་སྐྱོན་བརྗོད་ལས་འགུལ་གྱི་བརྙན་ཐུང།
བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ལོ་ ༢༠༢༥ ལོའི་རྒྱ་གར་དང་། བལ་ཡུལ། འབྲུག་བཅས་ཀྱི་འཛིན་རིམ་བཅུ་གཉིས་པའི་བོད་ཡིག་ཡིག་རྒྱུགས་ཀྱི་ཨང་དང་པོ་བྱ་དགའ་ཐོབ་མཁན་ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་ནས་ཡིན་པའི་བོད་ཕྲུག་བསྟན་འཛིན་ཚེ་དབྱངས་ལགས་ལ་འཚམས་འདྲི་ཞུས་ཡོད།
བྱ་དགའ་དེ་ཕུན་ཚོགས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དང་ས་གནས་བོད་ཀྱི་གཞོན་ནུ་ལྷན་ཚོགས་ནས་ཕུལ་གནང་ཡོད།
རྒྱ་གར་རྒྱལ་ས་ལྡི་ལིར་དགུན་དུས་གྲོས་ཚོགས་(Winter session)དུས་སྐབས་སུ་བོད་ཀྱི་གཞོན་ནུ་ཚོགས་པའི་དྲུང་ཆེ་བསྟན་འཛིན་བློ་བཟང་མཆོག་དང་། དྷ་རམ་ས་ལར་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ལྷན་རྒྱ་གར་གྲོས་ཚོགས་འཐུས་མི་གང་མང་མཇལ་རྒྱུའི་འབད་བརྩོན་ཐོག་དོན་མཚན་བཞི་ཅན་གྱི་ཞུ་འབོད་དང་བཅས་གྲོས་ཚོགས་འཐུས་མིར་དོན་མཚན་དེ་དག་གྲོས་ཚོགས་སྐབས་སུ་གྲོས་གཞིར་གླེང་སློང་དང་གྲོས་ཆོད་གཏན་འབེབས་ཡོང་སླད་རེ་བ་དང་འབོད་སྐུལ་ཞུ་བཞིན་ཡོད། ད་བར་རྒྱ་གར་གྲོས་ཚོགས་ཚོགས་མི་དགུ་མཇལ་བར་གྲོས་ཚོགས་མཐུན་མི་ཚང་མས་རྒྱབ་བསྐྱོར་བཤུགས་ཆེར་བྱུང་བ་དང་། ད་དུང་ཡང་གྲོས་ཚོགས་འཐུས་མི་མང་པོ་མཇལ་ཐུབ་པའི་རེ་བ་དང་འབད་བརྩོན་ཞུ་བཞིན་ཡོད།
བོདཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ།
རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མ་ོདང་། བོད་མིའི་་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ མཆོག་ལ་ནོ་བལ་ཞི་བདེའི་གཟེངས་རྟགས་འབུལ་བཞེས་མཛད་པའི་ཉིན་མོའ་དུས་དྲན་སྲུང་བརྩི་འི་བསྒྲགས་གཏམ།
དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཐེངས་ ༧༧ པ་སྲུང་བརྩི་ཞུ་བའི་ཉིན་མོ་ཡིན་པ་དང༌། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་དྲན་ཉིན་མོ་ཐེངས་ ༣༦ པ་སྲུང་བརྩི་ཞུ་བའི་ལོ་རྒྱུས་རང་བཞིན་ཅན་གྱི་གལ་ཆེའི་ཉིན་མོ་ཞིག་ཡིན། འཛམ་གླིང་དམག་ཆེན་དང་པོ་དང་གཉིས་པ་བརྒྱུད་རྒྱལ་ཁབ་དང་མིའི་རིགས་ལ་དཀའ་སྡུག་ཚད་ལས་བརྒལ་བ་ཞིག་བྱུང་བར་བརྟེན་ཕྱི་ལོ་ ༡༩༤༨ ཟླ་ ༡༢ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ནས་འགྲོ་བ་མིའི་གཞི་རྩའི་ཐོབ་ཐང་སྲུང་སྐྱོབས་ཐད་རྩ་དོན་འཛིན་པའི་རྒྱལ་སྤྱིའི་རང་བཞིན་གྱི་དོན་ཚན་ ༣༠ ཅན་གྱི་ཡིག་ཆ་ཞིག་བཞག་ཡོད་པ་དེ་ནས་བཟུང་དུས་ཚིགས་དེར་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་གཏན་འབེབས་བྱུང་ཡོད། དེ་བཞིན་རྒྱ་དམར་སྲིད་གཞུང་གིས་བོད་དུ་དྲག་པོས་བཙན་བཟུང་བྱས་ནས་བོད་དང་བོད་མིར་དཀའ་སྡུག་ཚད་ལས་བརྒལ་བ་སྤྲད་པར་བརྟེན། བོད་དང་བོད་མིའི་བདེ་སྡུག་སེལ་སླད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འཚེ་མེད་ཞི་བའི་ལྟ་གྲུབ་ཀྱི་ཐོག་ནས་བོད་དོན་བདེན་པའི་འཐབ་རྩོད་གནང་བ་དང༌། ལྷག་པར་འཛམ་གླིང་ཞི་བདེ་ཡོང་སླད་རིས་མེད་སྐྱེ་འགྲོ་ཐམས་ཅད་ལ་བྱམས་པ་དང་བརྩེ་བས་ཕན་བདེའི་མཛད་པ་རླབས་ཆེན་བསྐྱངས་དང་སྐྱོང་བཞིན་པར་བརྟེན། ཕྱི་ལོ་ ༡༩༨༩ ཟླ་ ༡༢ ཚེས་ ༡༠ ཉིན་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ད་བར་ལོ་ ༣༦ ཧྲིལ་པོ་འཁོར་བཞིན་ཡོད་སྟབས་དུས་ཚིགས་འདི་གཉིས་ཀྱི་རྒྱབ་ལྗོངས་ན་ཧ་ཅང་ཡ་ང་ཞིང་ཡིད་སྐྱོ་དགོས་པའི་ལོ་རྒྱུས་ཡུན་རིང་ལྡན་པའི་གལ་ཆེའི་ཉིན་མོ་ཞིག་ཡིན་པ་རྗེས་སུ་དྲན་པའི་སྒོ་ནས་དེ་རིང་གི་གལ་ཆེའི་དུས་དྲན་ཉིན་མོ་འདི་སྲུང་བརྩི་ཞུ་རྒྱུ་ཡིན།
རྒྱ་དམར་སྲིད་གཞུང་གིས་བོད་དུ་དྲག་པོའི་བཙན་འཛུལ་བྱས་པ་ནས་བཟུང་བོད་མི་ས་ཡ་གཅིག་ལྷག་དམར་གསོད་བཏང་ཟིན་པ་དང༌། བོད་པའི་ཆོས་དང་རིག་གཞུང་སློབ་གཉེར་བྱེད་སའི་བསྟི་གནས་བོད་མདོ་དབུས་ཁམས་གསུམ་གྱི་དགོན་སྡེ་གྲྭ་ཚང་ཆེ་ཁག་རྩ་གཏོར་དང་གཏོར་བཤིག་ཚབས་ཆེན་བཏང་ཡོད་པ་མ་ཟད། བོད་ཀྱི་ཆོས་དང་རིག་གཞུང༌། ཡུལ་སྲོལ་གོམས་གཤིས་དང་བཅས་པ་རྩ་མེད་བཟོ་ཆེད་བོད་ཕྲུག་རྣམས་རང་གི་ཕ་མ་དང་ཁ་བྲལ་དུ་བཏང་ནས་བཅའ་སྡོད་སློབ་གྲྭ་ཁག་ལ་བཙན་འཇུགས་ཀྱིས་དམར་ཤོག་གི་ལྟ་བ་དང་སློབ་གསོ་བཙན་ཁྲིད་བྱས་མི་རིགས་ཀྱི་ངོ་བ་སྒྱུར་བའི་སྲིད་བྱུས་སྤེལ་ནས་སྡུག་སྦྱོང་མནར་གཅོད་བཏང་དང་གཏོང་བཞིན་ཡོད། དེ་བཞིན་བོད་ནང་གི་འགྲོ་བ་མིའི་ཐོབ་ཐང་གནས་བབ་ལ་རྩིས་མེད་རྡོག་རོལ་གྱིས་ཉེས་མེད་འཛིན་བཟུང་བཙོན་འཇུག་བྱས་པའི་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གི་གཙོས་བོད་ནང་གི་ཆབ་སྲིད་བཙོན་པ་རྣམས་ལ་སྡུག་སྦྱོང་མནར་གཅོད་དང༌བོད་མིའི་རིགས་རྫས་བསྡུ་ལེན། ཆོས་དད་རང་དབང༌སྨྲ་བརྗོད་རང་དབང༌། བོད་སྐད་ཡིག་སྦྱོང་སྤྱོད་སྤེལ་གསུམ་གྱི་རང་དབང༌། འགྲོ་འདུག་གི་རང་དབང་སོགས་མེད་པར་ཉིན་མཚན་དུས་དྲུག་ཏུ་དམ་དྲག་སྲིད་བྱུས་འོག་བོད་མི་རྣམས་དཀའ་སྡུག་ཚད་མེད་མྱངས་དང་མྱོང་བཞིན་ཡོད། དེར་བརྟེན་བོད་ཕྱི་ནང་གཉིས་ནས་ད་བར་བོད་མི་རྒྱལ་གཅེས་དཔའ་བོ་དཔའ་མོ་གྲངས་ ༢༠༠ མ་ཟིན་ཙམ་གྱིས་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་ཡོངས་སུ་བློས་གཏོང་གིས་རང་ལུས་མེར་སྲེག་ཀྱང་བཏང་ཡོད། འདི་ནི་འཛམ་གླིང་རྒྱལ་སྤྱིའི་ཐོག་རང་དབང་རང་བཙན་དང་དྲང་བདེན་གྱི་ཆེད་རང་ལུས་མེར་སྲེག་གནང་མཁན་གྲངས་འབོར་མང་ཤོས་ཀྱི་མི་རིགས་ཤིག་ཡིན།
ཡང་སྒོས་བོད་མདོ་དབུས་ཁམས་གསུམ་གྱི་ས་ཁུལ་འདྲ་མིན་ནང་གཏེར་ཁ་སྔོག་འདོན་དང་། ཤིང་ནག་གཅོད་བྲེགས། ཆུ་མཛོད་གསར་རྒྱག་གཙང་ཆུ་ཁ་སྒྱུར། གློག་ཁང་འཛུགས་སྐྲུན། རྡུལ་ཕྲན་ཚོན་ཆའི་བཟོ་གྲྭ་སོགས་འཛུགས་སྐྲུན་ཚོད་མེད་བྱས་ཏེ་བོད་ཀྱི་རྩ་ཆེའི་ལོ་རྒྱུས་རང་བཞིན་ཅན་གྱི་གནས་རི་དང་ཡུལ་ལུང་ཁག་ལ་གཏོར་བཤིག་དང༌། རྡབ་གསིགས་ཚབས་ཆེན་བཏང་བ་སོགས་ལ་བརྟེན་བོད་མཐོ་སྒང་གི་སྐྱེ་ཁམས་ཁོར་ཡུག་ལ་འགྱུར་བ་ཆེན་པོ་ཕྱིན་ཏེ་ད་ཆ་བོད་ཀྱི་ཁྱིམ་མཚེས་རྒྱལ་ཁབ་ཁག་དང་ཧི་མ་ལ་ཡའི་རི་རྒྱུད་དུའང་འབྱུང་བཞིའི་གོད་ཆགས་ཚབས་ཆེ་བྱུང་ནས་ཨེ་ཤེ་ཡའི་མི་མང་ས་ཡ་མང་པོའི་འཚོ་གནས་ལ་དཀའ་ངལ་སྤྲད་དང་སྤྲོད་མུས་ཡིན་པ་དེ་རེད། རྒྱ་དམར་སྲིད་གཞུང་གིས་མཉམ་འབྲེལ་རྒྱལ་ཚོགས་གཙོ་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚན་པ་ཁག་ལ་རྩིས་མེད་རྡོག་རོལ་དང་རྒྱལ་སྤྱིའི་ཁྲིམས་དང་འགལ་བའི་ཐོག་བོད་མི་གཙོ་བྱས་པའི་ཡུ་གུར་དང༌། ཧོང་ཀོང༌། ལྷོ་སོག་མི་རིགས་ལ་རྒྱལ་མཚམས་ལས་བརྒལ་བའི་དྲག་མནོན་སྲིད་བྱུས་འོག་དངོས་ཤུགས་བརྒྱུད་གསུམ་ནས་རྒྱལ་སྤྱིའི་སྤྱི་ཚོགས་ནང་མིའི་གསང་ཉུལ་བཏང་ནས་ལྐོག་གསོད་དང་དཀྲུག་རྐྱེན་བཟོ་བ། དྲྭ་ཐོག་ནས་གསང་འཛུལ་གྱིས་རྒྱལ་ཁབ་དང་ཚོགས་སྒེར་ཁག་གི་གསང་བ་དང་ཡིག་ཆ་རྐུ་འཁྱེར་བྱས་དང་བྱེད་མུས་ཀྱིས་བཙན་བྱོལ་བོད་མིའི་སྤྱི་ཚོགས་ཙམ་མ་ཟད། རྒྱལ་སྤྱིའི་སྤྱི་ཚོགས་ཀྱི་ཞི་བདེ་དང་དྲྭ་རྒྱའི་བདེ་འཇགས་སོགས་ལ་ཉེན་ཁ་ཚབས་ཆེན་བཟོ་མུས་ཡིན་པ་རེད།
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་སྐུ་འཁོར་བཀའ་ཤག་དང་བཅས་བོད་མི་རྣམས་བཙན་བྱོལ་དུ་ཕེབས་མ་ཐག་པ་ནས་བཟུང་། བོད་དང་བོད་མིའི་ཛ་དྲག་གི་གནས་བབ་རྒྱལ་སྤྱིའི་མཉམ་འབྲེལ་རྒྱལ་ཚོགས་དང༌འགྲོ་བ་མིའི་ཐོབ་ཐང་ཚན་པ་ཁག་དེ་བཞིན་སྲིད་གཞུང་དང་གྲོས་ཚོགས་ཁག་བཅས་པར་ཞུ་གཏུགས་ལས་འགུལ་རིམ་པར་སྤེལ་ཏེ་ད་བར་ལོ་ངོ་ ༦༦ ལྷག་འགྲོ་བཞིན་ཡོད་མོད། དེང་སྐབས་རྒྱལ་སྤྱིའི་སྤྱི་ཚོགས་ནང་འགྲོ་བ་མིའི་ཐོབ་ཐང་དང་། རང་དབང་དང་ཞི་བདེ་འཆམ་མཐུན་བཅས་གཙིགས་ཆེར་འཛིན་པའི་སྐབས་དེར་རྒྱ་དམར་སྲིད་གཞུང་གི་སྡུག་རྩུབ་ཅན་གྱི་སྲིད་བྱུས་འོག་བོད་ནང་གི་བོད་མི་རྣམས་ཀྱི་གནས་བབ་དང༌། རིག་གཞུང་དང་ཆབ་སྲིད་ཀྱི་གནས་བབ། འགྲོ་བ་མིའི་ཐོབ་ཐང་གི་གནས་བབ། བོད་ཀྱི་ཁོར་ཡུག་གི་གནས་བབ་སོགས་ལོ་རེ་ནས་ལོ་རེར་ཇེ་སྡུག་ཇེ་ཞན་དང་། ཧ་ཅང་ཛ་དྲག་ཏུ་འགྲོ་བཞིན་ཡོད་སྟབས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཇི་སྲིད་བོད་རང་དབང་རང་བཙན་མ་ཐོབ་ཀྱི་བར་དེ་སྲིད་དུ་དགྲ་རྒྱ་དམར་སྲིད་གཞུང་ལ་ཁ་གཏད་གདོང་ལེན་མཐའ་གཅིག་ཏུ་བྱས་ཏེ་གཞི་རྒྱ་ཆེ་བའི་ལས་འགུལ་སྔར་ལྷག་ནུས་ཤུགས་ལྡན་པ་སྤེལ་རྒྱུ་ཡིན་ཞེས་ནན་བརྗོད་བྱེད་རྒྱུ་ཡིན།
དམིགས་བསལ་བོད་ནང་གི་ཛ་དྲག་གནས་བབ་ཡིད་ལ་བཟུང་ཐོག་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་སྤྱི་སྒེར་ཡོངས་ནས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན