ཕྱི་ལོ་ ༢༠༢༦ ལོའི་ཟླ་ ༡ ཚེས་ ༢༠ ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་དང་། ཚོགས་གཞོན་བཀྲ་ཤིས་དར་རྒྱས་ལགས་རྣམ་གཉིས་ཀྱིས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ཐའེ་ཝན་གྱི་དཔལ་འབྱོར་དང་རིག་གཞུང་ལྟེ་གནས་ཁང་ (ཐའེ་ཝན་གཞུང་ཚབ་ཁང་) ཆེད་བཅར་གྱིས་སྐུ་ཚབ་དོན་གཅོད་མུ་མིན་ཅེན་དང་ལས་རོགས་དང་བཅས་མཇལ་འཕྲད་ཀྱིས་ཕྱོགས་གཉིས་ཀའི་གནད་དོན་་མང་པོར་ཕན་ཚུན་བགྲོ་གླེང་བྱས་ཏེ་བཀའ་མོལ་ལྷུག་པོ་བྱུང་ཡོད། སྐུ་ཚབ་དོན་གཅོད་མུ་མིན་ཅེན་གྱིས་ཐའེ་ཝན་གཞུང་ནས་བོད་ཀྱི་གནད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་པར་བརྗོད་པ་དང་། ཐའེ་ཝན་དང་བོད་གཉིས་དབར་གྱི་འབྲེལ་བ་སྔར་ལས་གོང་འཕེལ་གཏོང་དགོས་པའི་གལ་ཆེའི་རང་བཞིན་གྱི་གྲོས་བསྡུར་བྱུང་ཡོད། ཕྱོགས་གཉིས་ཀས་མ་འོངས་པར་མཉམ་ལས་དང་མཐུན་སྒྲིལ་སྔར་ལས་གོང་འཕེལ་གཏོང་རྒྱུའི་གལ་གནད་ཡིན་པའི་སྐོར་གྲོས་བསྡུར་ལྷུག་པོ་བྱུང་ཡོད།

རྒྱ་གར་རྒྱལ་ས་ལྡི་ལིར་དགུན་དུས་གྲོས་ཚོགས་(Winter session)དུས་སྐབས་སུ་བོད་ཀྱི་གཞོན་ནུ་ཚོགས་པའི་དྲུང་ཆེ་བསྟན་འཛིན་བློ་བཟང་མཆོག་དང་། དྷ་རམ་ས་ལར་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ལྷན་རྒྱ་གར་གྲོས་ཚོགས་འཐུས་མི་གང་མང་མཇལ་རྒྱུའི་འབད་བརྩོན་ཐོག་དོན་མཚན་བཞི་ཅན་གྱི་ཞུ་འབོད་དང་བཅས་གྲོས་ཚོགས་འཐུས་མིར་དོན་མཚན་དེ་དག་གྲོས་ཚོགས་སྐབས་སུ་གྲོས་གཞིར་གླེང་སློང་དང་གྲོས་ཆོད་གཏན་འབེབས་ཡོང་སླད་རེ་བ་དང་འབོད་སྐུལ་ཞུ་བཞིན་ཡོད། ད་བར་རྒྱ་གར་གྲོས་ཚོགས་ཚོགས་མི་དགུ་མཇལ་བར་གྲོས་ཚོགས་མཐུན་མི་ཚང་མས་རྒྱབ་བསྐྱོར་བཤུགས་ཆེར་བྱུང་བ་དང་། ད་དུང་ཡང་གྲོས་ཚོགས་འཐུས་མི་མང་པོ་མཇལ་ཐུབ་པའི་རེ་བ་དང་འབད་བརྩོན་ཞུ་བཞིན་ཡོད།

ཕྱི་ལོ་ ༢༠༢༥ ཟླ་ ༡༢ ཚེས་ ༡༢ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་དུ་ཉེ་ཆར་གཞིས་ཀ་རྩེ་ལ་རྒྱ་ནག་གཞུང་གིས་བསྐོ་བཞག་བྱས་པའི་རྒྱལ་མཚན་ནོར་བུ་ཡིས་མ་འོངས་པར་༧གོང་ས་མཆོག་གི་ཡང་སྲིད་ངོས་འཛིན་དེ་རྒྱ་ནག་གཞུང་གི་ཁྲིམས་ལུགས་གཞིར་བཟུང་བྱེད་དགོས་ཚུལ་བརྗོད་པ་དེར་ངོ་རྒོལ་གྱི་བསྒྲགས་གཏམ་ཞིག་སྤེལ་ཡོད།

