གུ་རུ་སྤྲུལ་སྐུ་རིན་པོ་ཆེ་མཆོག་གཙོས་པའི་མཛད་གཙོ་ཁག་གཅིག་ལ་ཕེབས་བསུའི་སྣེ་ལེན།

ཕྱི་ལོ་ ༢༠༢༢ ཟླ་ ༣ ཚེས་ ༣༠ ཉིན་རྒྱ་གར་དབུས་གཞུང་ནས་གྲགས་ཅན་གཟེངས་རྟགས་( Padma Shri award ) ཐོབ་མཁན་གུ་རུ་སྤྲུལ་སྐུ་རིན་པོ་ཆེ་མཆོག་དང་། ཨ་རུ་ཎ་ཅལ་མངའ་སྡེའི་ཀ་ལག་ཐང་ས་གནས་གྲོས་ཚོགས་འཐུས་མི་རྡོ་རྗེ་དབང་འདུས་ཀརྨ་( Dorjee Wangdi Karma) མཆོག་དང་། འབུམ་སྡེ་ལ་ས་གནས་གྲོས་ཚོགས་འཐུས་མི་གདོང་རུ་གསོང་ཅུ་(Dongru Siongju) མཆོག དེ་བཞིན་འབུམ་སྡེ་ལ་ས་གནས་གྲོས་ཚོགས་འཐུས་མི་མཆོག་གི་སྐུ་ཟླ་བསོད་ནམས་ཆོས་འཛོམས་Sonam Chojom ( w/o Bomdila MLA) ལགས། ས་གནས་མི་མང་དབུ་ཁྲིད་རྡོ་རྗེ་དབང་འདུས་ནམ་ས་Dorjee Wangdi Namsa (Public Leader)ལགས་བཅས་གྷ་གྷལ་གནམ་ཐང་ནས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་བཞིས་ཕེབས་བསུ་དང་བཅས་གཞོན་ལྷན་སྤྱི་ཁྱབ་ཡིག་ཚང་དུ་གདན་ཞུས་ཀྱིས་གསོལ་ཇ་བཞེས་ཏོག་འདེགས་འབུལ་གྱིས་ད་བར་བོད་དོན་འཐབ་རྩོད་ཐད་རྒྱབ་སྐྱོར་རོགས་རམ་གནང་བར་ཐུགས་རྗེ་ཆེ་ཞུས་ཡོད།

གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་ནས་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཚོགས་འདུར་མཉམ་ཞུགས།

ཕྱི་ལོ་ ༢༠༢༢ ཟླ་ ༥ ཚེས་ ༢༧ ནས་ ༢༩ བར་ཉིན་གྲངས་གསུམ་རིང་སི་པན་གྱི་གྲོང་ཁྱེར་བྷར་སི་ལོ་ནར་(Barcelona)གྱི་བོད་ཁང་དུ་རྒྱལ་སྤྱིའི་བོད་དོན་འབྲེལ་མཐུད་ཁང་གི་མགྲོན་འབོད་ལྟར་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་མཉམ་ཞུགས་གནང་ཡོད། སྐབས་དེར་ཨ་རི་དང་། ཨབ་ཧྥེ་རི་ཁ། ཡུ་རོབ། ཨེ་ཤེ་ཡ་བཅས་རྒྱལ་ཁབ་ཁག་ ༡༨ ནང་ཡོད་པའི་བོད་དོན་རྒྱབ་སྐྱོར་བ་དང་། བོད་མི་ལས་འགུལ་ཚོགས་སྡེ་ཁག་གི་སྐུ་ཚབ་བཅས་ཁྱོན་ཚོགས་བཅར་བ་གྲངས་ ༥༥ ལྷག་གི་ཚོགས་འདུ་ཞིག་སྐོང་ཚོགས་གནང་ཡོད། ཚོགས་འདུའི་སྐབས་གཞོན་ལྷན་ཚོགས་གཙོ་ནས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་ལས་དོན་བྱེད་ཕྱོགས་དེར་བོད་དོན་རྒྱབ་སྐྱོར་བ་རྣམས་ནས་མུ་མཐུད་ནས་རྒྱབ་སྐྱོར་དགོས་གལ་གྱི་གཏམ་བཤད་དང་། དུས་ད་ལྟ་བར་བོད་དོན་འཐབ་རྩོད་སྤྱི་དང་། བོད་ཀྱི་གཞོན་ནུ་ལྷན་ཚོགས་ཀྱི་བོད་རང་བཙན་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་དང་མཉམ་ཞུགས་གནང་མཁན་ཚང་མར་ཐུགས་རྗེ་ཆེ་ཞུས་གནང་ཡོད། ཚོགས་འདུ་ཉིན་གསུམ་རིང་གཞོན་ལྷན་གྱི་གྲོགས་པོ་རྙིང་པ་རྣམས་དང་ལྷན་དུ་མཇལ་མོལ་དང་། ཚོགས་བཅར་བ་གསར་པ་འགར་འབྲེལ་ལམ་གསར་བཟོ་ཐུབ་པ་བྱུང་ཡོད། ཚོགས་འདུ་ལེགས་པར་གྲུབ་རྗེས་སྤྱི་ཟླ་ ༦ ཕྱི་ཚེས་ ༡ ཉིན་ཕྱིར་རྒྱ་གར་དུ་ཕེབས་འབྱོར་བྱུང་ཡོད།

ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་དང་མཇའ་འཕྲད།

ཕྱི་ལོ་ ༢༠༢༢ ཟླ་ ༣ ཚེས་ ༩ ཉིན་རྒྱབ་ཕྱག་ཚོད་ ༢ པ་ནས་ ༤ བར་གཞོན་ལྷན་ཡིག་ཚང་ནང་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཇི་རི་ཨོ་བྷི་ལེ་རྫར་ (Jiri Oberfalzer, Vice President of the Czech Senate) མཆོག་དང་། སྐུ་ཞབས་ཁོང་གི་སློབ་སྟོན་པ། ཅེག་གཞུང་ཚབ་ཁང་གི་དྲུང་ཆེ། དེ་བཞིན་སྣེ་ལེན་པ་དང་། སྐད་སྒྱུར་ལས་བྱེད་བཅས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཡིག་ཚང་དུ་ཆེད་ཕེབས་ཀྱིས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ལྔའི་འཐུས་མི་དང་ལྷན་དུ་བོད་ནང་གི་ཛ་དྲག་གནས་སྟངས་ཐད་བཀའ་བསྡུར་ཞིབ་ཕྲ་བྱུང་ཡོད་པ་མ་ཟད།

གཞོན་ལྷན་ཟུང་དྲུང་ཚེ་དབང་རབ་རྒྱས་ལགས་ནས་ཅེག་སྤྱི་མཐུན་རྒྱལ་ཁབ་དང་གྲོས་ཚོགས་འཐུས་མི་རྣམ་པའི་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུའི་གོ་སྐབས་ཡང་བྱུང་ཡོད།

བདམས་ཐོན་བཀའ་བློན་རྣམས་ལ་འཚམས་འདྲིར་བཅར་བ།

བོད་རྒྱལ་ལོ་ ༢༡༤༨ ཕྱི་ལོ་ ༢༠༢༡ ཟླ་ ༡༡ ཚེས་ ༡༠ ཉིན་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་དང་། ཚོགས་མི་ཡོངས་ནས་སྐབས་ ༡༦ པའི་བཀའ་ཤག་གི་བདམས་ཐོན་བཀའ་བློན་གཞོན་ལྷན་དབུས་རྒྱུན་ཟུར་པ་དང་། བདེ་སྲུང་བཀའ་བློན་སྐུ་ངོ་རྒྱ་རི་སྒྲོལ་མ་མཆོག། ཤེས་རིག་བཀའ་བློན་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་སུ་འཚམས་འདྲི་ཞུ་རྒྱུར་མིགས་ཏེ་གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་དང་། སྒྲིག་འགན་སྤེན་པ་ཚེ་རིང་ལགས་རྣམ་གཉིས་བཀའ་བློན་རྣམ་པའི་ལས་ཁུངས་སུ་ཆེད་བཅར་གྱིས་ལྷད་མེད་དཀར་གཙང་གི་མཇལ་དར་སྒྲོན་གནང་སྟེ་འཚམས་འདྲི་ཞུས་ཡོད་པ་མ་ཟད། མ་འོངས་ལས་དོན་ཐ་དག་ལམ་ལྷོངས་ལེགས་གྲུབ་ཡོང་བའི་བཀྲིས་སྨོན་འདུན་ཡང་ཞུས་གནང་ཡོད།

འཕགས་བོད་མཛའ་འབྲེལ་ཚོགས་པ་དབུ་བརྙེས་པའི་མཛད་སྒོ

ཕྱི་ལོ་ ༢༠༢༢ ཟླ་ ༥ ཚེས་ ༥ ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་འཕགས་བོད་མཛའ་འབྲེལ་ཚོགས་པ་དབུ་བརྙེས་ཏེ་ལོ་ངོ་ཧྲིལ་པོ་ ༢༣ འཁོར་བའི་དུས་སྟོན་མཛད་སྒོར་དམིགས་བསལ་སྐུ་མགྲོན་དུ་གདན་ཞུས་ལྟར་མཉམ་ཞུགས་ཀྱིས་མཛད་སྒོར་གསུང་བཤད་གནང་ཡོད།

