༡༩༥༩ ལོའི་ཕྱི་ཟླ་ ༣ ཚེས་ ༡༠ ཉིན་ྋགོང་ས་མཆོག་རྒྱ་མིའི་དམག་སྒར་དུ་གཟིགས་མོར་གདན་ཞུས་ལྟར་ནང་དོན་ཕེབས་རྒྱུ་ཐུགས་གཏན་འཁེལ་བ་ལྷ་ས་ཁུལ་གྱི་རྒྱ་ཆེའི་སེར་སྐྱ་མི་མང་ཡོངསནས་ཤེས་ཏེ་ྋགོང་ས་ཆེན་པོ་གློ་བུར་བཙན་ཤེད་ཀྱིས་རྒྱ་ནག་ཏུ་གདན་འདྲེན་ཞུ་རྒྱུའི་ཉེན་འགན་མ་བཟོད་པར་བཀའ་ཤག་བརྒྱུད་ཕེབས་བཤོལ་ཡོང་བའི་གསོལ་འདེབས་ཞུས་པ་དང་ཆབས་ཅིག་སྐུ་ཕྱྭར་བསྡོ་བའི་བྱ་ངན་ལ་གདོང་ལེན་བྱེད་ཆེད་མི་མང་སེར་སྐྱ་སྟོང་ཕྲག་མང་པོ་ནོར་གླིང་ཕོ་བྲང་ཉེན་སྲུང་གི་དང་བླངས་དམག་དང་རང་དབང་སྒེར་ལངས་ཀྱི་རྔམ་སྟོན་ཁྲོམ་སྐོར་གྱི་ལས་འགུལ་ནང་ཞུགས་ཡོད་པ་རེད། ཕྱི་ཚེས་ ༡༧ ཉིན་བོད་ཀྱི་བསྟན་སྲིད་བདེ་ཐབས་ལ་དགོངས་ནས་སྐུ་ངལ་ལ་མ་འཛེམས་པར་ཆིབས་སྒྱུར་གནང་རྒྱུ་ཐུགས་གཏན་འཁེལ་ཏེ་མཚན་མོ་ཆུ་ཚོད་ ༩ པར་ན་བཟའ་སྐྱ་ཆས་གསོལ་ཏེ་སྐུ་འཁོར་ཧྲག་བསྡུས་དང་བཅས་ཐོག་མར་ལྷོ་ཁ་ཁུལ་དང༌།  དེ་ནས་རྒྱ་གར་འཕགས་པའི་ཡུལ་དུ་ཆིབས་སྒྱུར་གནང༌། རྒྱ་གར་ས་ཐོག་ཏུ་ཕེབས་མ་ཐག་ྋགོང་ས་ཆེན་པོ་མཆོག་ལ་རང་དབང་གི་སྒོ་ནས་གསུང་གླེང་གནང་རྒྱུའི་གོ་སྐབས་བྱུང་བ་དང༌། ཕྱི་ལོ་༡༩༥༩ལོའི་ཟླ་ ༤ ཚེས་ ༡༨ ཉིན་རྒྱ་ཤར་ཨ་སམ་ཏིའི་རྫུ་པུར་ས་གནས་སུ་གསར་འགོད་པ་རྣམས་ལ་རྒྱ་བོད་དབར་བཞག་པའི་ཆིངས་ཡིག་གྲོས་མཐུན་དོན་ཚན་བཅུ་བདུན་ཟེར་བ་ནུས་མེད་ཡིན་པའི་ཡོང་ཁྱབ་གསལ་བསྒྲགས་གནང་། དེ་རྗེས་ཕྱི་ཟླ་ ༦ ཚེས་ ༢༠ ཉིན་མ་སུ་རིར་གསར་འགོད་ལྷན་ཚོགས་ཐོག་ྋགོངས་ཆེན་པོ་མཆོག་ནས་ཡོངས་བསྒྲགས་གནང་དོན། ཐོག་མར་བོད་ཀྱི་ས་ཐོག་ལ་རྒྱ་དམག་བཏང་བ་དེ་ཧ་ཅང་གི་བཙན་ཤེད་ཚོད་མེད་ཅིག་ཡིན་ལ། དེའི་རྗེས་སུ་བཞག་པའི་གྲོས་མཐུན་དེ་ཡང་བོད་མི་དམངས་ལ་དཔུང་སྡིགས་ཀྱིས་མི་འཇོག་ཀ་མེད་