བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་ཚོགས་གཙོ་མགོན་པོ་དོན་གྲུབ་མཆོག་ཁ་སེང་ཀ་ལིང་སྦུག་ཏུ་ཆེད་བཅར་གྱིས་དེ་རིང་ཕྱི་ལོ་ ༢༠༢༥ ཟླ་ ༢ ཚེས་ ༡༡ ཉིན་གྱི་ཞོགས་པ་༧སྐུའི་གཅེན་པོ་བཀའ་བློན་ཁྲི་ཟུར་ལྷ་སྲས་རྒྱ་ལོ་དོན་གྲུབ་མཆོག་གི་སྐུ་ཕུང་བཞུགས་འབུལ་གྱི་ཆོས་ཕྱོགས་ཀྱི་བྱེད་སྒོར་མཉམ་ཞུགས་ཀྱིས་དམ་པ་དེ་ཉིད་ནས་སྐུ་ཚེ་ཧྲིལ་པོར་བོད་བསྟན་སྲིད་མི་རིགས་ཀྱི་དོན་དུ་ཞབས་ཞུ་རླབས་ཆེན་བསྒྲུབ་གནང་བར་བཀའ་དྲིན་རྗེས་དྲན་ཞུས་ཡོད། བཞུགས་འབུལ་སྐབས་རང་གཞུང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྐུ་ངོ་སྤེན་པ་ཚེ་རིང་མཆོག་དང་བདེ་སྲུང་བཀའ་བློན་སྐུ་ངོ་རྒྱ་རི་སྒྲོལ་མ་མཆོག འབྲས་ལྗོངས་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་མིག་དམར་ནོར་བུ་ཤར་པ་མཆོག འབྲས་ལྗོངས་བློན་ཆེན་བསོད་ནམས་བླ་མ་མཆོག དཔལ་ལྡན་དགའ་ལྡན་ཕོ་བྲང་གི་དྲུང་ཆེ་སྐུ་ངོ་བློ་བཟང་སྦྱིན་པ་མཆོག དཔལ་ལྡན་བོད་མི་སྤྱི་འཐུས་རྣམ་པ། ཡབ་གཞིས་སྐུ་འཁོར་དང་ནང་མི་ལྷན་རྒྱས། མདའ་དཔོན་ཟླ་བ་ལགས་གཙོས་སྐུ་ངོ་ས་གནས་འགོ་འཛིན་དང་ཚོགས་སྡེ་ཁག་གི་སྐུ་ཚབ་རྣམ་པ་བཅས་ཆེད་བཅར་གནང་ཡོད།
ཕྱི་ལོ་ ༢༠༢༥ ཟླ་ ༢ ཚེས་ ༡༡ ཉིན་གྱི་ཞོགས་པ་ཆུ་ཚོད་ ༦།༣༠ ནས་ ༨།༣༠ བར་༧སྐུའི་གཅེན་པོ་བཀའ་བློན་ཁྲི་ཟུར་ལྷ་སྲས་རྒྱ་ལོ་དོན་གྲུབ་མཆོག་གི་སྐུ་ཕུང་བཞུགས་འབུལ་གྱི་དུས་ཚོད་དང་སྟབས་བསྟུན་གྱིས་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་དང་རྡ་ས་ས་གནས་གཞོན་ལྷན་གཉིས་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་ཞིག་གོ་སྒྲིག་ཞུས་ཏེ་ཡབ་གཞིས་སྐུ་འཁོར་དང་ཤུལ་ལུས་བཟའ་མི་བུ་ཕྲུག་རྣམས་ལ་གདུང་སེམས་མཉམ་སྐྱེད་དང་། དམ་པ་དེ་ཉིད་ཀྱིས་སྐུ་ཚེ་ཧྲིལ་པོར་བོད་བསྟན་སྲིད་མི་རིགས་ཀྱི་ཆེད་ཏུ་ཞབས་ཞུ་རླབས་པོ་ཆེ་སྒྲུབ་གནང་བར་བཀའ་དྲིན་རྗེས་དྲན་དང་། གཞན་ཡང་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་ཐུགས་སྨོན་གནང་བ་བཞིན་དམ་པ་དེ་ཉིད་སྐྱེ་གནས་བཟང་པོ་ཞིག་དང་། ལྷག་པར་བོད་མི་རིགས་ཀྱི་བསྟན་སྲིད་ལ་ཞབས་འདེགས་སྒྲུབ་མཁན་ཞིག་རྒྱུན་མཐུད་ནས་ཡོང་ཐུབ་པར་སྨོན་ལམ་གསོག་སྒྲུབ་ཞུས།
