G20 གྱི་དབུ་ཁྲིད། བོད་ཀྱི་ཆེད་དུ་ཆིག་སྒྲིལ།
བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ནས་G20 ལྷན་ཚོགས་ཀྱི་དབུ་ཁྲིད་ཚོར་རྒྱ་ནག་གི་དབུ་ཁྲིད་ཤི་ཅིང་ཕུང་ལ་ཕམ་ཉེས་སུ་སོང་བའི་རྒྱ་གཞུང་གི་བོད་ཐོག་འཛིན་པིའི་སྲིད་ཇུས་ལ་ཡོ་སྲང་དང་བོད་དོན་ཐོག་མཉམ་སྡེབ་ཀྱི་གདོང་ལེན་བྱེད་དགོས་པའི་འབོད་སྐུལ་ཞུ་རྒྱུ་ཡིན།
G20ལྷན་ཚོགས་ཀྱི་སྔ་ནུར་གྱི་ཉིན་འདིར་བཞུགས་སྒར་དྷ་སའི་གཞུང་འབྲེལ་མ་ཡིན་པའི་ཚོགས་པ་ལྔ་ནས་ G20ལྷན་ཚོགས་ཀྱི་དབུ་ཁྲིད་ཚོར་༼བོད་ཀྱི་ཆེད་དུ་ཆིག་སྒྲིལ་བྱེད།༽ ཅེས་པ་དང་། རྒྱ་ནག་དམར་ཤོག་ཚོགས་པས་བོད་བཙན་བཟུང་བྱས་ནས་ལོ་ངོ་དྲུག་ཅུའི་ནང་བོད་མི་ཚོར་ཚད་ལས་འདས་པའི་་གནར་གཅོད་བཏང་ནས་འགྲོ་བ་མིའི་ཐོབ་ཐང་གདལ་ཤིགས་ཚབས་ཆེན་གཏོང་བཞིན་པ་འགོག་ཐབས་བྱེད་དགོས་པའི་འབོད་སྐུལ་ཤུགས་ཆེ་ཞུ་རྒྱུ་དང་། གཞན་ཡང་ཟློས་གར་གྱི་རྣམ་པའི་ལས་འགུལ་ཞིག་སྤེལ་ནས་བོད་མི་ཚོས་རང་ཉིད་ཀྱི་རིག་གཞུང་སྲུང་སྐྱོབ་དང་གཞི་རྩའི་འགྲོ་བ་མིའི་རང་དབང་གི་ཆེད་དུ་རྒྱ་གཞུང་གི་སྲིད་ཇུས་ལ་མི་འདོད་པའི་ཚད་མཐོ་བའི་རང་ལུས་མེར་བསྲེག་གི་འགོག་རྒོལ་གྱི་ལས་འགུལ་སྤེལ་བཞིན་པ་གསལ་གཏོན་གྱིས་ G20 གྱི་ལྷན་ཚོགས་ཐོག་ཕེབས་མཁན་གྱི་སྲིད་གཞུང་ཁག་མཉམ་འབྲེལ་གྱིས་ངེས་པར་དུ་བོད་ཀྱི་ཛ་དྲག་གི་གནད་དོན་ཐོག་གླེང་གློང་དགོས་པ་གསལ་སྟོན་དང་འབོད་སྐུལ་ཞུ་རྒྱུ་ཡིན།
བོད་ཀྱི་གཞོན་ནུ་ལྷན་ཚོགས་ཀྱི་ཕྱི་འབྲེལ་དང་དྲིལ་སྒྲགས་འགན་ཛིན་ཚེ་དབང་སྒྲོལ་མ་ལགས་ནས་”རྒྱ་ནག་ལ་འཛམ་གླིང་དགོས་པ་བཞིན་འཛམ་གླིང་ལ་ཡང་རྒྱ་ནག་དགོས་ཀྱི་ཡོད། དཔལ་འབྱོར་གྱི་གནད་དོན་སྲ་བརྟན་དགོས་པ་ཤེས་པ་དང་ཆབས་གཅིག་ང་ཚོས་ངེས་པར་དུ་འགྲོ་བ་མའི་ཐོབ་ཐང་དང་ཆེ་མཐོང། རིན་ཐང་སོགས་ཀྱང་གཅིག་འགྱུར་གྱིས་སྲ་བརྟན་དགོས་པ་དྲན་དགོས། བོད་ཀྱི་གཞོན་ལྷན་གྱི་ངོས་ནས་ཆབ་སྲིད་དང་དཔལ་འབྱོར་དྲང་བདེན་ངང་གོང་འཕེལ་དང་སྲ་བརྟན་འགྲོ་དགོས་པ་དང་ G20ལྷན་ཚོགས་ཀྱི་དབུ་ཁྲིད་རྣམས་ནས་འགྲོ་བ་མིའི་རང་དབང་གི་གནད་དོན་གཞི་རྩར་བཞག་ནས་འདི་དག་གདལ་ཤིགས་གཏོང་མཁན་གྱི་སྲིད་གཞུང་ལ་ལམ་སྟོན་དགོས་པའི་རེ་འདུན་འདོན་གྱི་ཡོད།”ཅེས་གསུངས་ཡོད་པ་རེད།
བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲིས་སྒྲོལ་མ་ལགས་ནས་ “བོད་ནང་གི་གནད་སྟངས་ཉམས་རྒུད་འགྲོ་ཚད་ནི་ཧ་ཅང་གི་འགྱོགས་པོ་རེད། རྒྱ་ནག་གི་དཔལ་འབྱོར་ཡར་རྒྱས་དང་ཆབ་སྲིད་སྲ་བརྟན་གྱི་གནད་དོན་ནི་བོད་ནང་འགྲོ་བ་མིའི་ཚེ་སྲོག་དང་འགྲོ་བ་མིའི་ཐོབ་ཐང་ལ་གུས་བརྩི་རྩ་བ་ནས་མེད་པར་འཁྲེག་འཛིན་ཅན་གྱི་སྲིད་ཇུས་ལག་ལེན་དང་། རང་བྱུང་གི་ཁོར་ཡུལ་ལ་ཚད་ལས་འདས་པའི་གཏོར་སྐྱོན་གཏོང་བཞིན་པ་དང་ཐད་ཀར་འབྲེལ་བ་ཆགས་ཡོད། དེ་ནི་ཉེ་ཆར་བོད་མདོ་ཁམས་ལྟ་བུ་རྫོང་དུ་དད་ལྡན་མི་མང་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་འཁྲུངས་སྐར་སྲུང་བརྩི་ཞུ་བཞིན་པར་རྒྱ་དམག་ནས་མི་མང་ནང་གང་བྱུང་དུ་མེ་མདའ་བརྒྱབ་པ་དང་། རྫ་སྟོད་དུ་ཁྲིམས་འགལ་ཐོག་ཕ་ལམ་གྱི་གཏེར་ཁ་སྔོག་འདོན་བྱས་པར་མི་མང་ནས་ཞི་རྒོལ་བྱེད་སྐབས་ཚད་ལས་འདས་པའི་རྡུང་རྡེག་བཏང་ཡོད་པ་སོགས་ནི་དཔེ་མཚོན་ཞིག་ཡིན།”
རྒྱ་གཞུང་ནས་བོད་ནང་ཇི་ཙམ་དམ་དྲག་བྱས་པ་དེ་རྩིས་ཀྱིས་བོད་མིའི་འགོག་རྒོལ་གྱི་བློ་སྟོབས་ཀྱང་ཇེ་ཆེར་འགྲོ་བཞིན་ཡོད། འགོག་རྒོལ་གྱི་རྦ་རླབས་འཕྱུར་ཐེངས་རེར་གདུག་རྩུབ་ཆེ་བའི་རྒྱ་གཞུང་གི་དམག་མི་དང་ཁྲིམ་ཐོག་ནས་བོད་མི་རྣམས་ལ་ཚད་ལས་འདས་པའི་གནར་གཅོད་གཏོང་བ་དང་དྲང་བདེན་མ་ཡིན་པའི་གསར་འགྱུར་དྲིལ་བསྒྲགས་བྱེད་ཀྱི་ཡོད། སྟབས་མ་ལེགས་པར་རྒྱལ་སྤྱི་ཚོགས་ནས་ཀྱང་གདུག་རྩུབ་ཅན་གྱི་རྒྱ་གཞུང་གི་སྲིད་ཇུས་འོག་བོད་མི་རྣམས་ཚད་ལས་འདས་པའི་སྡུག་བསྔལ་མྱོང་བཞིན་པ་དེ་དག་ལ་བཟང་ཕྱོགས་ཀྱི་ཡ་ལན་གནང་རྒྱུ་ལས་ཟློག་སྟེ་རྒྱ་གཞུང་གི་དམག་ཤུགས་དང་དཔལ་འབྱོར་འཕེལ་རྒྱས་ཀྱི་གནོན་ཤུགས་ཐེབས་ནས་ཁུ་སིམ་མེར་བསྡད