གསུང་བཤད་ཀྱི་ཐོག་མར་འཕགས་བོད་མཛའ་འབྲེལ་ཚོགས་པའི་ཚོགས་གཙོ་གཙོས་པའི་ཚོགས་མི་ཡོངས་ནས་དུས་ནམ་ཡིན་བོད་དོན་འཐབ་རྩོད་ཀྱི་ལས་འགུལ་གང་མང་ཞིག་བརྩམས་དང་རྩོམ་མུས་ཡིན་པར་ཡི་རངས་བསྔགས་བརྗོད་ཀྱི་ཐུགས་རྗེ་ཆེ་ཞུས་ཡོད་པ་མ་ཟད། མ་འོངས་པར་མུ་མཐུད་བོད་ཀྱི་གཞོན་ནུ་ལྷན་ཚོགས་གཙོས་པའི་བོད་དོན་འཐབ་རྩོད་ཀྱི་ལས་འགུལ་བ་ཚོ་དང་མཉམ་འབྲེལ་གྱིས་ལས་འགུལ་གང་མང་སྤེལ་ཏེ་བོད་མིའི་རང་བཙན་འཐབ་རྩོད་ཀྱི་ལས་འགུལ་ནང་ནུས་པ་མཉམ་སྤུངས་ཡོང་བའི་རེ་སྐུལ་ཡང་ཞུས་གནང་ཡོད།

རྒྱ་གར་གྱི་དམག་དཔོན་ཟུར་པ་དང་། བོད་དོན་རྒྱབ་སྐྱོར་བ་སྐུ་ཞབས་བྷག་ཤི་ (G.D. Bakshi) མཆོག་གི་གཏམ་བཤད།

ཕྱི་ལོ་ ༢༠༢༡ ཟླ་ ༡༡ ཚེས་ ༨ ཉིན་བོད་ཀྱི་གཞོན་ནུ་ལྷན་ཚོགས་གཙོས་པའི་བཞུགས་སྒར་རྡ་སའི་ཁུལ་གྱི་གཞུང་འབྲེལ་མིན་པའི་ཚོགས་པ་སྐྱིད་སྡུག་ཐུན་མོང་གིས་བོད་ཀྱི་ཟློས་གར་ཚོགས་ཁང་དུ་བོད་དང་། རྒྱ་གར། རྒྱ་ནག་བཅས་སུ་ལྟ་ཚུལ་གསར་པ་ ( Indo-Tibet & China New Perspective 2021) ཞེས་པའི་བརྗོད་གཞི་ཐོག རྒྱ་གར་གྱི་དམག་དཔོན་ཟུར་པ་དང་རྩོམ་པ་པོ། བོད་དོན་རྒྱབ་སྐྱོར་བ་སྐུ་ཞབས་བྷག་ཤི་ (G.D. Bakshi) མཆོག་གི་གཏམ་བཤད་ལས་རིམ་ཞིག་གོ་སྒྲིག་ཞུས་ཡོད།

གཏམ་བཤད་ལས་རིམ་གྱི་མཛད་སྒོའི་མགྲོན་གྱི་གཙོ་བོ་རྒྱ་གར་གྱི་དམག་དཔོན་ཟུར་པ་དང་། བོད་དོན་རྒྱབ་སྐྱོར་བ་སྐུ་ཞབས་བྷག་ཤི་མཆོག་དང་། དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཞོན་སྐུ་ངོ་སྒྲོལ་མ་ཚེ་རིང་ལགས། དེ་བཞིན་སྐུ་མགྲོན་དུ། རྒྱ་གར་གྱི་མཚོ་དམག་གི་རུ་དཔོན་ཟུར་པ་སྐུ་ཞབས་ (Sanjay Prashar) མཆོག རྒྱ་གར་རྒྱལ་ཡོངས་འཕགས་བོད་འབྲེལ་འཐུད་ཚོགས་པའི་དྲུང་ཆེ་ (Sunil Manocha) དང་། ཧི་མ་ཅལ་མངའ་ཁོངས་ཀྱི་འཕགས་བོད་འབྲེལ་འཐུད་ཚོགས་པའི་ཚོགས་གཙོ་ (Ajay Singh Mankotia) མཆོག དེ་བཞིན་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་དང་རྒྱུན་ལས་རྣམ་པ། རྡ་སའི་ཁུལ་གྱི་མི་མང་བཅས་ཆེད་འཛོམས་ཐོག མཛད་རིམ་གི་གཙོ་སྐྱོང་དེ་བཞིན་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ནས་གནང་སྟེ། མཛད་སྒོའི་ཐོག་མར་ཧིན་བོད་གཉིས་ཀྱི་རྒྱལ་གླུ་གཏོང་གནང་དང་། རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་བཅས་གྲུབ་རྗེས་མཛད་སྒོ་མངོས་སུ་དབུ་འཛུགས་ཀྱིས་སྐུ་མགྲོན་རྣམས་ནས་རེ་མོས་ཀྱིས་གཏམ་བཤད་སྤེལ་གནང་དང་། མི་མང་ནས་དྲི་བ་དྲིས་ལན་གྱི་ལས་རིམ་ཞིག་ཀྱང་གོ་སྒྲིག་ཞུས་པའི་ཐོག་མཛད་སྒོ་ལེགས་གྲུབ་བྱུང་ཡོད།