Rebuttal statement (Tib)      Rebuttal statement (Eng) 

ཕྱི་ལོ་ ༢༠༢༥ ཟླ་ ༡༢ ཚེས་ ༡༡ ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གྱི་འགན་འཛིན། རྒྱ་གར་བོད་རང་བཙན་སློབ་ཕྲུག་ཚོགས་པའི་ཚོགས་མི། དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་སྐུ་ཚབ་བཅས་ཀྱིས་ཨོ་སི་ཊི་ལི་ཡ་དང་། ནིའུ་ཛི་ལན་ཌི། ཕི་ཇི་བཅས་ཀྱི་སྐུ་ཚབ་རྣམས་དང་མཉམ་དུ་དགོང་ཟས་བཞེས་པའི་གོ་སྐབས་བྱུང་། དེའི་ནང་ཨོ་སི་ཊི་ལི་ཡའི་གྲོས་ཚོགས་འཐུས་མི་སྐུ་ཞབས་བྷར་བྷ་ར་པོ་ཀོག་དང་ཁོང་གི་སྐུ་ཟླ་ཨི་ཡན། གྲོས་ཚོགས་འཐུས་མི་སྐུ་ཞབས་ཀེ་ཊི་ཆེ་ནེ་དང་སཱ་རཱ་ཝི་ཊི་དང་ཁོང་གི་སྐུ་ཟླ་པོལ། ནིའུ་ཛི་ལན་ཌིའི་གྲོས་ཚོགས་འཐུས་མི་ཌན་ཀན་ཝེབ་དང་གྷི་རེག་ཕི་ལེ་མིང་། ཕི་ཇིའི་གྲོས་ཚོགས་འཐུས་མི་ཝི་རེན་ཌི་ར་ལལ་བཅས་ཚུད་ཡོད། ང་ཚོར་བོད་ཀྱི་རང་དབང་འཐབ་རྩོད་དང་། བཙན་བྱོལ་སྤྱི་ཚོགས་ཀྱི་ལས་དོན། དེ་བཞིན་བོད་དོན་ཐོག་གི་རྒྱུན་མཐུད་ལས་འགུལ་བཅས་ཀྱི་སྐོར་ལ་གྲོས་བསྡུར་བྱེད་པའི་གོ་སྐབས་བྱུང་བ་དང། སྐུ་ཚབ་རྣམས་ཀྱིས་བཙན་བྱོལ་བོད་མི་སྤྱི་ཚོགས་ཀྱི་ཉམས་མྱོང་དང་ལྟ་ཚུལ་ཡང་གྲོས་བསྡུར་བྱུང་།

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དང་རྒྱུན་ལས་ཚོགས་མི་རྣམས་དྷ་རམ་ས་ལར་ཧི་མ་ཅལ་མངའ་སྡེའི་མི་མང་དང་མཉམ་དུ་སྨན་རྫས་ངན་གོམས་ལ་ངོ་རྒོལ་བྱེད་པའི་ལས་འགུལ་ནང་མཉམ་ཞུགས། ལས་འགུལ་སྐབས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་བྱུང་བ་དང་། རྒྱབ་སྐྱོར་མཚོན་ཆེད་དུ་དྲན་རྟེན་ཆུང་ཆུང་ཞིག་ཕུལ། གོམ་བགྲོད་འདི་ནི་གོམ་བགྲོད་ཙམ་མ་ཡིན་པར། དེ་ནི་ང་ཚོའི་གཞོན་སྐྱེས་མི་རབས་དང་མ་འོངས་པ་སྲུང་སྐྱོབ་བྱེད་པ།

དེ་བཞིན་སྨན་རྫས་ངན་གོམས་ཀྱི་གྲིབ་ནག་ལས་རང་དབང་ཐོབ་པའི་སྤྱི་ཚོགས་ཤིག་འཛུགས་སྐྲུན་གྱི་ང་ཚོའི་རྒྱལ་ཁབ་ཀྱི་མ་འོངས་པ་སྲུང་སྐྱོབ་བྱེད་དགོས།