་པའི་གནས་སྟངས་ཤིག་ཆགས་ཡོད།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་གར་བྱམས་ནས་་”ལོ་ངོ་མང་པོ་ཞིག་གི་རིང་ང་ཚོས་རྒྱལ་སྤྱིའི་གཞུང་ཁག་ལ་བོད་ཀྱི་ཆེད་དུ་ཆིག་སྒྲིལ་དང་རྒྱ་གཞུང་གི་ཐུབ་ཚོད་ལ་མཉམ་དུ་གདོང་ལེན་བྱེད་དགོས་པའི་འབོད་སྐུལ་ཞུས་ཡོད། ཞི་ཅིང་ཕིང་ལ་མཚོན་ན་འདི་ནི་ཁོ་བོས་རྒྱ་གཞུང་གི་གཙོ་འཛིན་ཆགས་ནས་ལོ་ངོ་གཅིག་གི་ནང་རྒྱལ་སྤྱིའི་ཤུགས་རྐྱེན་ཆེ་བའི་དམངས་གཙོའི་དབུ་ཁྲིད་ཁག་དང་མཉམ་དུ་G20གི་ལྷན་ཚོགས་ཚོགས་པ་ཐེངས་དང་པོ་དེ་ཆགས་ཡོད་པས་ལྷན་ཚོགས་ཐོག་ཕེབས་མཁན་གྱི་དབུ་ཁྲིད་ཚོས་རྒྱ་གཞུང་གི་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་ཇུས་ལ་གསལ་བཤད་བྱེད་དགོས་པའི་དུས་ལ་སླེབས་ཡོད།” ཅེས་གསུངས་ཡོད་པ་རེད།
གཞན་ཡང་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་ལེགས་འཇམ་དབྱངས་ལགས་ནས་གསུངས་དོན་”བོད་ནང་རང་ལུས་མེར་བསྲེག་ཀྱི་ལས་འགུལ་ཐེངས་༡༢༠ལྷག་བྱུང་ནས་གནས་ཚུལ་ཧ་ཅང་ཛ་དྲག་ཆགས་བཞིན་པ་འདིར་རྒྱལ་སྤྱིའི་གཞུང་ཁག་ནས་ངེས་པར་དུ་དོ་སྣང་དགོས་ཀྱི་འདུག ང་ཚོས་G20གྱི་དབུ་ཁྲིད་རྣམས་ལ་རང་ཉིད་ཀྱི་རྒྱལ་ཁབ་དང་རྒྱ་ནག་དབར་གྱི་གཞི་རྩའི་འབྲེལ་ལམ་དམ་སྲུང་བྱེད་པ་དང་ཆབས་གཅིག་ལོ་ངོ་དྲུག་བཅུ་ལྷག་བཙན་གནོན་བྱས་པའི་བོད་ཀྱི་གནད་དོན་ཐོག་དྲང་བདེན་གྱི་འགྱུར་བ་ཞིག་ཡོང་རྒྱུར་ནུས་པ་ལྡན་པའི་ཐབས་ཤེས་ཤིག་འཚོལ་རྒྱུར་རེ་སྐུལ་ཞུ་གི་ཡོད།”
བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ནས་རྒྱལ་སྤྱིའི་མི་མང་ནས་ G20གྱི་དབུ་ཁྲིད་ལ་བོད་ཀྱི་གནད་དོན་ཐོག་ཁ་ཞེ་གཉིས་མེད་ཀྱི་ཉམ་འབྲེལ་རྒྱབ་སྐྱོར་དགོས་པ་དང་། རྒྱལ་སྤྱིའི་གཞུང་ནས་བོད་ཀྱི་གནད་དོན་ཐོག་དོན་ཕན་ལྡན་པའི་སྲིད་ཇུས་ལག་ལྟར་དགོས་པའི་སྐུལ་མ་བྱེད་རྒྱུར་འབོད་སྐུལ་ཞུ་གི་ཡོད།
