ཕྱི་ལོ་ ༢༠༢༦ ཟླ་ ༧ ཚེས་ ༣༡ ཉིན་གྱི་ཕྱི་དྲོ་ཆུ་ཚོད་ ༥།༣༠ ཐོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་ཚེ་རིང་ཆོས་འཕེལ་ལགས་དང་། སྤྱི་ཁྱབ་ཚོགས་ཟུར་ཚེ་དབང་རིག་འཛིན་ལགས། སྤྱི་ཁྱབ་རྒྱུན་ཟུར་ནོར་བཟང་ལགས་བཅས་ནས་ནིའུ་ཡོག་མཉམ་འབྲེལ་རྒྱལ་ཚོགས་མདུན་ཐང་དུ་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་སྲེག་གནང་སའི་ཡུལ་དངོས་སུ་ཕེབས་ཡོད། སྐབས་དེར་རྒྱལ་གཅེས་དཔའ་བོ་ཁོང་གི་སྙིང་སྟོབས་དང་ལྷག་བསམ། བློས་གཏོང་བཅས་པར་གུས་བཀུར་ཡི་རང་དང་། གདུང་སེམས་མཉམ་སྐྱེད་ཞུས་ཤིང་། བོད་དོན་བདེན་པའི་འཐབ་རྩོད་ཀྱི་ལས་དོན་ཐད་ཞབས་ཕྱི་ཞུ་རྒྱུའི་དམ་བཅའ་བསྐྱར་དུ་བརྟན་དུ་བཏང་ཡོད། རྒྱལ་གཅེས་དཔའ་བོ་རང་བཙན་བློ་དགའ་ལགས་ལ་གུས་བརྩི་ཟབ་མོའི་ངང་དྲན་གསོ་ཞུ་རྒྱུ་དང་། ཁོང་གིས་སྐུ་སྲོག་བློས་གཏོང་གནང་བ་དེས་རྒྱལ་སྤྱི་དང་མིག་གསལ་རྒྱལ་སྤྱིའི་མཉམ་འགྲེལ་རྒྱལ་ཚོགས་ལ་བོད་ནང་གི་གནས་སྟངས་ཧ་ཅང་ཛ་དྲག་ཏུ་ལྷུང་ཡོད་པས་ཐུགས་སྣང་དགོས་པའི་གལ་ཆེའི་དོན་དངོས་དྲན་སྐུལ་གནང་ཡོད་པ་དང་། བཙན་བྱོལ་བོད་མི་ཚོ་ལ་ཡང་བོད་རང་བཙན་གྱི་དོན་དུ་ལས་འགུལ་གང་མང་སྤེལ་དགོས་པའི་འབོད་སྐུལ་བཅས་གནང་ཡོད། ང་ཚོས་རྒྱལ་གཅེས་དཔའ་བོ་དཔའ་མོ་ཚོའི་ལྷག་བསམ་དང་སྙིང་སྟོབས། བློས་གཏོང་བཅས་བརྗེད་མེད་ལ། ཁོང་རྣམ་པའི་ཞལ་ཆེམས་དང་མངོན་འདོད་དེ་བས་བརྗེད་མེད། ང་ཚོས་བོད་བརྗེད་མེད་ལ་བོད་དོན་འཐབ་རྩོད་དེ་བས་བརྗེད་མེད། བོད་རང་བཙན་སླར་གསོའི་དོན་དུ་ངོ་རྒོལ་སྐད་འབོད་དང་། བོད་དོན་ཞུ་གཏུགས་ལས་འགུལ་མུ་མཐུད་ནས་སྤེལ་རྒྱུ་ཡིན།