གོ་སྐབས་དམ་འཛིན་གྱིས་ཆབ་སྲིད་ཀྱི་ལྟ་བ་ལངས་ཕྱོགས་ཇི་ལྟར་ཡིན་མིན་ལ་མ་ལྟོས་པར་རང་རེའི་བཙན་བྱོལ་བོད་མི་རྣམས་རྡོག་རྩ་གཅིག་སྒྲིལ་གྱིས་བོད་དོན་འཐབ་རྩོད་ཀྱི་ལས་འགུལ་སྔར་ལྷག་སྤེལ་ཤུགས་ཇེ་ཆེར་གཏོང་དགོས་པ་དང༌། ལྷག་པར་སྤྱི་ཚོགས་ནང་ཆབ་སྲིད་ཀྱི་འཁྲུག་ཆ་ཆེ་བའི་དུས་སྐབས་སུ་བོད་མི་སྤྱི་སྒེར་ཚང་མས་རང་འགན་རང་འཁུར་གྱིས་ཕྱི་ནང་དང་དགྲ་གཉེན་ངོ་ཤེས་པའི་ཐོག་ཇི་སྲིད་བོད་དོན་བདེན་མཐའ་མ་སེལ་བར་དེ་སྲིད་རང་མི་རིགས་ཀྱི་རྩ་ཆེའི་རིག་གཞུང་དེ་དག་མི་ཉམས་རྒྱུན་འཛིན་དང༌། བོད་དོན་འཐབ་རྩོད་ཀྱི་ནུས་པ་རྒྱུན་གནས་ཐུབ་རྒྱུར་འབད་བརྩོན་སྔར་ལྷག་གནང་དགོས་རྒྱུ་མ་ཟད་དེང་འདིར་གཞིས་བྱེས་བོད་མི་ཡོངས་རྫོགས་སྡུག་ན་མཉམ་སྡུག་དང༌། སྐྱིད་ན་མཉམ་སྐྱིད་ཡིན་པའི་འདུ་ཤེས་གཏིང་ཟབ་འཛིན་པའི་ཐོག་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་སྤྱི་སྒེར་ཚང་མས་འགན་འཁུར་དགོངས་བཞེས་ཀྱིས་རྡོག་རྩ་གཅིག་སྒྲིལ་དགོས་རྒྱུར་དྲན་སྐུལ་ཞུ་རྒྱུ་ཡིན། ལྷག་པར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པ་གཙོ་བྱས་པའི་རྒྱལ་སྤྱིའི་སྲིད་གཞུང་དང་གྲོས་ཚོགས་འཐུས་མི་རྣམ་པ། འགྲོ་བ་མིའི་ཐོབ་ཐང་ཚན་པ་ཁག། དེ་བཞིན་བོད་དོན་རྒྱབ་སྐྱོར་བ་ཚོགས་སྒེར་ཁག། མང་གཙོ་དང་རང་དབང་དོན་གཉེར་བ་ཁག་བཅས་ནས་འཛམ་གླིང་གི་ཁོར་ཡུག་དང༌། འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་སླད་འགན་འཁུར་དགོངས་བཞེས་ཀྱིས་སྔར་ལྷག་རྒྱ་དམར་སྲིད་གཞུང་ལ་གནོན་ཤུགས་དང་བོད་དོན་བདེན་པའི་འཐབ་རྩོད་ཐད་རྒྱབ་སྐྱོར་མུ་མཐུད་གནང་སྐྱོང་ཡོང་བའི་འབོད་སྐུལ་ཤུགས་དྲག་ཞུ་རྒྱུ་ཡིན།
མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང༌། གཞིས་བྱེས་བོད་མི་མཉམ་འཛོམས་ཀྱིས་རང་དབང་རང་བཙན་གྱི་ཉི་མ་མགྱོགས་ནས་མྱུར་དུ་འཆར་བའི་བཀྲ་ཤིས་སྨོན་འདུན་གྲངས་མེད་དང་བཅས། །
བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས།
བོད་རྒྱལ་ལོ་ ༢༡༥༢ ཕྱི་ལོ་ ༢༠༢༥ ཟླ་ ༡༢ ཚེས་ ༡༠ ཉིན།
བོད་ཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ། 10 December Press ststement (English) तिब्बती युवा कांग्रेस की वक्तव्य । 稿子12.10
༸རྒྱལ་བའི་བཀའ་དྲིན་རྗེས་དྲན་གྱི་བསྒྲགས་གཏམ།
དེ་རིང་ནི་བོད་ཀྱི་ལོ་རྒྱུས་ནང་ཧ་ཅང་བརྗེད་དུ་མེད་པའི་གལ་ཆེའི་ཉིན་མོ་ཞིག་ཡིན། ལྕགས་སྟག་ཕྱི་ལོ་ ༡༩༥༠ ལོར་བོད་ཤར་ཕྱོགས་ཆབ་མདོ་ཁུལ་དུ་དགྲ་བོ་རྒྱ་དམར་སྲིད་གཞུང་གི་དྲག་པོའི་དམག་གིས་གནམ་ས་གཉིས་ནས་ཁྲིམས་འགལ་གྱིས་བཙན་འཛུལ་བྱས་ཏེ་བོད་ཀྱི་ཆབ་སྲིད་གནས་བབ་ཧ་ཅང་ཛ་དྲག་འོག་གནས་དགོས་བྱུང་ཡོད་པ་དང་། དེ་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བཅུ་དྲུག་ལས་མ་ཕེབས་ཀྱང་བོད་ལྗོངས་ལྷ་མི་ཡོངས་ཀྱི་རེ་འདུན་ལྟར་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་ལུགས་གཉིས་ཆབ་སྲིད་ཀྱི་ཐུགས་འགན་བསྐྱེད་བཞེས་མཛད་དེ་ལོ་ངོ་ ༧༥ ཧྲིལ་པོ་འཁོར་བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་སའི་རྒྱུན་ལས་ཚོགས་མི་ཡོངས་ནས་དགའ་དད་སྤྲོ་གསུམ་གྱིས་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་སྦྲགས། ༸མགོན་པོ་གང་ཉིད་མཆོག་ནས་བོད་མི་རིགས་དང་རྒྱལ་ཁབ། ཆོས་དང་རིག་གཞུང་སོགས་བསྲུང་སྐྱོབ་ཀྱི་ཆེད་དབུ་ཁྲིད་ཀྱི་མཛད་འགན་རླབས་པོ་ཆེ་བཞེས་གནང་མཛད་པར་ཐུགས་རྗེ་བཀའ་དྲིན་བླ་མེད་དུ་ཆེ། ཆེ། ཆེ་ཞེས་ཞུ་རྒྱུ་དང་།
ཉིན་མོ་འདི་ནས་བཟུང་༸མགོན་པོ་གང་ཉིད་མཆོག་ནས་ཐུགས་དམ་བླ་ན་མེད་པ་བསྐྱེད་བཞེས་ཀྱིས་སྤྱིར་སྐྱེ་འགྲོ་ཡོངས་དང་། ཡང་སྒོས་བོད་བསྟན་སྲིད་མི་རིགས་རིག་གཞུང་དང་བཅས་པ་སྣུམ་ཟད་ཀྱི་མར་མེ་ལྟར་གྱུར་བའི་ཧ་ཅང་ཡ་ང་ཞིང་ཡིད་སྐྱོ་དགོས་པའི་ཛ་དྲག་གི་གནས་བབ་ལས་སྐྱོབ་གནང་མཛད་པ་ནི་བོད་མི་རིགས་ཀྱི་ལོ་རྒྱུས་ནང་སྔར་བྱུང་མྱོང་མེད་པའི་ལོ་རྒྱུས་རང་བཞིན་གྱི་གལ་ཆེའི་ཉིན་མོ་ཞིག་ཡིན་པ་དང་། བོད་མི་ཡོངས་ཀྱིས་ནམ་ཡང་བརྗེད་ཐབས་མེད་པའི་ཉིན་མོ་ཞིག་ཡིན་པ་མ་ཟད་ཁོང་གི་ཐུགས་རྗེ་བཀའ་དྲིན་རྗེས་སུ་དྲན་དགོས་པའི་ཉིན་མོ་ཞིག་ཀྱང་ཡིན།
མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གསང་གསུམ་མཛད་འཕྲིན་མཐའ་ཡས་པའི་བཀའ་དྲིན་རྗེས་སུ་དྲན་པའི་སྒོ་ནས་༸མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་དགོངས་ཡོངས་སུ་རྫོགས་ནས་གཞིས་བྱེས་བོད་མི་ཡོངས་རྫོགས་མཉམ་འཛོམས་ཀྱི་ཉིན་མ་མགྱོགས་ནས་མྱུར་དུ་འཆར་བའི་བཀྲ་ཤིས་སྨོན་འདུན་གྲངས་མེད་དང་བཅས། །
བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་ནས།
བོད་རྒྱལ་ལོ་ ༢༡༥༢ ཕྱི་ལོ་ ༢༠༢༥ ཟླ་ ༡༡ ཚེས་ ༡༧ ཉིན།
བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་མཆོག་དང་ཟུང་དྲུང་ཚེ་རིང་ཆོས་འཕེལ་མཆོག་རྣམ་གཉིས་ཕྱི་ལོ་ ༢༠༢༥ ཟླ་ ༣ ཚེས་ ༧ ཉིན་བྱང་ཨ་རིའི་བོད་རིགས་གནས་སྡོད་ས་གནས་ཁག་ཏུ་གཏམ་བཤད་སྐོར་སྐྱོད་ལ་དམིགས་ཏེ་ཕྱོགས་ཐོན་གྱིས་སྤྱི་ཚེས་ ༡༠ ཉིན་ཨ་རིའི་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་གོ་སྒྲིག་ཞུས་པའི་བོད་མིའི་རང་དབང་སྒེར་ལངས་ཐེངས་ ༦༦ པ་སྲུང་རྩིའི་ལས་རིམ་ནང་མཉམ་ཞུགས་དང་། གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་གཏམ་བཤད་ཀྱང་སྤེལ་གནང་ཡོད། དེའི་རྗེས་སྤྱི་ཚེས་ ༢༤ ཉིན་བྷོ་སེ་ཊོན་དུ་ཆེད་ཕེབས་ཀྱིས་གཞོན་ལྷན་དབུས་རྒྱུན་ཟུར་པ་དང་དཔལ་ལྡན་སྲིད་ཟུར་འབུམ་རམས་པ་མཁས་དབང་བློ་བཟང་སེང་གེ་མཆོག་དང་མཇལ་འཕྲད་གཙོས་ས་གནས་མང་ཚོགས་ལ་གཏམ་བཤད་གནང་ཡོད། སྤྱི་ཟླ་ ༣ ཚེས་ ༢༩ ཉིན་གྱི་སྔ་དྲོ་མི་ནི་སོ་ཊའི་གཟའ་མཇུག་སློབ་གྲྭའི་སློབ་ཕྲུག་རྣམས་ལ་བོད་དོན་ངོ་སྤྲོད་གཏམ་བཤད་དང་ཚེས་ ༣༠ ཉིན་མི་ནི་སོ་ཊའི་ས་གནས་མང་ཚོགས་ལ་གཏམ་བཤད། སྤྱི་ཟླ་ ༤ ཚེས་ ༡ ཉིན་ཆི་ཀ་ཀོ་བོད་རིགས་མང་ཚོགས་ལ་གཏམ་བཤད་དང་དྲིས་ལན། ཚེས་ ༣ ཉིན་ཝི་སི་ཀོན་སིན་བོད་རིགས་མང་ཚོགས་ལ་གཏམ་བཤད། ཚེས་ ༥ ཉིན་པོཌ་ལེན་ཌ་ས་གནས་བོད་རིགས་མང་ཚོགས་ལ་གཏམ་བཤད་དང་། ཚེས་ ༦ ཉིན་སི་ཡེ་ཊལ་བོད་རིགས་མང་ཚོགས་ལ་གཏམ་བཤད་དང་ས་གནས་གཞོན་ལྷན་གྱི་ལས་ཐོག་རྒྱུན་ལས་དང་ལས་ཟུར་སོགས་ཐུག་འཕྲད་ཀྱིས་ས་གནས་སླར་གསོ་ཡོང་ཐབས་སོགས་ལ་གོ་བསྡུར་སྦྱང་བཤད་གང་ལེགས་བྱུང་ཡོད། ཚེས་ ༩ ཉིན་སེན་ཧྤ་རེན་སི་སི་ཁོར་བདེ་འབྱོར་དང་ཚེས་ ༡༢ ཉིན་ས་གནས་མང་ཚོགས་ལ་གཏམ་བཤད། ཚེས་ ༡༣ ཉིན་གྱི་ཞོགས་པར་རེས་གཟའ་ཉི་མའི་བོད་རིགས་སློབ་ཕྲུག་དམིགས་བསལ་གཞོན་སྐྱེས་ལས་འགུལ་བའི་ལས་འགན་གྱི་བརྗོད་གཞིའི་ཐོག་གཏམ་བཤད་སྤེལ་ཡོད། ཚེས་ ༡༦ ཉིན་ཡུ་ཊ་བོད་རིགས་མང་ཚོགས་ལ་གཏམ་བཤད། སྤྱི་ཟླ་ ༤ པའི་ཚེས་ ༡༩ ཉིན་ཁོ་ལོ་ཏེ་ཌོ་ས་གནས་བོད་རིགས་མང་ཚོགས་ལ་གཏམ་བཤད། ཚེས་ ༢༣ ཉིན་བྱང་ཨ་རིའི་སྐུ་ཚབ་དོན་གཅོད་སྐུ་ངོ་རྣམ་རྒྱལ་མཆོག་གྲུབ་མཆོག་དང་མཇལ་འཕྲད་ཀྱིས་གཞོན་ལྷན་གྱི་བྱང་ཨ་རིའི་སྐོར་སྐྱོད་ལས་དོན་སྙན་གསེང་དང་གཞོན་ལྷན་གྱི་ལས་དོན་ལ་ད་བར་མཐུན་འགྱུར་རྒྱབ་སྐྱོར་གནང་བར་བཀའ་དྲིན་ཆེ་ཞུ་རྒྱུ་དང་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་བ་ཡང་ཞུས་གནང་ཡོད། དེའི་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་དང་གཞོན་ལྷན་དབུས་རྒྱུན་ཟུར་པ་བུ་ཆུང་ཀེ་ཚེ་རིང་མཆོག་ལ་ཡང་མཇལ་འཕྲད་ཞུ་རྒྱུ་བྱུང་ཡོད། ཉིན་རྒྱབ་བོད་དོན་རྒྱབ་སྐྱོར་བ་གྲོས་ཚོགས་འཐུས་མི་ཇིན་མེག་གྷོ་ཝན་མཆོག་གི་ལས་ཁུངས་སུ་ཆེད་བཅར་དང་ཁོང་གི་ཕྱག་རོགས་ལས་བྱེད་རྒྱུད་ཁོང་ཉིད་ནས་ད་བར་བོད་ཀྱི་བདེན་པའི་འཐབ་རྩོད་ཐོག་ཚད་མཐོའི་རྒྱབ་སྐྱོར་གནང་བར་བཀའ་དྲིན་ཆེ་ཞུས་གནང་ཡོད་པ་མ་ཟད། མུ་མཐུད་རྒྱབ་སྐྱོར་གནང་མུས་ཐོག་དམིགས་བསལ་ཨ་རིའི་རླུང་འཕྲིན་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གཉིས་བརྟན་གནས་ཡོང་རྒྱུར་ཤུགས་སྣོན་རྒྱབ་གནང་ཡོང་བའི་རེ་བ་ཞུས་གནང་ཡོད་པ་མ་ཟད། དེ་ཉིན་གྱི་དགོང་མོར་ས་གནས་མང་ཚོགས་ལ་བོད་ནང་གི་ཛ་དྲག་གནས་སྟངས་དང་གཞོན་ལྷན་སྒྲིག་འཛུགས་ཀྱི་གལ་གནད་སོགས་ཀྱི་ཐད་གཏམ་བཤད་སྤེལ་གནང་ཡོད། སྤྱི་ཟླ་ ༥ ཚེས་ ༢༦ ཉིན་ནིའུ་ཡོག་དང་ནིའུ་ཇར་སི་ས་གནས་མང་ཚོགས་ལ་གཏམ་བཤད་ལས་རིམ་དང་ཚེས་ ༣༠ ཉིན་ཧྥི་ལི་ཌ་ཧྤི་ཡར་ཆེད་ཕེབས་ཀྱིས་ས་གནས་མང་ཚོགས་ལ་གཏམ་བཤད་སྤེལ་གནང་ཡོད། སྤྱི་ཟླ་ ༥ ཚེས་ ༤ ཉིན་ཊོ་རོན་ཊོར་བདེ་འབྱོར་གྱིས་ཚེས་ ༦ ཉིན་ས་གནས་མང་ཚོགས་རྣམ་པར་གཏམ་བཤད། ཚེས་ ༧ ཉིན་ཊོ་རོན་ཊོ་ས་གནས་ཀྱི་ལྷག་དཀར་སྒོར་གཞས་སྐབས་གཏམ་བཤད། གཞན་ཡང་ས་གནས་ཀྱི་གནད་ཡོད་བོད་དོན་རྒྱབ་སྐྱོར་བ་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གཙོས་གཞོན་ལྷན་གྱི་རྒྱུན་ཟུར་དང་ས་གནས་རྒྱུན་ཟུར་སོགས་མཉམ་འཛོགས་ཐོག་ས་གནས་ཀྱི་ལས་དོན་ཚགས་ཚུད་ཡོང་ཐབས་སོགས་ཀྱི་ཐད་གོ་བསྡུར་སྦྱང་བཤད་གང་ལེགས་བྱུང་ཏེ་ལས་དོན་ལེགས་གྲུབ་བྱུང་ཡོད། ད་ལན་གྱི་ས་གནས་སྐོར་སྐྱོད་སྐབས་ས་གནས་མང་ཚོགས་ལ་བོད་ནང་གི་ཛ་དྲག་གནས་སྟངས་གཙོས་ཆོལ་གསུམ་བོད་རིགས་སྤུན་ཟླ་ནང་ཁུལ་མཐུན་སྒྲིལ་གྱི་དམ་ཚིག་བརྩི་སྲུང་དགོས་གལ། གཞན་ཡང་བོད་ཀྱི་གཞོན་ནུ་ལྷན་ཚོགས་ཀྱི་བོད་ནང་གི་ཛ་དྲག་གནས་སྟངས་ལ་གཞིགས་པའི་ལས་འགུལ་སྤེལ་ཕྱོགས་སོགས་ཀྱི་ཐད་གཏམ་བཤད་གོ་རྟོགས་གང་ལེགས་སྤེལ་ཐུབ་ཡོད་པ་དང་གཞོན་ལྷན་གྱི་བརྟན་བཞུགས་ལ་དམིགས་ཏེ་ས་གནས་མང་ཚོགས་ནས་ཞལ་འདེབས་ཡང་གང་ལེགས་བསྡུ་རུབ་གནང་ཐུབ་པ་བྱུང་ཡོད།
ཛ་དྲག་གི་གསར་འགོད་གསལ་བསྒྲགས།