“སྤྱི་ལོ་ ༢༠༠༩ ནས་བོད་མི་༡༢༠ཙམ་གྱིས་རང་ཉིད་ཀྱི་ལུས་པོ་མེ་རུ་བསྒྲོན་ནས་རྒྱ་གཞུང་གི་བཙན་འཛུལ་ལ་ངོ་རྒོལ་བྱས་ཡོད། བོད་མི་ཚོས་འདི་ལྟར་རང་དབང་དང་འགྲོ་བ་མིའི་ཐོབ་ཐང་གི་ཆེད་དུ་རང་གི་ཚེ་སྲོག་ཚུན་ཆད་བློག་བཏང་ནའང་རྒྱ་ནག་གཞུང་ནས་རྒྱལ་སྤྱིའི་དབུ་ཁྲིད་ཚོར་གནད་དོན་འདིའི་ཐོག་ཁ་གྲག་འཇུག་མེད། འཛམ་གླིང་མི་མང་ནས་གནད་དོན་འདིར་དོ་འཁུར་དགོས་པའི་འབོད་སྐུལ་ཞུ་བཞིན་ཡོད་པ་དང་། ངས་ཀྱང་རྒྱ་གར་གཞུང་ལ་བོད་དོན་ཀྱི་ཆེད་དུ་ཕྱོགས་མང་དང་མཉམ་འདེབས་ཀྱི་བྱ་སྤྱོད་སྤེལ་དགོས་པའི་འབོད་སྐུལ་ཞུ་རྒྱུ་ཡིན།” ཅེས་རྒྱ་གར་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་ལས་རོགས་ར་ཞི་ལྗོའོ་རི་ལགས་ཀྱིས་གསུངས་ཡོད་པ་རེད།
རྒྱལ་སྤྱིའི་སྲིད་གཞུང་ཁག་ནས་ངེས་པར་དུ་རྒྱ་ནག་གིས་འཚོང་འབྲེལ་ཕྱི་ནུར་དང་མཚམས་འཇོག་བྱེད་རྒྱུའི་འཇིགས་སྐུལ་བྱེད་པ་ནི་དོན་དམ་དུ་ཁ་སྤོབ་ཙམ་ཡིན་པ་ཤེས་དགོས། G20ལྷན་ཚོགས་ཀྱི་སྲིད་གཞུང་ཁག་ལ་རྒྱ་ནག་གི་འབྲེལ་ལམ་དགོས་པ་ལྟར་རྒྱ་ནག་ལ་ཡང་ G20ལྷན་ཚོགས་ཀྱི་སྲིད་གཞུང་ཁག་གི་རྒྱབ་སྐྱོར་དགོས་ཀྱི་ཡོད། གང་ལྟར་ཀྱང་ G20ལྷན་ཚོགས་ཀྱི་སྲིད་གཞུང་ཁག་གི་མཛའ་འབྲེལ་ནི་གཅིག་ལ་གཅིག་བརྟེན་གྱི་འབྲེལ་ལམ་ཞིག་ཡིན་པས་འབྲེལ་ཡོད་སྲིད་གཞུང་ཁག་ནས་རྒྱ་ནག་གཞུང་དང་འདྲ་མཉམ་དང་མང་གཙོའི་ལྟ་གྲུབ་ཀྱི་སྲོག་ཤིང་ལ་ངེས་པར་དུ་དོ་ཕོག་མི་འགྲོ་བ་བྱེད་དགོས་ཀྱི་ཡོད།
རྒྱ་ནག་དམར་ཤོག་སྲིད་གཞུང་གི་གཙོ་འཛིན་ཆགས་ནས་ལོ་ངོ་གཅིག་མ་ཟིན་ཙམ་སོང་བའི་ཞི་ཅིང་ཕིང་ལ་མཚོན་ན་ G20གི་ལྷན་ཚོགས་ཐོག་ཕེབས་མཁན་གྱི་དབུ་ཁྲིད་ཚོས་རྒྱ་གཞུང་གི་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་ཇུས་ལ་ཡོ་བསྲང་
བྱེད་དགོས་པའི་དུས་ལ་སླེབས་ཡོད།
བོད་ལ་མཚོན་ན་ད་ལྟ་ནི་ཆེས་ཛ་དྲག་གི་དུས་སྐབས་ཤིག་ཆགས་ཡོད་པས་ G20ལྷན་ཚོགས་ཀྱི་དབུ་ཁྲིད་ཁག་ནད་བོད་ཀྱི་ཆེད་དུ་ཆིག་སྒྲིལ་དགོས་པའི་དུས་ལ་བབས་ཡོད
སྤྱི་ལོ་ ༢༠༡༣ ཟླ་བ་ ༩ ཚེས་ ༤ ཉིན་
བོད་ཀྱི་གཞུང་འབྲེལ་མ་ཡིན་པའི་ཚོགས་ལྔ་ནས།