ཕྱི་ལོ་ ༢༠༢༦ ཟླ་བ་ ༡ ཚེས་ ༢༨ ཉིན་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གར་རྒྱལ་ཡོངས་སུ་༸ཀུན་གཟིགས་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་ཆེན་པོ་མཆོག་གི་བཀའ་དྲིན་རྗེས་དྲན་ཞེས་པའི་བརྗོད་གཞིའི་འོག་བཞུགས་སྒར་རྡ་ས་གཙོ་བྱས་པའི་རྒྱ་གར་རྒྱལ་ཡོངས་ཀྱི་བོད་པའི་མཐོ་སློབ་ཁག་ཏུ་ཆེད་ལས་མི་སྣ་གདན་ཞུས་ཀྱི་དུས་དྲན་སྲུང་བརྩི་ཞུས་ཡོད་པ་དང་། འདི་ག་བཞུགས་སྒར་རྡ་རམ་ས་ལའི་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ་དམིགས་བསལ་ཆེད་ལས་གསུང་བཤད་པ་བཞི་གདན་ཞུས་ཀྱིས་བགྲོ་གླེང་གླེང་མོལ་ཞིག་བསྐོང་ཚོགས་ཞུས་ཡོད།
དེ་ཡང་གསུང་བཤད་གནང་མཁན་དུ་འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་ནས་༼༸ཀུན་གཟིགས་༸པཎ་ཆེན་རིན་པོ་མཆོག་དང་འབྲེལ་ལོ་རབས་བརྒྱད་བཅུ་པའི་ནང་སྐུ་གཤེགས་པའི་སྔ་ཕྱིའི་བོད་ཀྱི་ཆོས་ལུགས་ཀྱི་གནས་བབ།༽ ཅེེས་པ་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་གཙུག་ལག་སློབ་གཉེར་ཁང་གི་སློབ་དཔོན་གཙང་ཕྲུག་སྟོབས་ལགས་ནས་༼ ལོ་རབས་བརྒྱད་བཅུ་པའི་ནང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ནས་བོད་སྐད་ཡིག་སྦྱོང་སྤྱོད་སྤེལ་གསུམ་གྱི་མཛད་པ།༽ བོད་ནང་བཅའ་སྡོད་སློབ་གྲྭའི་གནས་བབ་གཙོ་བྱས་པའི་བོད་དོན་འཐབ་རྩོད་པ་འབུམ་རམས་པ་རྒན་རྒྱལ་ལོ་ལགས་ནས་༼ ༸ཀུན་གཟིགས་༸པཎ་ཆེན་རིན་པོ་མཆོག་དང་འབྲེལ་མི་རིགས་ཤིག་གི་ཤེས་ཡོན་སློབ་གསོ་སྤྲོད་ཐབས།༽ དེ་བཞིན་བོད་ཀྱི་ཆབ་སྲིད་བཙོན་ཟུར་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་སྐུ་ཞབས་ངག་དབང་འོད་འབར་ལགས་ནས་༼ ལོ་རབས་བརྒྱད་བཅུ་པའི་ནང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་བོད་ཀྱི་ཆབ་སྲིད་ཀྱི་འཐབ་རྩོད་དང་། བོད་ཀྱི་ཆབ་སྲིད་བཙོན་པའི་གནས་བབ།༽ ཅེས་སོགས་ཀྱི་བརྗོད་གཞིའི་ཐོག་བགྲོ་གླེང་གླེང་མོལ་གང་ལེགས་བྱུང་ཡོད་པ་དང་། གསུང་བཤད་པ་ཁོང་རྣམས་ནི་༸ཀུན་གཟིགས་༸པན་ཆེན་རིན་པོ་ཆེ་སྐུ་འཚོ་བཞུགས་ཡོད་པའི་སྐབས་མཇལ་མྱོང་ཡོད་པ་མ་ཟད། ཁོང་གི་བཀའ་སློབ་བཀའ་དྲིན་ཐོབ་མྱོང་ཡོད་པ་ཤ་སྟག་ཡིན་སྟབས་༸པཎ་ཆེན་རིན་པོ་ཆེ་མཆོག་གི་དམིགས་བསལ་མཛད་རྗེས་དང་། ཁོང་གི་རྒྱལ་ཞེན་གྱི་འཐབ་རྩོད། དཔའ་ངར་ཞུམ་མེད་ཀྱི་སྙིང་སྟོབས། རྒྱ་དམར་སྲིད་གཞུང་གི་སྡུག་རྩུབ་ཅན་གྱི་སྲིད་བྱུས་ལ་འགོག་རྒོལ་གྱི་འཐབ་རྩོད་གནང་སྟངས་སོགས་ཀྱི་ཐད་གསུང་བཤད་དང་དྲི་བ་དྲིས་ལན་གང་ལེགས་གནང་ཡོད། དེ་བཞིན་གཞོན་ལྷན་དབུས་ས་མཉམ་འབྲེལ་གྱི་གོ་སྒྲིག་འོག་རྒྱ་གར་རྒྱལ་ཡོངས་ཀྱི་བོད་རིགས་སློབ་གཉེར་བ་ཡོད་པའི་མཐོ་སློབ་ས་རཱ་དང་། རོ་ཧི་ནི། ཝ་ར་ཎ་སི། བྷེང་ལོར། མེང་ལོར། བྷ་རོ་ཌ་བཅས་སོ་སོར་ཡང་གཏམ་བཤད་པ་གདན་ཞུས་ཀྱིས་དུས་དྲན་སྲུང་བརྩི་གང་ལེགས་ཞུ་ཐུབ་པ་བྱུང་ཡོད།