༄༅། །བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གིས་མཆོག་སྤྲུལ་རིག་འཛིན་ཧུྃ་དཀར་རྡོ་རྗེ་མཆོག་ཝི་ཏི་ནམ་ནང་གི་བཀག་ཉར་ཁང་དུ་རྐྱེན་འདས་སུ་གྱུར་རྗེས་ནང་མིའི་མོས་མཐུན་མེད་པར་སྐུ་ཕུང་ཞུགས་འབུལ་ཞུས་པར་སྐྱོན་བརྗོད་དང་རྒྱལ་སྤྱིའི་རང་བཞིན་གྱི་ཞིབ་དཔྱོད་བྱེད་དགོས་པའི་འབོད་སྐུལ་ཞུ་ཡི་ཡོད།
དེ་ཡང་མཆོག་སྤྲུལ་རིག་འཛིན་ཧུྃ་དཀར་རྡོ་རྗེ་རིན་པོ་ཆེ་འཛིན་བཟུང་དང་རྐྱེན་འདས་སུ་གྱུར་རྗེས་སྐུ་ཕུང་ལ་ཞིབ་དཔྱོད་གང་ཡང་མ་བྱས་པར་ཞུགས་འབུལ་བྱས་པ་དེར་རྒྱ་ནག་གཞུང་གིས་གཡོ་བྱུས་བཤམས་ཡོད་པའི་དོགས་གཞི་ཆེན་པོ་ཡོད།
(རྡ་རམ་ས་ལ། ཕྱི་ལོ་ ༢༠༢༥ ཟླ་ ༤ ཚེས་ ༢༡ ཉིན།) བོད་ཀྱི་རླབས་ཆེན་གྱི་སྐྱེ་བུ་མཆོག་སྤྲུལ་རིག་འཛིན་ཧུྃ་དཀར་རྡོ་རྗེ་རིན་པོ་ཆེ་མཆོག་གི་སྐུ་ཕུང་ནང་མིའི་མོས་མཐུན་མེད་པར་ཞུགས་འབུལ་བྱས་པར་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔས་མཐའ་གཅིག་ཏུ་ངོས་ལེན་མེད་པའི་ཐོག་སྐྱོན་བརྗོད་ནན་པོ་བྱེད་རྒྱུ་ཡིན། དེ་ཡང་རིན་པོ་ཆེ་མཆོག་ཕྱི་ལོ་ ༢༠༢༥ ལོའི་ཟླ་ ༣ པའི་ཟླ་མཇུག་ཏུ་ཝི་ཏི་ནམ་གྱི་ཧོ་ཅི་མིན་གྲོང་ཁྱེར་གྱི་བཀག་ཉར་ཁང་དུ་དོགས་གཞི་ཅན་གྱི་གནས་སྟངས་འོག་སྐུ་གཤེགས་ཡོད་པ་དང་། དེ་རྗེས་གནད་དོན་དེར་འཕྲལ་དུ་ཞིབ་དཔྱོད་ནན་པོ་བྱེད་དགོས་པའི་རེ་སྐུལ་ཞུས་ཡོད་ཀྱང་ཡིད་སྐྱོའི་གནས་ཚུལ་ཞིག་ལ་རིན་པོ་ཆེ་མཆོག་གི་སྐུ་ཕུང་ལ་ཞིབ་དཔྱོད་གང་ཡང་མ་བྱས་པའི་ཁར་ནང་མིའི་མོས་མཐུན་ཆོག་མཆན་མེད་པར་སྐུ་ཕུང་ཞུགས་འབུལ་བྱས་ཡོད་འདུག
རིན་པོ་ཆེ་མཆོག་འཛིན་བཟུང་དང་། བཀག་ཉར་ཁང་དུ་རྐྱེན་འདས་སུ་གྱུར་པ། དེ་བཞིན་ནང་མིའི་ཆོག་མཆན་མེད་པར་སྐུ་ཕུང་ཞུགས་འབུལ་བྱས་པ་བཅས་ནི་རྒྱལ་སྤྱིའི་ཁྲིམས་ལུགས་ཀྱི་ཚད་གཞི་ལས་འགལ་བའི་གནད་དོན་ཚབས་ཆེན་ཞིག་ཡིན་པ་དང་། དེ་ནི་དྲང་བདེན་ཞིབ་དཔྱོད་ལ་འགོག་རྐྱེན་བྱས་པར་ངོས་འཛིན་ཐུབ་པ་མ་ཟད། ཁོང་འཛིན་བཟུང་དང་རྐྱེན་འདས་སུ་གྱུར་བའི་གནད་དོན་ནང་རྒྱ་ནག་གཞུང་ཐད་དཀར་འབྲེལ་བ་ཡོད་པའི་དོགས་གཞི་ཆེན་པོ་ཞིག་ཆགས་ཡོད།
དེར་བརྟེན་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ནས་སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་བཀག་ཉར་དང་རྐྱེན་འདས་ཀྱི་གནས་ཚུལ་བྱུང་རྐྱེན་ཐད་རྒྱལ་སྤྱིའི་ཚད་གཞི་དང་ལྡན་པའི་ཕྱི་གསལ་ནང་གསལ་གྱི་ཞིབ་དཔྱོད་ཆ་ཚང་བ་ཞིག་དགོས་པའི་ནན་སྐུལ་ཞུ་རྒྱུ་ཡིན།
ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གྱི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས་གསུངས་དོན། “ ཝི་ཏི་ནམ་དུ་རིན་པོ་ཆེའི་སྐུ་ཕུང་གདན་ཞུར་ཆེད་ཕེབས་གནང་བའི་དགེ་འདུན་པ་ལྔ་པོར་མ་འོངས་པར་ཉེན་ཁ་ཧ་ཅང་ཆེན་པོ་འཕྲད་ངེས་ཡིན། ད་ལྟ་ཡང་ལུང་སྔོན་དགོན་པར་དཀའ་ངལ་ཚད་མེད་འཕྲད་བཞིན་ཡོད་པ་དང་། རིན་པོ་ཆེའི་སྐུ་པར་དང་གནས་ཚུལ་ཁྱབ་སྤེལ་བྱེད་མི་ཆོག་པའི་བཀའ་ཕེབ་ཡོད། གལ་ཏེ་རྒྱ་ནག་གཞུང་གི་བཀའ་རྒྱར་དང་ལེན་མ་བྱས་ཚེ་དགོན་པ་སྒོ་རྒྱག་གི་ཡིན་ཞེས་སྡིགས་ར་ཡང་བསྐུལ་ཡོད། རིན་པོ་ཆེའི་སྐུ་ཕུང་ཞུགས་འབུལ་དེ་འདི་ལྟར་གསང་བ་ཆེན་པོའི་ངང་བྱེད་དགོས་པའི་རྒྱུ་མཚན་ནི། རྒྱ་ནག་གཞུང་གིས་ངན་བྱུས་འོག་རིན་པོ་ཆེ་སྐུ་བཀྲོངས་པ་ཙམ་མ་ཟད། རིན་པོ་ཆེའི་སྐུ་ཕུང་གི་གནས་སྟངས་དང་འབྲེལ་བའི་གནད་དོན་གལ་ཆེན་ཞིག་སྦས་ཡོད་པ་ཧ་ཅང་གསལ་པོ་ཡིན།”
བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་ཀྱིས་གསུངས་དོན། “ང་ཚོས་ཝི་ཏི་ནམ་གཞུང་གིས་སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་གི་རྐྱེན་འདས་ཀྱི་གནད་དོན་ཐད་ཕྱོགས་ཡོངས་ཀྱི་འགན་ཁུར་བྱེད་ཕྱོགས་ལ་སྐྱོན་བརྗོད་བྱ་རྒྱུ་མ་ཟད། སྐུ་ཕུང་ལ་ཞིབ་དཔྱོད་མ་བྱས་པ་དང་། སྐུ་ཕུང་ནང་མིར་རྩིས་སྤྲོད་མ་བྱས་པ་བཅས་ཀྱི་ཐད་ཝི་ཏི་ནམ་གཞུང་དང་རྒྱ་ནག་གཞུང་དབར་ངན་པ་ལག་སྦྲེལ་བྱས་ཡོད་པ་གསལ་པོ་ཆགས་ཡོད་པར་སོང་། རྒྱ་ནག་གིས་རྒྱལ་མཚམས་ལས་བརྒལ་བའི་དྲག་གནོན་ལ་རྒྱལ་སྤྱིའི་རང་བཞིན་གྱི་ཁྲིམས་གཅོད་ལག་བསྟར་བྱེད་དགོས། ”
བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་གསུངས་དོན། “སྤྲུལ་སྐུ་འཛིན་ཧུྃ་དཀར་རྡོ་རྗེ་མཆོག་བཀག་ཉར་ཁང་དུ་རྐྱེན་འདས་སུ་གྱུར་བའི་གནད་དོན་ཐད་རྒྱུ་མཚན་ཁ་གསལ་ཞིག་བཤད་རྒྱུ་མེད་པ་དེ་ནི་དྲང་བདེན་མིན་པའི་གནད་དོན་ཞིག་ཡིན་པ་དང་། འགྲོ་བ་མིའི་ཆེ་མཐོང་ལ་རྩིས་མེད་རྡོག་རོལ་གྱི་བྱ་སྤྱོད་ཅིག་ཡིན་པ་གསལ་པོ་རེད། སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་གི་མཐའ་མའི་དཔང་པོ་དེ་འཇིགས་སྣང་ཁྲོད་ཁུ་སིམ་མེར་ལུས་ཉེན་ལ་འཛམ་གླིང་ཡོངས་ཀྱིས་མིག་བཙུམས་ནས་སྡོད་མི་རུང་། ང་ཚོས་གནད་དོན་ཚང་མ་ཐལ་བར་མ་གྱུར་གོང་ང་ཚོས་བདེན་པའི་འོད་སྣང་མཐོང་འདོད་ཡོད།”
བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས་ཀྱིས་གསུངས་དོན། “རླབས་ཆེ་བའི་སྐྱེས་ཆེན་དམ་པ་སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་གི་སྐུ་སྲོག་དོགས་གཞི་ཅན་གྱི་གནས་སྟངས་འོག་མེད་པར་གྱུར་ཅིང་། ད་ཆ་བདེན་པའི་གནས་ཚུལ་སྦས་ཆེད་ནང་མིའི་མོས་མཐུན་མེད་པར་སྐུ་ཕུང་ཞུགས་འབུལ་བྱས་ཡོད། བོད་ཀྱི་སྐད་ཡིག་དང་རིག་གཞུང་ལ་བརྩེ་བ་བྱས་པའི་རྒྱུ་མཚན་ཙམ་ལ་བརྟེན་ནས་མནར་གཅོད་ཀྱི་བདེན་པའི་གནས་ཚུལ་ལ་བཀག་སྡོམ་བྱེད་པའི་ཆེད་དུ་རྩིས་མེད་རྡོག་རོལ་གཏོང་བའི་བྱ་སྤྱོད་ཡ་ང་བ་ཞིག་ཡིན། འཛམ་གླིང་མི་མང་གིས་དྲང་བདེན་གྱི་ཆེད་ཡར་ལངས་ཏེ་རང་དབང་ཅན་གྱི་རྒྱལ་སྤྱིའི་ཞིབ་འཇུག་འཕྲལ་དུ་དགོས་པའི་དགོས་འདུན་བཏོན་དགོས། སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་གི་དྲང་བདེན་དེ་རྩིས་མེད་གཏོང་མི་རུང་ལ་གཏོང་ཡང་མི་ཐུབ།”
རྒྱལ་སྤྱིའི་བོད་དོན་འབྲེལ་མཐུད་ཁང་གི་འབྲེལ་མཐུད་པ་འབུམ་རམས་པ་བློ་བཟང་དབྱངས་མཚོ་ལགས་ཀྱིས་གསུངས་དོན། “སྤྲུལ་སྐུ་རིག་འཛིན་ཧུྃ་དཀར་་རྡོ་རྗེ་རིན་པོ་ཆེ་མཆོག་ནི། བོད་ཀྱི་སློབ་གསོ་བ་དང་། ལྟ་གྲུབ་སྨྲ་བ། སྙན་ངག་པ། སྒྱུ་རྩལ་པ། ལོ་ཙཱ་བ། ནང་པ་སངས་རྒྱས་པའི་བླ་སྤྲུལ་གྲགས་ཆེན་བཅས་རླབས་ཆེ་བའི་སྐྱེས་བུ་དམ་པ་ཞིག་ཡིན་ལ། ཁོང་གིས་རྒྱལ་ཕྱི་ནང་གི་སློབ་མ་སྟོང་ཕྲག་མང་པོར་རང་རང་གི་འདོད་བློ་དང་མཐུན་པར་དམ་པའི་ཆོས་ཀྱི་གདམས་པ་གནང་ཞིང་། ཁོང་གིས་བོད་ནང་ལག་རྩལ་སློབ་གླིང་དང་། དེ་བཞིན་སྨན་ཁང་། དཔེ་མཛོད་ཁང་། རྒན་གསོ་ཁང་སོགས་མི་རིགས་དང་རིག་གཞུང་ལ་ཕན་པའི་ཕྱག་ལས་རླབས་ཆེན་གནང་དང་གནང་བཞིན་པར་དད་ལྡན་མང་ཚོགས་ཆེས་མང་པོའི་དད་མོས་ཤུགས་ཆེན་པོ་བྱ་ཡུལ་ཞིག་ཡིན། འོན་ཀྱང་ཁོང་གློ་བུར་དུ་དོགས་གཞི་ཅན་གྱི་གནས་སྟངས་འོག་རྐྱེན་འདས་སུ་གྱུར་བ་ནི་བོད་མི་ཙམ་མ་ཡིན་པར་འཛམ་གླིང་ཡོངས་ལ་གྱོང་གུད་ཆེན་པོ་ཞིག་ཡིན།ཁོང་གི་མཛད་རྗེས་ཀྱིས་བོད་ཀྱི་མི་རབས་གསར་པར་སེམས་ཤུགས་སྤར་བཞིན་ཡོད་པས། ཁོང་གི་མཛད་རྗེས་དང་རླབས་ཆེན་གྱི་བློས་གཏོང་རྣམས་ནམ་ཡང་བརྗེད་མི་སྲིད།”
དགུང་ལོ་ ༥༦ ཏུ་ཕེབས་པའི་སྤྲུལ་སྐུ་རིག་འཛིན་ཧུྃ་དཀར་རྡོ་རྗེ་མཆོག་གིས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་གནང་བར་བོད་ནང་རྒྱ་ནག་གི་དཔོན་རིགས་ཚོས་རྒྱུན་ཆད་མེད་པར་བསུན་གཙེར་བཟོ་བཞིན་པར་བརྟེན་བཙན་བྱོལ་དུ་ཕེབས་ཡོད་པའི་གནས་ཚུལ་ཐོན་ཡོད། ཁུངས་བདེན་གྱི་གནས་ཚུལ་ལྟར་ན། སྤྱི་ལོ་ ༢༠༢༥ ཟླ་ ༣ ཚེས་ ༢༥ ཉིན་ཝི་ཏི་ནམ་གྱི་ཧོ་ཅི་མིན་གྲོང་ཁྱེར་དུ་ཝི་ཏི་ནམ་ཉེན་རྟོག་པ་དང་རྒྱ་ནག་གི་གསང་ལས་པ་གཉིས་ནས་མཉམ་འབྲེལ་གྱིས་ཁོང་འཛིན་བཟུང་བྱས་རྗེས་ཉིན་ཤས་ལས་མ་སོང་བར་ཁོང་བཀག་ཉར་ཁང་དུ་རྐྱེན་འདས་སུ་གྱུར་ཡོད། ཝི་ཏི་ནམ་གྱི་དབང་འཛིན་པ་ཚོས་ཁོང་སྙིང་ནད་ཀྱིས་རྐྱེན་པས་གྲོངས་ཚུལ་གྱི་གཞི་མེད་ཀྱི་རྒྱུ་མཚན་བཀོད་ཡོད་ན་ཡང་། ནང་མིར་སྐུ་ཕུང་མཇལ་བཅུག་མེད་པ། གནད་དོན་དེའི་ཐོག་གཞུང་འབྲེལ་ཡིག་ཆ་གང་ཡང་མེད་པ་བཅས་ཀྱིས་བདེན་པ་སྦས་གསང་བྱས་ཡོད་པ་མངོན་གསལ་ཡིན།
གནས་ཚུལ་འདི་དང་དུས་མཚུངས་སུ་མགོ་ལོག་ཁུལ་དུ་ཡོད་པའི་ཁོང་གི་དགོན་པར་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱེད་བཞིན་ཡོད་པ་དང་། ཉེན་སྲུང་ཡང་ཤུགས་ཆེ་བྱེད་བཞིན་པའི་གནས་ཚུལ་ཐོན་ཡོད་པས་འཕྲལ་དུ་རྒྱལ་སྤྱིས་ཐེ་གཏོགས་དགོས་པའི་དགོས་འདུན་འདོན་བཞིན་ཡོད། ང་ཚོ་བོད་ཀྱི་གཞུང་འབྲེལ་མིན་པའི་ཚོགས་པ་ཁག་གིས་མགོ་ལོག་ཏུ་བཞུགས་པའི་དགེ་འདུན་པ་རྣམས་ཀྱི་བདེ་སྡུག་དང་གནས་སྟངས་ཐད་ཧ་ཅང་སེམས་འཚབ་ཆེན་པོ་ཡོད། དངོས་སུ་མཐོང་མཁན་ཚོས་བརྗོད་པ་ལྟར་ན། ཁོང་གི་དགོན་པར་འཕྲལ་མར་དམ་བསྒྲགས་ཤུགས་ཆེ་བྱས་ཡོད་པ་སྟེ། ལྟ་རྟོག་བྱེད་ཤུགས་ཆེ་རུ་བཏང་བ། འགྲོ་བསྐྱོད་ལ་དམ་བསྒྲགས་བྱས་པ། དགེ་འདུན་པ་དང་སྐྱ་བོ་རྣམས་ལ་འཇིགས་སྐུལ་བྱེད་བཞིན་པ་བཅས་ཀྱི་གནས་ཚུལ་ཐོན་ཡོད།
བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གིས།
3) མཉམ་འབྲེལ་རྒྱལ་ཚོགས་ལ། སྤྲུལ་སྐུ་ཧུྃ་དཀར་རྡོ་རྗེ་རིན་པོ་ཆེ་ཁྲིམས་ཐོག་མིན་པར་དམར་གསོད་བཏང་བ་ཡིན་མིན་ཞིབ་འཇུག་བྱེད་དགོས་པ་དང་། སྤྲུལ་སྐུ་ཧུྃ་དཀར་རྡོ་རྗེ་རིན་པོ་ཆེའི་རྐྱེན་འདས་དང་འབྲེལ་བའི་གནད་དོན་ཁག་གི་ངན་བྱུས་དང་། འཆར་གཞི་བཟོ་མཁན། ལག་བསྟར་བྱེད་མཁན་ཡོངས་རྫོགས་ངོས་འཛིན་ཡོང་བའི་འབོད་སྐུལ་ཞུ་རྒྱུ་ཡིན།
