ཕྱི་ལོ་ ༢༠༢༦ ཟླ་ ༨ ཚེས་ ༤ ཉིན་ཚེ་དབྱངས་ལགས་ནས་འགྲེལ་ལམ་འཐུན་འགྱུར་གྱིས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་གཙོས་པའི་དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་ཟུར་པ་བཀྲིས་ལམ་བཟང་ལགས། ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་ནོར་སྒྲོན་ལགས། ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསོད་ནམས་སྟོབས་ལྡན་ལགས་དང་བཅས་ནས་ཨ་རིའི་གྲོས་ཚོགས་འོག་མའི་འཐུས་མི་ Grace Meng ལགས་དང་མཇལ་འཕྲད་བྱུང་ཡོད་བ་དང་། དེ་སྐབས་བོད་ནང་གི་ཛ་དྲག་གནས་ཚུལ་སྐོར་དང་། རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་འོག་བོད་ནང་གི་བོད་མི་རྣམས་དཀའ་སྡུག་ཚད་མེད་མྱངས་དང་མྱོང་བཞིན་པ། མཐའ་ན་བོད་ནང་ལ་གཞི་རྩའི་འགྲོ་བ་མིའི་ཐོབ་ཐང་ཙམ་ཡང་མེད་པའི་གནས་ཚུལ་སྐོར་ངོ་སྤྲོད་ཞིབ་ཕྲ་ཞུས། ལྷག་པར་དུ་ཟླ་བ་གོང་མའི་ཚེས་ ༢ ཉིན་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་མདུན་སར་བོད་རང་དབང་རང་བཙན་འཐབ་རྩོད་པ་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་བོད་བསྟན་སྲིད་མི་རིགས་ཀྱི་སླད་རང་ལུས་མེར་སྲེག་གནང་བའི་སྐོར་ལ་དམིགས་བསལ་གྱིས་ཞིབ་ཕྲའི་གནས་ཚུལ་ཞུས། དེ་མིན་བོད་དོན་རྒྱབ་སྐྱོར་མུ་མཐུད་ཡོང་བའི་འབོད་སྐུལ་ཡང་ཞུ་རྒྱུ་བྱུང་ཡོད།