བྱུང་བ་ལས། བོད་མི་དམངས་བློ་མོས་འདོད་བབས་ཀྱིས་བཞག་པ་ཞིག་གཏན་ནས་མིན་ལུགས་དང༌། བཙན་དབང་གིས་འཇོག་ཏུ་བཅུག་པའི་གྲོས་མཐུན་ཟེར་བ་དེ་ཡང་རྒྱ་དམར་རངཉིད་ནས་འགལ་འདས་རིམ་པ་བྱས་ཟིན་ལུགས་བཀའ་གསལ་པོ་གནང་ཡོད་པ་དེ་ནས་བཟུང་གྲོས་མཐུན་དོན་ཚན་བཅུ་བདུན་ཟེར་བ་དེ་དག་ཁྲིམས་དོན་གཉིས་ཀའི་ཐོག་ནས་ནུས་མེད་ཤི་རོ་ལྟ་བུར་གྱུར་ཟིན་སྟབས་ངོས་འཛིན་བྱ་ཡུལ་གང་ཡང་མེད་པ་ཞིག་ཆགས་ཡོད། དེ་རྗེས་རྒྱ་གཞུང་གིས་བོད་གཞུང་ཞེས་པ་རྩ་མེད་ལ་སོང་ཚུལ་ཁྱབ་བསྒྲགས་བྱས་མོད། ྋགོང་ས་མཆོག་གིས་ “ང་དང་ངའི་བཀའ་ཤག་གང་དུ་ཡོད་པ་དེར་བོད་གཞུང་ཡོད་པ་བོད་མི་མང་གིས་ངོས་འཛིན་བྱེད་ཀྱི་རེད།” ཅེས་གསུངས་པ་ལྟར་བོད་མི་མང་གི་ཁྲིམས་མཐུན་གྱི་གཞུང་གི་རྒྱུན་ད་ལྟའི་བར་དུ་གནས་ཡོད་ལ། རྒྱ་གར་དུ་ྋཞབས་སོར་འཁོད་རྗེས་བོད་ཀྱི་ཆོས་དང་རིག་གཞུང་ཡུལ་གོམས་གཤིས་ལུགས་བཅས་པ་རྒྱུན་འཛིན་དང་བོད་ཀྱི་རང་དབང་སླར་གསོ་ཆེད་བཙན་བྱོལ་ནང་བོད་གཞུང་གི་སྒྲིག་འཛུགས་བསྐྱར་བསྒྲིགས་ཀྱིས་སློབ་གྲྭ་དང་ཆོས་སྒར། གཞིས་ཆགས། སྨན་རྩིས་ཁང༌། ཟློས་གར་བཅས་པ་རིམ་བཞིན་གསར་འཛུགས་གནང་ནས་ཡར་རྒྱས་ཀྱི་ལམ་དུ་ཞུགས་ཏེ་དེང་སྐབས་སྒྲིག་འཛུགས་ཀྱི་རྨང་གཞི་སྲ་བརྟན་ཕུགས་འཕེར་ཞིག་ཏུ་གྱུར་ཡོད། ༡༩༦༠ ཟླ་ ༩ ཚེས་ ༢ ཉིན་ཆོས་ལུགས་ཆོལ་གསུམ་དང་བཅས་པའི་སྐབས་དང་པོའི་བོད་མི་མང་སྤྱི་འཐུས་ལྷན་ཚོགས་ཆེད་འཛུགས་གནང་སྟེ་དམངས་གཙོའི་ལམ་སྲོལ་དབུ་བརྙེས། ༡༩༦༡ ཟླ་ ༣ ཚེས་༡༠ ཉིན་མ་འོངས་བོད་ཀྱི་རྩ་ཁྲིམས་ཀྱི་ཟིན་བྲིས་གསོལ་སྩལ་གནང༌། ༡༩༦༧ ལོར་ཕྱི་རྒྱལ་ཡུལ་གྲུ་ཁག་ཏུ་ཆིབས་བསྒྱུར་གནང་འགོ་བཙུགས་ཏེ་ད་བར་རྒྱལ་ཁབ་ ༦༠ སྐོར་ལ་ྋཞབས་སོར་འཁོད་ཡོད། ༡༩༨༩ ཟླ་ ༡༢ ཚེས་ ༡༠ འགྲོ་བ་མིའི་ཐོབ་ཐང་ཉིན་ནོ་བེལ་འཛམ་གླིང་ཞི་བདེའི་གཟེངས་རྟགས་འབུལ་བཞེས་གནང་བས་མཚོན་དབར་ཆེ་བསྟོད་གཟེངས་རྟགས་ཆེ་གྲས་ ༧༥ སྐོར་དང༌། ཆུང་ཁག་བརྒྱ་སྐོར་བཅས་འབུལ་བཞེས་གནང༌། ༡༩༩༢ ལོ་དམངས་གཙོའི་ལམ་སྲོལ་གོང་སྤེལ་དང་འཐུས་ཚང་ཡོང་ཆེད་བོད་མི་མང་སྤྱི་འཐུས་ཁྲིམས་བཟོ་ལྷན་ཚོགས་རྒྱ་སྐྱེད་ཐོག་བཅའ་ཁྲིམས་གསར་བཟོ་གནངསྟེ་འཛིན་སྐྱོང་དང༌། ཁྲིམས་བཟོ། ཁྲིམས་ཞིབ་ཁང་བཅས་དམངས་གཙོའི་ཀ་བ་གསུམ་ལྡན་གྱི་གཞུང་ཆ་ཚང་བ་ཞིག་ཆགས་ཡོད་པ་དང༌། ལོ་དེར་མ་འོངས་བོད་ཀྱི་ཆབ་སྲིད་ལམ་སྟོན་དང༌། རྩ་ཁྲིམས་སྙིང་བསྡུས་ཀྱང་གསལ་བསྒྲགས་བསྐྱངས། ༢༠༠༡ ལོར་བཅའ་ཁྲིམས་བསྐྱར་བཅོས་ཀྱིས་བཀའ་བློན་ཁྲི་པ་ཐད་ཀར་མི་མང་གིས་འོས་འདེམས་བྱེད་པའི་ལམ་ལུགས་བཅས་སུ་གོམ་པ་རིམ་བགྲོད་ཀྱིས་དམངས་གཙོ་མདུན་སྐྱོད་དང་འཐུས་སྒོ་ཇེ་ཚང་དུ་བཏང་ཡོད་ཅིང། བཙན་བྱོལ་བོད་མིའི་མང་གཙོའི་གོམ་སྟབས་མདུན་སྐྱོད་འཕེལ་རིམ་ཡོང་རྫོགས་༧གོང་ས་མཆོག་གི་དགོངས་གཞི་དང་མཐུན་ཐུགས་སྟོབས་ལམ་སྟོན་འོག་ནས་བྱུང་བ་ཆགས་ཡོད། ༢༠༡༡ ལོར་༧གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོང་རྫོགས་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་ཀྱིས་དགྲེལ་ཡོད་དུ་ཕེབས་ཡོད་པ་དང། ད་ལྟའི་བཙན་བྱོལ་དབུས་བོད་མིའི་སྒྲིག་འཛུགས་སམ་བོད་གཞུང་གི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་སྲིད་སྐྱོང་ཀྱིས་བཞེས་ཀྱི་ཡོད་པ་དང། ཆོས་ལུགས་ཁག་དང་ཆོལ་ཁ་སོ་སོའི་སྤྱི་འཐུས་ཀྱི་བཙན་བྱོལ་བོད་མིའི་མཐུན་མིན་གྱི་མང་གཙོའི་སྒྲིག་འཛུགས་ཞིག་ཆགས་ཡོད། འདི་ནི་གཞིས་བྱེས་བོད་མི་ཡོངས་ཀྱིས་ངོས་འཛིན་བྱེད་བཞིན་པའི་བོད་ཀྱི་གཞུང་གཅིག་དེ་ཆགས་ཡོད།