བོད་ཀྱི་སློབ་གསོ་བ་དང་རྩོམ་པ་པོ། ལོ་རྩྭ་བ། ལྟ་གྲུབ་སྨྲ་བ། རི་མོ་བ། ཡིག་གཟུགས་སྒྱུ་སྩལ་བ་མཆོག་སྤྲུལ་ཧུྃ་དཀར་རྡོ་རྗེ་མཆོག་རྒྱ་གཞུང་ནས་མ་ཉེས་ཁ་གཡོག་འོག་ཝི་ཏི་ནམ་གྱི་སྨན་ཁང་ཞིག་ཏུ་སྐུ་དཀྲོངས་པར་བོད་ཀྱི་གཞོན་ནུ་ལྷན་ཚོགས་ནས་ངོ་རྒོལ་དང་། ཁོང་གི་སྐུ་ཕུང་ལ་རྒྱལ་སྤྱིའི་རང་བཞིན་གྱི་བརྟག་དཔྱད་ཞིབ་འཇུག་ཚད་ལྡན་ངང་མཇུག་འབྲས་སྙན་ཐོ་ཕྱིར་བསྒྲགས་བྱེད་དགོས་པ་མ་ཟད། ཁོང་གི་སྐུ་ཕུང་ཁོང་ཉིད་ཀྱི་ནང་མི་དང་དགོན་པ་སོགས་ལ་རྩིས་སྤྲོད་དགོས་པ་སོགས་ཀྱི་དགོས་འདུན་འོག་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་གོ་སྒྲིག་དང་། ལྡི་ལི་བསམ་ཡས་གླིང་དང་རོ་ཧི་ནི་ས་གནས་བོད་ཀྱི་གཞོན་ནུ་ལྷན་ཚོགས་གཉིས་ཀྱི་མཐུན་འགྱུར་འོག་ཕྱི་ལོ་ ༢༠༢༥ ཟླ་ ༤ ཚེས་ ༡༡ རེས་གཟའ་པ་སངས་ཉིན་དགྲ་བོ་རྒྱ་དམར་སྲིད་གཞུང་དང་ཝི་ཏེ་ནམ་གཞུང་ཚབ་གཉིས་ཀྱི་མདུན་ཐང་དུ་ལས་འགུལ་སྤེལ་ཡོད། སྐབས་དེར་རོ་ཧི་ནི་ས་གནས་གཞོན་ལྷན་གྱི་རྒྱུན་ལས་དང་དྭང་བླངས་ལས་འགུལ་བ་རྣམས་ནས་དྲིལ་བསྒྲགས་ཡིག་ཆ་དཔར་སྐྲུན་སོགས་ཀྱི་གྲྭ་སྒྲིག་འཐུས་ཚང་དང་ལྡི་ལི་བསམ་ཡས་གླིང་ས་གནས་གཞོན་ལྷན་ནས་གླང་འཁོར་དང་ཞལ་ལག་སོགས་ཀྱི་མཐུན་འགྱུར་འཐུས་ཚང་གནང་རྗེས་གཞོན་ལྷན་སྤྱི་ཁྱབ་དྲུང་ཆེ་དང་། དྲྭ་རྒྱ་དོ་དམ་པ་གཉིས་གཙོས་ལྡི་ལི་རོ་ཧི་ནི་ས་གནས་གཞོན་ལྷན་ཟུར་པ་ཡིན་པ་ལས་འགུལ་བ་གཞན་གཉིས་བཅས་བཞུགས་སྒར་ནས་ཕྱོགས་ཐོན་གྱིས་སྤྱི་ཚེས་ ༡༡ ཉིན་གྱི་སྔ་དྲོ་ཆུ་ཚོད་ ༡༡། ༠༠ ནས་བཟུང་ཆུ་ཚོད་ ༡༢།༡༥ བར་གཞུང་ཚབ་གཉིས་ཀྱི་མདུན་ཐང་དུ་ལས་འགུལ་སྤེལ་ཡོད། དེ་ཡང་ཐོག་མར་གཞོན་ལྷན་སྤྱི་ཁྱབ་དྲུང་ཆེ་ནས་ཝི་ཏེ་ནམ་གཞུང་ཚབ་ཁང་དུ་ཆེད་བཅར་གྱིས་གཞུང་ཚབ་མི་སྣར་དམིགས་བསལ་ཞུ་སྙན་ཞིག་ཕུལ་ཏེ་ཝི་ཏེ་ནམ་གཞུང་ནས་དགྲ་བོ་རྒྱ་དམར་སྲིད་གཞུང་དང་ལྷན་ངན་པ་ལག་འབྲེལ་བྱས་པར་གློ་ཕམ་དང་།
མཆོག་སྤྲུལ་ཧུྃ་དཀར་རྡོ་རྗེ་མཆོག་གི་གནད་དོན་ལ་འགན་འཁུར་དགོས་པ་མ་ཟད། སྐུ་ཕུང་ལ་རྒྱལ་སྤྱིའི་རང་བཞིན་གྱི་ཚད་མཐོའི་རྟག་དཔྱད་ཞིབ་འཇུག་དགོས་པ། ཁོང་གི་སྐུ་ཕུང་དགོན་པ་དང་ནང་མིར་བརྩིས་སྤྲོད་དགོས་པ་སོགས་ཀྱི་དགོས་འདུན་འོག་ཞུ་སྙན་ཕུལ་ཡོད། སྐབས་དེར་དམིགས་བསལ་གཞུང་ཚབ་ཀྱི་གནད་ཡོད་ (Ambassador) དང་ཐུག་རྒྱུའི་གོ་སྐབས་མ་བྱུང་ཡང་ཡིག་ཆ་དང་འབྲེལ་བའི་ལས་བྱེད་གཉིས་ལ་གནད་དོན་ཆ་ཚང་སྙན་གསེང་དང་ཝི་ཏེ་ནམ་གཞུང་ནས་ཀྱང་དེ་འབྲེལ་ཡིག་ལན་དགོས་པའི་དགོས་འདུན་བཏོན་པ་བཞིན་ཁོང་རྣམས་ནས་ཀྱང་འབྲེལ་ཡོད་གཞུང་ཚབ་མི་སྣ་དང་ཆབ་སྲིད་སྡེ་ཚན་སོགས་ལ་སྤྱན་འབུལ་དང་ཡིག་ལན་ཡོད་པ་ཞུ་རྒྱུའི་ཁས་ལེན་བྱུང་ཡོད། དེའི་རྗེས་ལས་འགུལ་བ་ལྔ་ཙམ་ནས་ཝི་ཏེ་ནམ་གཞུང་ཚབ་མདུན་ཐང་དུ་སྤྲུལ་སྐུ་ཁོང་ཉིད་ལ་དྲང་བདེན་དགོས་པའི་དགོས་འདུན་གྱི་མཉམ་དཔར་ལེན་རྗེས་དགྲ་བོ་རྒྱ་དམར་སྲིད་གཞུང་གི་གཞུང་ཚབ་མདུན་དུ་ལས་འགུལ་སྤེལ་ཡོད།
དེ་ཉིན་སྔར་རྒྱུན་དང་མི་འདྲ་བར་རྒྱ་དམར་གཞུང་ཚབ་མདུན་ཐང་དུ་ཉེན་རྟོག་པ་ཕོན་ཆེ་ཆེད་གཏོང་གནང་ཡོད་ཀྱང་གཞོན་ལྷན་གྱི་ལས་འགུལ་བ་ ༡༧ ནས་དྲིལ་བསྒྲགས་ཡིག་ཆ་མཉམ་འཁྱེར་དང་སྟོད་གོས་དཀར་པོའི་སྟེང་མཆོག་སྤྲུལ་ཧུྃ་དཀར་རྡོ་རྗེ་མཆོག་ཉེས་མེད་ཉེས་འཛུགས་ཀྱིས་སྐུ་བཀྲོངས་ཡོད་པ་དང་། ཁོང་ཉིད་ལ་དྲང་བདེན་དགོས་ལུགས། ཝི་ཏེ་ནམ་གཞུང་ནས་རྒྱ་དམར་གྱི་རྒྱལ་མཚམས་ལས་རྒལ་བའི་བཙན་གནོན་གྱི་སྲིད་བྱུས་ལ་རྒྱབ་སྐྱོར་མི་གནང་བའི་རེ་བ། གཞན་ཡང་ཁོང་ཉིད་ཀྱི་སྐུ་ཕུང་ལ་རྟག་དཔྱད་གནང་རྗེས་ནང་མི་དང་དགོན་པར་རྩིས་སྤྲོད་དགོས་པ་སོགས་ཀྱི་དགོས་འདུན་བཏོན་ཏེ་ངོ་རྒོལ་ལས་འགུལ་སྤེལ་རྗེས། ལས་འགུལ་བ་རྣམས་འཇུ་བཟུང་གིས་ལྡི་ལི་ས་མཚམས་སུ་ཡོད་པའི་ན་རེ་ལ་ཉེན་རྟོག་ཁང་དུ་ཉིན་གང་བོར་བཀག་ཉར་གནང་རྗེས་དགོང་དྲོ་ཕྱག་ཚོད་ ༦ པའི་ཐོག་གློད་བཀྲོལ་བྱུང་ཡོད། ན་རེ་ལ་བཀག་ཉར་ཁང་ནང་ལས་འགུལ་བ་རྣམས་ནས་འཐབ་རྩོད་དང་འབྲེལ་བའི་བརྗོད་གཞིའི་ཐོག་ཕན་ཚུལ་གོ་བསྡུར་དང་། དམིགས་བསལ་ལས་འགུལ་བའི་ཁོངས་སུ་ས་གཞོན་ཟུར་པ་དང་ད་ལྟའི་ཆར་ཉམས་ཞིབ་ཀྱི་ལས་དོན་གཉེར་བཞིན་པའི་ལས་འགུལ་བ་གསུམ་དང་གཞོན་ལྷན་སྤྱི་ཁྱབ་དྲུང་ཆེ་སོགས་ནས་ལས་འགུལ་མུ་མཐུད་སྤེལ་དགོས་པའི་གལ་གནད། གཞོན་ལྷན་གྱི་ལས་འགུལ་བ་ཚོས་མུ་མཐུད་ལས་འགུལ་གོ་སྒྲིག་དང་འགན་འཁྲི་ཁུར་རྒྱུའི་གལ་གནད། གཞན་ཡང་མཐོ་སློབ་འགྲིམ་སྐབས་བོད་དོན་ལས་འགུལ་གང་མང་སྤེལ་རྒྱུ་དང་ས་གནས་གཞོན་ལྷན་གྱི་རྒྱུན་ལས་གནང་ཐུབ་རྒྱུའི་གལ་གནད་སོོགས་ཀྱི་ཐད་ཕན་ཚུན་བསམ་ཚུལ་བརྗེ་ལེན་སོགས་ཀྱི་ལས་འགུལ་ཡང་སྤེལ་ཏེ་ཕྱོགས་ཡོངས་ནས་རྒྱ་གར་གཙོས་རྒྱལ་སྤྱིའི་གསར་ལམ་ཁག་མང་པོའི་ནང་གནད་དོན་འཁོད་ཐུབ་པ་སོགས་ཀྱི་དྲིལ་བསྒྲགས་དང་འབོད་སྐུལ་གྱི་ལས་འགུལ་གང་ལེགས་སྤེལ་ཐུབ་པ་བྱུང་ཡོད།
