ཚོགས་འདུ་དེ་བོད་ཀྱི་གཞོན་ནུ་ལྷན་ཚོགས་ཀྱི་ངོ་སྤྲོད་ཀྱིས་འགོ་བཙུགས་པ་དང་། དེ་ནི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་སྐུ་ཞབས་བཀྲ་ཤིས་དར་རྒྱས་དང་། བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་སྐུ་ཞབས་བསྟན་འཛིན་བློ་བཟང་གཉིས་ཀྱིས་གནང་། ཁོང་གིས་སྐུ་ཚབ་ཚོགས་པར་བོད་ཀྱི་གཞོན་ནུ་ལྷན་ཚོགས་ནི་བོད་མི་གཞོན་སྐྱེས་ཀྱིས་འགོ་ཁྲིད་པའི་བོད་ཀྱི་ཚོགས་པ་ཆེ་ཤོས་དང་བྱེད་སྒོ་ཆེ་ཤོས་ཡིན་པ་དང་། བོད་ཀྱི་གཞོན་ནུ་ལྷན་ཚོགས་ཀྱིས་དོན་རྐྱེན་ཆེན་པོ་དང་མཉམ་འབྲེལ་ངོ་རྒོལ་སྐབས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་གཞན་དག་གི་འགོ་ཁྲིད་ཀྱང་བྱེད་ཀྱི་ཡོད་པའི་སྐོར་གསལ་བཤད་གནང་།
དེའི་རྗེས་སུ་སྐུ་ཞབས་ཚང་ཧྲུན་ཧོ་(Mr. Tsang Hsun Ho ) ཡིས་ཐེ་ཝན་མི་སེར་གྱི་མཉམ་ཞུགས་ཀྱི་གསར་འཛུགས་ཚོགས་གཙོ་ཡིས་ཐེ་ཝན་གྱི་སྐུ་ཚབ་ཚོགས་པ་ངོ་སྤྲོད་གནང་བ་དང་། གཞུང་འབྲེལ་མ་ཡིན་པའི་ཚོགས་པ་མི་འདྲ་བ་དྲུག་གིས་སྐུ་ཚབས་གནང་ཏེ་ཁོང་རྣམས་པའི་ངོ་སྤྲོད་ཀྱིས་འགོ་བཙུགས།
ཁོང་གིས་བོད་མི་རང་ལུས་མེར་སྲེག་གཏོང་བའི་གནས་སྟངས་དེ་ང་ལ་སེམས་ཁྲལ་ཆེན་པོ་བྱུང་། ངས་རང་ལུས་མེར་སྲེག་གཏོང་མཁན་གཉིས་པ་མཐོང་སྐབས། ངས་ཁོང་མེ་ལྕེའི་ནང་དུ་འཚུད་པ་དང་། ཁོང་གི་ཁ་ནས་དུ་བ་ནག་པོ་ཐོན་པ་མཐོང་། མཐོང་སྣང་དེས་ང་ལ་སེམས་འགུལ་ཆེན་པོ་ཐེབས་པ་དང་། དེ་ངའི་སྐྱེས་སྐར་ཉིན་བྱུང་བས་དེ་ནི་ཉམས་མྱོང་ཧ་ཅང་ཟབ་མོ་ཞིག་བྱུང་།
ཚོགས་འདུའི་སྐབས་སུ། སྐུ་ཞབས་ཚང་(Mr. Tsang Hsun Ho ) གིས་བོད་ཀྱི་དཔའ་བོ་དཔའ་མོ་ཚང་མའི་མཚན་བྱང་བཀོད་པའི་ཁོང་གི་ཡིག་གཟུགས་སྒྱུ་རྩལ་ཞིག་ཅོག་ཙེའི་སྟེང་དུ་བཤམས་ཏེ་གདུང་སེམས་མཉམ་སྐྱེད་དང་གུས་བཀུར་མཚོན་པར་བྱས།
ཅོག་ཙེའི་སྟེང་དུ་བོད་ཀྱི་རང་ལུས་མེར་སྲེག་གནང་མཁན་ཐོག་མ་དཔའ་བོ་ཐུབ་བསྟན་དངོས་གྲུབ་དང་དཔའ་བོ་བྱམས་པ་ཡེ་ཤེས་གཉིས་ཀྱི་སྐུ་པར་དང་དྲན་རྟེན་བཤམས་ཡོད་པ་མ་ཟད། བོད་ཀྱི་དཔའ་བོ་དཔའ་མོ་ཚང་མའི་བློས་གཏོང་མཚོན་པའི་ཡིག་གཟུགས་སྒྱུ་རྩལ་ཡང་བཤམས་ཡོད། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་གྱིས་སེམས་གཏིང་ནས་ཐུགས་རྗེ་ཆེ་ཞུས་དོན། “ང་ཚོས་ཁྱེད་ཀྱི་ཡིག་གཟུགས་བཤམས་པའི་ཅོག་ཙེ་དེ་རང་གི་སྟེང་དུ་བོད་ཀྱི་དཔའ་བོ་བཞིའི་སྐུ་ཕུང་འཇོག་པའི་ཐོག་ཁོང་རཉམས་པའེ་ཆེད་དུ་སྨོན་ལམ་གསོལ་འདེབས་བྱས་པ་ཡིན། དེ་དུས་ང་ཚོས་ཁོང་ཚོའི་རྣམ་ཤེས་དམ་པ་ང་ཚོ་དང་མཉམ་དུ་ཡོད་པ་ཚོར་བྱུང་། སེམས་སྐྱོ་བའི་ངང་ནས་ཁྱེད་ཀྱིས་ང་ཚོར་སྐད་ཅིག་མ་ཟབ་མོ་འདི་བསྐྲུན་པར་ཐུགས་རྗེ་ཆེ་ཞུ་རྒྱུ་ཡིན།”
ཐོག་མར་ཆུ་ཚོད་ཕྱེད་ཀའི་རིང་གི་ཚོགས་འདུ་ཞིག་གོ་སྒྲིག་བྱས་ཡོད་ཀྱང་། གྲོས་བསྡུར་སྐབས་ཕན་ཚུན་གོ་རྟོགས་ཟབ་མོ་དང་། ཐུན་མོང་གི་རིན་ཐང་། དམིགས་ཡུལ་གཅིག་མཚུངས་བཅས་བྱུང་བའི་རྐྱེན་གྱིས་ཆུ་ཚོད་གཉིས་རིང་རྒྱུན་བསྲིངས་བྱུང་། ཕྱོགས་གཉིས་ཀས་སྤྱི་ཚོགས་ཀྱི་མཉམ་ཞུགས་དང་། འགྲོ་བ་མིའི་ཐོབ་ཐང་གི་དོན་དུ་ཞུ་གཏུགས། རང་དབང་དང་དམངས་གཙོ་གོང་འཕེལ་གཏོང་བར་གཞོན་སྐྱེས་ཀྱིས་སྣེ་ཁྲིད་པའི་ལས་འགུལ་གྱི་གལ་ཆེན་རང་བཞིན་བཅས་ཀྱི་ཐོག་བསམ་ཚུལ་བརྗེ་རེས་བྱས།
ཚོགས་འདུ་དེ་བོད་དང་ཐེ་ཝན་གྱི་གཞུང་འབྲེལ་མིན་པའི་ཚོགས་པ་ཁག་དབར་མུ་མཐུད་གྲོས་མོལ་དང་མཉམ་ལས་བྱ་རྒྱུའི་དམ་བཅའ་དང་མཉམ་དུ་མཇུག་བསྒྲིལ།