ཕྱི་ལོ་ ༢༠༢༦ ཟླ་ ༣ ཚེས་ ༤ ཉིན་རྒྱ་གར་ཡུ་གུར་ཚོགས་པ་ཡི་ཚོགས་གཙོ་སྐུ་ཞབས་ཝ་སིམ་ཨབ་དུལ་ལཱ་དང་དྲུང་ཆེ་སྐུ་ཞབས་ཏ་ལཊ་ཕེ་རོ་ཛ་རྣམ་གཉིས་བོད་ཀྱི་གཞོན་ནུ་ལྷན་ཚོགས་ཀྱི་ལས་ཁུངས་སུ་ཕེབས་ཏེ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་མཆོག་དང་ལྷན་དུ་ཚོགས་འདུ་ཞིག་ཚོགས།
ཚོགས་འདུའི་སྐབས་སུ་ཁོང་རྣམ་གཉིས་ཀྱིས་བོད་དང་ཡུ་གུར་ (ཤར་ཏུར་ཀི་སི་ཐན་) གཉིས་ཀར་རྒྱ་ནག་དམར་ཤོག་སྲིད་གཞུང་གི་གཉའ་གནོན་ལ་ངོ་རྒོལ་བྱེད་པའི་འཐབ་རྩོད་ཀྱི་ཉམས་མྱོང་སྐོར་ལ་གྲོས་བསྡུར་གནང་། དེ་བཞིན་རྒྱ་ནག་དམར་ཤོག་ཚོགས་པའི་སྲིད་བྱུས་ལ་ངོ་རྒོལ་དང་ཐེར་འདོན་བྱེད་ཕྱོགས། ལས་འགུལ་བྱེད་སྒོ་ཁག་ལ་ཚོགས་པ་གཞན་དག་དང་མཉམ་དུ་ཤུགས་སྣོན་རྒྱག་རྒྱུའི་ཐད་ལ་གཙོ་བོ་བགྲོ་གླེང་གནང་རྒྱུ་བྱུང་ཡོད།
ཚོགས་འདུ་མཇུག་བསྒྲིལ་སྐབས་བོད་དང་ཡུ་གུར་གྱི་འཐབ་རྩོད་གནས་བབ་གཅིག་མཚུངས་དང་། གདུང་སེམས་མཉམ་སྐྱེད་ཀྱི་མཚོན་རྟགས་སུ་རྒྱ་གར་ཡུ་གུར་ཚོགས་པའི་ཚོགས་གཙོ་མཆོག་ནས་བོད་ཀྱི་གཞོན་ནུ་ལྷན་ཚོགས་ལ་དྲན་རྟེན་ཞིག་དང་ཡུ་གུར་རྒྱལ་ཁབ་ཀྱི་རྒྱལ་དར་ཞིག་ཕུལ་ཡོད་པ་རེད།