རྒྱ་གར་གཞུང་དམངས་གཉིས་ནས་བོད་ཀྱི་གནད་དོན་ཐད་སྲིད་བྱུས་བརྟན་པོ་འཛིན་ཐབས་དང་རྒྱ་གར་གྱི་ཆབ་སྲིད་ཚོགས་པ་ཁག་ནས་ཀྱང་བོད་ཀྱི་བདེན་པའི་འཐབ་རྩོད་དང་འབྲེལ་བའི་གྲོས་ཆོད་འཇོག་ཐབས། གཞན་ཡང་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་དང་། མངའ་སྡེའི་གྲོས་ཚོགས་འཐུས་མི་སོགས་ནས་བོད་ཀྱི་གནད་དོན་ཐོག་རྒྱབ་སྐྱོར་གྱིས་གྲོས་ཚོགས་གོང་འོག་གཉིས་ནང་བོད་ཀྱི་གནད་དོན་གླེང་སློང་སོགས་གནང་ཏེ་མཐར་རྒྱ་གར་གྲོས་ཚོགས་གོང་འོག་ནང་བོད་དོན་རྒྱབ་སྐྱོར་གྱི་གྲོས་ཆོད་དང་ཁྲིམས་འཆར་གཏན་འབེབ་སོགས་ལ་དམིགས་ཏེ་ཞུ་གཏུགས་ལས་འགུལ་ཐེངས་དང་པོ་དེ་བཞིན་ཕྱི་ལོ་ ༢༠༢༤ ལོའི་ལོ་འཇུག་དུ་ཞུ་གཏུགས་ལས་འགུལ་སྤེལ་ཡོད། བོད་དོན་ཞུ་གཏུགས་མཐུན་ཚོགས་ཀྱི་ཞུ་གཏུགས་ལས་འགུལ་ཐེངས་གཉིས་པ་དེ་བཞིན་ཕྱི་ལོ་ ༢༠༢༥ ཟླ་ ༣ ཚེས་ ༡༧ ནས་ ༢༨ བར་ཉིན་བཅུའི་རིང་སྤེལ་ཡོད་པ་དང་།
སྐབས་དེར་རྒྱ་གར་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་དང་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་ད་ལྟའི་ལས་ཐོག་གཞུང་འཛིན་སྲིད་སྐྱོང་གཙོས་ཁྱོན་གྲོས་ཚོགས་འཐུས་མི་ ༥༤ དང་གནད་ཡོད་གཉིས་བཅས་ཁྱོན་གནད་ཡོད་མི་སྣ་ ༥༦ ཙམ་དང་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་། ཧིན་བོད་གཉིས་ཀྱི་ས་མཚམས་ངོས་འཛིན་དགོས་གལ་སོགས་ཀྱི་འབོད་སྐུལ་ཞུ་སྙན་དོན་ཚན་ལྔ་ཅན་ཞིག་ཕུལ་ཡོད་པ་མ་ཟད། གྲོས་ཚོགས་ནང་བོད་ཀྱི་གནད་དོན་གླེང་སློང་གནང་སྐྱོང་ཡོང་བའི་འབོད་སྐུལ་སོགས་ཞུས། སྐབས་དེར་གྲོས་ཚོགས་འཐུས་མི་ ༡༢ དེ་སྔོན་ཞུ་གཏུགས་ལས་འགུལ་ཐེངས་དང་པོའི་སྐབས་མཇལ་འཕྲད་བྱུང་ཡོད་པ་དང་ཁོང་རྣམ་པར་འབྲེལ་བ་དམ་ཟབ་གཏོང་ཐབས་དང་། གྲོས་ཚོགས་འཐུས་མི་གཞན་ཆ་ཚང་དེ་སྔོན་མཇལ་འཕྲད་མ་བྱུང་བ་རྐྱང་ཡིན་པས་བོད་དོན་གོ་རྟོགས་གང་ལེགས་སྤེལ་ཐུབ་པ་བྱུང་ཡོད། འབོད་སྐུལ་ཞུ་སྙན་ནང་བོད་ནི་ལོ་རྒྱུས་ཐོག་རང་བཙན་གྱི་རྒྱབ་ཁབ་ཅིག་དང་ལོ་རྒྱུས་ཐོག་ཧིན་བོད་གཉིས་ཀྱི་ས་མཚམས་ལས་རྒྱ་དཀར་ནག་གཉིས་དབར་ས་མཚམས་ཤིག་མེད་ཚུལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་འཁྲུངས་སྐར་དང་སྟབས་བསྟུན་གྱིས་ཁོང་གི་རླབས་ཆེན་གྱི་མཛད་རྗེས་ལ་ངོས་འཛིན། དམིགས་བསལ་རྒྱ་གར་གྱི་གནའ་བོའི་རིག་གཞུང་མི་ཉམས་རྒྱུན་འཛིན་དར་སྤེལ་གཙོས་འཛམ་གླིང་སྐྱེ་འགྲོ་ཀུན་གྱི་བདེ་སྡུག་ལ་དམིགས་ཏེ་སྐུ་ཚེ་ཧྲིལ་པོར་སྐུ་ལས་བསྐྱོན་གནང་བར་ཆེ་བསྟོད་ཀྱིས་གྲོས་ཚོགས་ནང་གླེང་སློང་དང་འཁྲུངས་སྐར་སྲུང་བརྩི་དགོས་གལ། ད་ལྟའི་ཆར་དགྲ་བོ་རྒྱ་དམར་སྲིད་གཞུང་ནས་བོད་ཀྱི་ཆོས་དང་རིག་གཞུང་གི་ངོ་བོ་དང་བཅས་པ་རྩ་མེད་བཟོ་བཞིན་པའི་ཛ་དྲག་གནས་སྟངས་ཐོག་གླེང་སློང་དགོས་གལ། གཞན་ཡང་ཉེ་བའི་ཆར་དགྲ་བོ་རྒྱ་དམར་སྲིད་གཞུང་ནས་ལོ་རྒྱུས་ལ་འཁྱོག་བཤད་དང་རྫུན་བཟོ་སོགས་བྱས་ཏེ་བོད་ཅེས་པའི་ཐ་སྙད་དེ་ཡང་རྒྱལ་སྤྱིའི་སྤྱི་ཚོགས་དང་སྡིངས་ཆ་ནས་རྩ་མེད་བཟོ་རྒྱུའི་སྲིད་བྱུས་དང་། བོད་ཀྱི་འཁོར་ཡུག་སྲུང་སྐྱོབ་དང་རྒྱ་གར་གྱི་བདེ་འཇག་བར་འབྲེལ་བ་དམ་ཟབ་ཡོད་སྐོར་སོགས་ཀྱི་ཐད་རྒྱབ་སྐྱོར་དང་གླེང་སློང་གནང་སྐྱོང་བའི་འབོད་སྐུལ་གྱི་ཞུ་སྙན་ཕུལ་ཡོད་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ཐོག་གལ་གནད་རང་བཞིན་གྱི་གྲོས་ཚོགས་འཐུས་མི་ ༤༦ གིས་མཚན་རྟགས་ཡོད་པའི་ཐུན་མོང་གི་བསྒྲགས་གཏམ་ཞིག་ཀྱང་སྤེལ་ཐུབ་པ་བྱུང་ཡོད།
གཞན་ཡང་འབྲུག་གཞུང་ཕྱི་འབྲེལ་ལྷན་ཁང་ནས་རྒྱ་གཞུང་གིས་ཆེད་གཏོང་བྱས་པའི་ཟློས་གར་འཁྲབ་སྟོན་དང་འབྲེལ་བའི་གཞུང་འབྲེལ་གསར་འགོད་གསལ་བསྒྲགས་ནང་དབྱིན་སྐད་ཐོག་བོད་ཅེས་པའི་ཐ་སྙད་ཀྱི་ཚབ་ཏུ་ཤི་ཙང་ཞེས་ཉེ་དུས་རྒྱ་གཞུང་གིས་ངེན་སྐུལ་བྱེད་བཞིན་པའི་ཐ་སྙད་བཀོལ་སྤྱོད་བྱས་པར་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་གཙོས་རྒྱལ་སྤྱིའི་ཚོགས་པ་ ༡༤༤ ལྷག་གིས་བསྐྱོན་བརྗོད་ཀྱིས་མཚན་འཁོད་ཞུ་སྙན་ཞིག་ཞུ་གཏུགས་ལས་འགུལ་ནང་མཉམ་ཞུགས་གནང་མཁན་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གི་སྐུ་ཚབ་རྣམས་ནས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་འབྲུག་རྒྱལ་ཁབ་ཀྱི་གཞུང་ཚབ་ཁང་དུ་ཕུལ་ཐུབ་པ་ཡང་བྱུང་ཡོད།