རྒྱ་སྤྱིའི་སྤྱི་ཚོགས་གཞོན་ནུ་དང་རྒྱ་གར་ཁོང་གྷེ་རེ་སི་ཚོགས་པ་གཉིས་མཉམ་འབྲེལ་གྱིས་ཕྱི་ལོ་ ༢༠༢༥ ཟླ་ ༤ ཚེས་ ༢༥ དང་ ༢༦ ཉིན་གཉིས་རིང་གོ་སྒྲིག་ཞུས་པའི་བྷར་རཊ་ཚོགས་ཆེན་ (Bharat Summit 2025) ཐོག་ཏེ་ལ་གྷན་ན་མངའ་སྡེའི་གཞུང་ནས་བོད་ཀྱི་གཞོན་ནུ་ལྷན་ཚོགས་ཀྱི་སྐུ་ཚབ་མགྲོན་འབོད་གནང་བ་བཞིན་གཞོན་ལྷན་སྤྱི་ཁྱབ་དྲུང་ཆེ་བསོད་ནམས་ཚེ་རིང་མཆོག་མཉམ་ཞུགས་གནང་ཡོད། ཚོགས་འདུའི་ཐོག་རྒྱལ་ཁབ་ ༡༠༠ ལྷག་ནས་རྒྱལ་སྤྱིའི་ནང་སྤྱི་ཚོགས་རིང་ལུགས་དང་མང་གཙོའི་ལྟ་བར་ཡིད་ཆེས་ཡོད་མཁན་གྱི་ཚོགས་པ་ ༡༠༠ ལྷག་མཉམ་ཞུགས་དང་།
རྒྱལ་ཁབ་འདྲ་མིན་གྱི་བློན་ཆེན་ ༤༠ ལྷག་དང་གྲོས་ཚོགས་འཐུས་མི་ ༥༠ ལྷག་མཉམ་ཞུགས་གནང་ཡོད། གཞན་ཡང་རྒྱལ་ཁབ་འདྲ་མིན་ནས་ཆབ་སྲིད་པ་དང་ཤེས་ཡོན་པ། དཔལ་འབྱོར་རིགས་པ་བ། ལས་འགུལ་བ། ཆེད་ལས་པ་སོགས་དམིགས་བསལ་སྐུ་མགྲོན་ ༤༥༠ ལྷག་མཉམ་ཞུགས་གནང་ཡོད་པ་མ་ཟད། ཉིན་གཉིས་རིང་ཕོ་མོ་འདྲ་མཉམ་གྱི་ཐོབ་ཐང་དང་གནམ་གཤིས་འགྱུར་ལྡོག་ལ་གདོང་ལེན་གནང་ཕྱོགས། གནས་ཚུལ་རྫུན་བཟོ་དང་འཁྱོགས་བཤད་ལ་གདོང་ལེན་བྱེད་ཕྱོགས། དཔལ་འབྱོར་འདྲ་མཉམ་གྱི་དྲང་བདེན་ལམ་ལུགས་སྤེལ་ཕྱོགས། འཁྲུག་འཛིང་ཆེ་བའི་རྒྱལ་སྤྱིའི་སྤྱི་ཚོགས་ནང་ཞི་བདེ་སྤེལ་ཐབས་སོགས་ཀྱི་ཐོག་བགྲོ་གླེང་གོ་བསྡུར་བྱས་ཡོད། གཞན་ཡང་སྤྱི་ཚེས་ ༢༥ ཉིན་གྱི་དགོང་མོར་རྒྱ་གར་བྱང་ཕྱོགས་ཀ་ཤི་མིར་དྲག་དཔྱོད་འོག་རྐྱེན་འདས་སུ་གྱུར་པའི་འདས་པོ་རྣམས་ཀྱི་ཆེད་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད་པ་མ་ཟད། སྤྱི་ཚེས་ ༢༦ ཉིན་རྒྱབ་རྒྱ་གར་གྱི་ཕྱོགས་འགལ་ཚོགས་པའི་འགོ་ཁྲིད་ར་ཧུལ་གྷན་དྷི་ཡང་ཆེད་བཅར་གྱིས་ཚོགས་འདུར་མཉམ་ཞུགས་དང་གཏམ་བཤད་སྤེལ་གནང་ཡོད། ཚོགས་འདུའི་དྲི་བ་དྲིས་ལན་སྐབས་གཞོན་ལྷན་སྤྱི་ཁྱབ་དྲུང་ཆེ་མཆོག་ནས་རྒྱ་ནག་གི་འཁྱོགས་བཤད་ལ་བོད་དོན་ལས་འགུལ་བ་ཚོས་གདོང་ལེན་བྱེད་ཕྱོགས། རྒྱ་གར་གཙོས་མཐུན་ཕྱོགས་རྒྱལ་ཁབ་ཁག་ནས་དེའི་ཐོག་རྒྱབ་སྐྱོར་དགོས་གལ། གཞན་ཡང་བོད་ཀྱི་ཁོར་ཡུག་གི་ཛ་དྲག་གནས་སྟངས་དང་རྒྱ་གར་གཙོས་ལྷོ་ཤར་ཨེ་ཤེ་ཡའི་རྒྱལ་ཁབ་ཁག་ལ་མཐོ་སྒང་བོད་ཀྱི་ཁོར་ཡུག་བརྟན་ལྷིང་གི་གལ་གནད། འཛམ་གླིང་སྤྱིའི་ཁོར་ཡུག་གི་འགྱུར་ལྡོག་གླེང་སྐབས་བོད་ཀྱི་ཁོར་ཡུག་གི་གལ་གནད་སྐོར་གླེང་སློང་དགོས་གལ་སོགས་ཀྱི་ཐད་བསམ་ཚུལ་བཤད་ཡོད་པ་མ་ཟད། ཚོགས་བཅར་བ་ཚོར་བོད་ཀྱི་ཁོར་ཡུག་དང་འབྲེལ་བའི་ཡིག་ཆ་སོགས་འགྲེམས་སྤེལ་ཞུས་ཡོད།
ཚོགས་འདུའི་སྐབས་རྒྱ་གར་གྱི་ཕྱི་སྲིད་བློན་ཆེན་ཟུར་པ་ (Shri Salman Khurshid) མཆོག་དང་རྒྱ་གར་གཞུང་གི་དཔལ་འབྱོར་སློབ་སྟོན་པ་ཟུར་པ་ (Shri Kaushik Bansu) མཆོག ཏེ་ལ་གྷ་ན་མངའ་སྡེའི་བློན་ཆེན་ཟུར་པ་དང་ལས་ཐོག་བློན་ཆེན། ཉི་ཧོང་གི་ཤེས་རིག་བློན་ཆེན་ཟུར་པ་དང་བོད་དོན་རྒྱབ་སྐྱོར་བ་ ( Masaharu Nakagawa) མཆོག སྐྱིལ་ཤར་ཨ་ཧྥི་རི་ཀའི་རྒྱལ་ཁབ་ཀྱི་སྲིད་བློན་ཟུར་པ་ (Martin Ziguele, former prime minister of Central Africa Republic) མཆོག་གཙོས་རྒྱལ་སྤྱིའི་ཆབ་སྲིད་མི་སྣ་དང་གྲོས་ཚོགས་འཐུས་མི་མང་པོར་མཇལ་འཕྲད་ཀྱིས་༧གོང་ས་མཆོག་གི་ཕྱག་དེབ་གསར་པ་ཕུལ་རྒྱུ་བྱུང་ཡོད་པ་མ་ཟད། བོད་ནང་གི་ཛ་དྲག་གནས་སྟངས་དང་བོད་མིའི་འཐབ་རྩོད་སོགས་ཀྱི་ཐད་གོ་རྟོགས་གང་ལེགས་སྤེལ་རྒྱུ་བྱུང་ཡོད།